2 Samuela 14:1-33
14 KUA iloa e Ioapo ko e tama a Seruia kua manako e patuiki kia Apisaloma;
2 Ti fakafano age e Ioapo ki Tikoa, ti ta mai ai e ia e fifine iloilo, kua pehe age a ia kia ia, Kia mānu fakatupua a koe, mo e tapulu ai a koe ke he tau tapulu he tagata kua mānu, aua foki neke takai e koe ke he puke lolo, ka kia eke e koe po ke tagata kua mānu ke he tau aho loga ha ko e tagata kua mate.
3 Ti fina age a koe ke he patuiki, mo e vagahau ai e koe kia ia ke he tau kupu nai; ti tuku atu ai e Ioapo e tau kupu ke he hana gutu.
4 Kua pehe age e fifine Tikoa ke he patuiki, kua fakaveli fakafohifo foki a ia ke he kelekele, kua hufeilo ai a ia, mo e pehe age, Ko e patuiki na e, kia lagomatai mai ā!
5 Ti pehe age e patuiki kia ia Koe heigoa kia? Ti pehe age a ia, Ko au ni ko e fifine takape, kua mate tuai haku a tane.
6 Ne ha i ai ke he fekafekau fifine hau e tau tama tane tokoua, ti latau ai a laua ke he vao, ti nakai ha i ai taha ke vevehe ai a laua, ti keli he taha e taha ti mate ai a ia.
7 Ti kitiala, kua tutu mai e magafaoa oti he hau a fekafekau fifine, kua pehe mai a lautolu, Tuku mai ā a ia ne keli hana matakainaga, kia keli e mautolu a ia ke totogi aki hana matakainaga ne keli e ia; ti fakaoti ai e mautolu e hakeaga; ti tamate ai e lautolu haku a malala kaka ne toe, ti eke e lautolu ke nakai tuai fai higoa haku tane, to nakai toe ai ha tagata kia ia ke he fuga kelekele.
8 Ti pehe age e patuiki ke he fifine, Fano a a koe ke he fale hāu; ka ko au to poaki age e au kia lautolu ke he mena hāu.
9 Ti pehe age e fifine Tikoa ke he patuiki, Haku iki na e ko e patuiki, kia ha ha ia au katoa mo e magafaoa he haku a matua e hala, ka kia mea e patuiki mo e hana nofoaiki.
10 Ti pehe age e patuiki, Nakai kia pehe atu au kia koe, kia ta mai e koe a ia kia au, ti nakai pipiki atu foki e ia kia koe.
11 Ti pehe age e fifine kia manatu ai e patuiki kia Iehova hau a Atua, ke aua neke keli foki e ia ne eke ke lukutoto, neke keli ai e lautolu haku tama. Ti pehe age a ia, Kua moui a Iehova, nakai ni to ke he kelekele ha lauulu taha he tama hāu.
12 Ti pehe age e fifine, Kia toka e koe hau a fekafekau fifine ke vagahau atu ha kupu ke he haku a iki ko e patuiki. Ti pehe age a ia, Kia vagahau mai a.
13 Ti pehe age e fifine, Ko e heigoa kia e mena kua manatu ai pihia e koe ke he motu he Atua? Kua vagahau mai foki he patuiki ke he mena nai tuga ne taha ne hehe, ha kua nakai liuaki mai he patuiki a ia ne vega kehe e ia.
14 Ha ko e mena mamate ni a tautolu, ti tuga ne magavai kua maligi ke he kelekele kua nakai maeke ke liu fakapotopoto mai ai; ti nakai tamate tagata he Atua, ka e kumi lagatau e ia ha ko ia ne vega kehe ke nakai vega kehe muatua ai a ia.
15 Hanai, kua hau au ke vagahau atu ke he haku a iki ko e patuiki ke he mena nai, he fakamatakutaku mai he tau tagata kia au; ti pehe atu ai hau a fekafekau fifine, to vagahau atu ni e au ke he patuiki; po ke eke nakai he patuiki e mena ke vagahau atu ai hana fekafekau fifine.
16 Ha kua fanogonogo mai e patuiki, ke laveaki mai hana fekafekau fifine mai he lima he tagata kua fia fakaoti au katoa mo e haku tama mai he tufaaga he Atua.
17 Ti pehe hau a fekafekau fifine, Kia eke mo okiokiaga e kupu he haku a iki ko e patuiki; ha ko e mena tuga ne agelu he Atua kua pihia ni haku a iki ko e patuiki, ke fanogonogo ai ke he mitaki mo e kelea, ati ha i ai mo koe a Iehova hau a Atua.
18 Ti tali age he patuiki ke he fifine kua pehe age, Aua neke fufu e koe ia au e mena ke huhu atu e au kia koe. Ti pehe age e fifine kia vagahau mai a haku a iki ko e patuiki.
19 Ti pehe age e patuiki, Ne fakalataha nakai a mua mo Ioapo ke he tau mena oti nai? Ti tali age e fifine, kua pehe age, Kua moui a koe haku iki na e, ko e patuiki, nakai maeke ke afe taha ke he fahi matau, po ke fahi hema mai he tau mena oti kua vagahau mai ai haku a iki ko e patuiki, ha ko e hau a fekafekau ko Ioapo ko ia ni ne poaki mai kia au, ko ia foki ne tuku mai e tau kupu oti ia ke he gutu he hau a fekafekau fifine;
20 Kua taute he fekafekau hāu ko Ioapo e tau kupu na, ke fakahoko ai e mena nai; kua iloilo foki haku a iki, tuga ne iloilo ai e agelu he Atua, ke iloa ai e tau mena oti kana ke he lalolagi.
21 Ti pehe age ai e patuiki kia Ioapo, Kitiala, kua eke e koe e mena nai; ti fano a koe mo e ta mai e fuata ko Apisaloma.
22 Ti fakaveli fakafohifo ai a Ioapo ke he kelekele, kua hufeilo, mo e fakaaue ai ke he patuiki; kua pehe age a Ioapo, Ko e aho nai kua iloa ai hau a fekafekau kua ofania au e koe haku iki na e, ko e patuiki ha kua eke he patuiki e mena ne vagahau atu ai hana fekafekau.
23 Ti matike ai a Ioapo, ti fano a ia ki Kesuri ti ta mai ai e ia a Apisaloma ki Ierusalema.
24 Ti pehe age e patuiki, Kia fano a ia ke he hana fale ka e aua neke fekitiaki a maua mo ia. Ti fina age ai a Apisaloma ke he hana fale, ka e nakai fekitiaki a laua mo e patuiki.
25 Nakai fai tagata ke he motu oti a Isaraela ne tino mitaki tuga na Apisaloma; ne mua he nava ki ai a ia; ke kamata mai he tau aloalohui hana ati hoko ke he hana tumuaki ulu, nakai ha ha ia ia ha mena kelea.
26 Ka helehele hana lau ulu, (ha ko e fakahikuaga he tau ne helehele ai e ia; ko e mena mamafa ni kia ia, ti helehele ai,) ne fafati ai e ia e tau lau ūlu he hana ulu, ti ua e teau e sikeli e mamafa ke he fafati he patuiki.
27 Ne fanau ai kia Apisaloma e tau tama tane ne tokotolu, mo e tokotaha e tama fifine, ko Tamara hana higoa; ko e fifine tino mitaki ni a ia.
28 Kua nofo a Apisaloma i Ierusalema ke he tau tau ne ua, ka e nakai fekitiaki a laua mo e putuiki.
29 Ti fakafano age ai e Apisaloma kia Ioapo, kia fakafano atu e ia a ia ke he patuiki; ka e nakai mafai a ia ke hau kia ia. Ti fakafano atu foki e ia kia ia lagaua ia, ka e nakai mafai a ia ke hau.
30 Ti pehe age a ia ke he hana tau fekafekau, Kitiala, ko e fonua a Ioapo ne katofia mo e mena ha tautolu; ha ha i ai foki hana tau karite, kia o a a mutolu, ti huhunu e mutolu ia ke he afi. Ti huhunu ai he tau fekafekau a Apisaloma e fonua ke he afi.
31 Ti matike a Ioapo, ti fano a ia kia Apisaloma ke he hana fale, ti pehe age a ia kia ia, Ko e ha ne huhunu ai he tau fekafekau hāu haku a fonua ke he afi?
32 Ti pehe age a Apisaloma kia Ioapo, Kitiala, ne fakafano atu e au kia koe, kua pehe atu, Hau ā ke fakafano atu e au a koe ke he patuiki, ke pehe age, Ko e heigoa kia e mena ne hau ai au i Kesuri? ane nofo agaia au ke he mena ia po kua mitaki, hanai, kia fekitiaki a maua mo e patuiki; kaeke foki kua ha ia au ha mahani kelea kia kelipopo ai e ia au.
33 Ti fina age a Ioapo ke he patuiki, kua tala age ai kia ia; ti ui ai e ia kia Apisaloma, ti fina atu a ia ke he patuiki mo e fakaveli fakafohifo ai a ia ke he kelekele ki mua he patuiki; ti figita ai e patuiki kia Apisaloma.