2 Samuela 15:1-37
15 KUA mole atu e tau mena na, ti eke e Apisaloma māna e kariota, mo e tau solofanua, mo e tau tagata tokolimagofulu ke tafepoi ai ki mua hana.
2 Kua uhu matike a Apisaloma, mo e tu ai a ia ke he taha fahi hala he gutuhala; ka ha i ai ke he tagata e taufetoko ke hau ai a ia ke he patuiki ke fakafili ai; ti ui age ai e Apisaloma kia ia, kua pehe age, Ko e maga fe ne hau ai a koe? Ti tali age ai e ia, Mai he taha magafaoa a Isaraela hau a fekafekau.
3 Ti pehe age a Apisaloma kia ia, Kitiala, kua mitaki mo e tonu e tau mena hāu, ka e nakai ha i ai taha kua kotofa he patuiki ke fanogonogo kia koe.
4 Kua pehe age foki a Apisaloma, Kua fia eke au mo fakafili he motu; ke o mai ai kia au e tau tagata oti takitokotaha ne ha i ai e taufetoko po ke mena ke fakafili ai, ti fakafili e au a mutolu mo e tonu.
5 Ka fakatata mai e tagata ke fakaveli fakafohifo kia ia, ti fakaolo atu ai e ia hana lima mo e toto atu e ia a ia, mo e figita e ia a ia.
6 Ne eke pihia e Apisaloma kia Isaraela oti ne o age ke he patuiki ke fakafili mena ai; ti liliu kehe ai e Apisaloma e tau loto he tau tagata Isaraela.
7 Kua mole atu e tau tau ne fagofulu; ti pehe mai ai a Apisaloma ke he patuiki, Kia toka e koe au ke fano ki Heperona, ke fakamoli ai haku a omonuo, ne omonuo atu e au kia Iehova.
8 Ha ko e mena omonuo ni hau a fekafekau he nofo ai au i Kesuri i Suria, kua pehe, Kaeke ke liuaki ni e Iehova au ki Ierusalema, ti fekafekau ai au kia Iehova.
9 Ti pehe atu e patuiki kia ia, fano a a koe mo e monuina, ti matike ai a ia, kua fano ki Heperona.
10 Ti fakafano age e Apisaloma e tau toko ke he tau magafaoa oti a Isaraela, kua pehe age, Ka logona e mutolu e pu kua ulo, kia pehe age a mutolu, Kua eke a Apisaloma mo patuiki i Heperona.
11 Kua o fakalataha mo Apisaloma i Ierusalema e tau tagata ne tokoua e teau, ne uiina, ne o foki a lautolu mo e loto mitaki nakai iloa e lautolu ha mena.
12 Ti fakafano age ai e Apisaloma kia Aitofele ko e tagata Kilo, ko e pule a Tavita ke ta mai a ia he hana maga ko Kilo, ha ne eke ai e ia hana poa. Kua tupu lahi e fakafualoto; ha ko e mena au atu he tokologa mau e tau tagata kia Apisaloma.
13 Ti fina age ai e taha, kua tala age a ia kia Tavita, kua pehe age, Ko e tau loto he tau tagata Isaraela kua mumui atu ai kia Apisaloma.
14 Ti pehe atu a Tavita ke he hana tau fekafekau oti ne fakalataha mo ia i Ierusalema, Tutū a ke fehola a tautolu, ha ko e mena ka nakai eke pihia nakai hao a tautolu mai mua a Apisaloma; kia alumaki a tautolu ke o, neke moua vave mai e ia a tautolu, mo e fakahoko fakamalolo mai e mena kelea kia tautolu, mo e keli ai e ia e maga nai ke he pelu.
15 Ti pehe mai e tau fekafekau he patuiki ke he patuiki, Ko e tau mena oti kua finagalo ki ai ha mautolu a iki ko e patuiki, kitiala, to eke ai e mautolu hau a tau fekafekau.
16 Ti o atu ai e patuiki katoa mo e hana magafaoa oti, kua mumui atu kia ia; ka e toka ai he patuiki e tau fifine toko hogofulu, ko e tau hoana fakahoa, ke leveki e fale.
17 Kua o atu e patuiki mo e motu oti kua mumui atu kia ia; kua nonofo a lautolu ke he mena mamao.
18 Ko e tau fekafekau oti hana ne o age a lautolu ke he hana tapa, katoa mo e tau Kereti oti, mo e tau Peleti oti, mo e tau tagata Kata oti, ko e tau tagata toko ono e teau ne mumui mai kia ia i Kata, ne o age a lautolu ki mua he patuiki.
19 Ti pehe age ai e patuiki kia Itai ko e tagata Kata, Ko e o a koe fakalataha mo mautolu he ha? Liu ā, mo e nofo a koe fakalataha mo e patuiki; ha ko e tagata kehe a koe, mo e tagata paea a koe mai he mena hau ne nofo ai.
20 Ne hau ai a koe neafi, ti eke kia e au ke he aho nai ke o fano a tautolu mo mautolu? Ka ko au kua fano fakahanoa ni au; liu a a koe, kia liliu a mutolu mo e hau a tau matakainaga, kia ha ha ia koe e fakaalofa mo e fakamoli.
21 Ti tali age a Itai ke he patuiki, kua pehe age, Kua moui a Iehova, kua moui foki haku iki ko e patuiki, ko e mena ke ha ha i ai haku iki ko e patuiki, po ke mate po ke moui, to ha i ai ni hāu a fekafekau.
22 Ti pehe age a Tavita kia Itai, Atu a, ke o a tautolu. Ti o atu ai a Itai ko e tagata Kata, mo e hana tau tagata oti, mo e tau tama ikiiki oti ha ha ia ia.
23 Kua tagi ai e motu oti mo e leo lahi, ti o atu ai e motu oti; kua laka atu foki he patuiki e vailele ko Ketarono, mo e motu oti kua o atu a lautolu ke he puhala ke he tutakale.
24 Kitiala, ko Satoka foki mo e tau tagata Levi oti fakalataha mo ia, kua uta e lautolu e puha he maveheaga he Atua; kua tuku hifo e lautolu e puha he Atua, ti hake a Aviata ato oti he o age e motu oti mai he maga.
25 Ti pehe age e patuiki kia Satoka, Kia liuaki atu e koe e puha he Atua ke he maga; kaeke ke ofania au e Iehova, to liuaki mai e ia au, mo e fakakite mai ai a ia kia au, katoa mo e hana haeleaga.
26 Ka ko e mena, kaeke ke pehe mai a ia, Nakai fiafia ai au kia koe; kitiala, ko au hanai, kia eke e ia kia au e mena kua finagalo ki ai a ia.
27 Ti pehe age ai e patuiki kia Satoka ko e ekepoa, Nakai kia ko e tagata kitekite a koe? Liliu atu ā ke he maga mo e monuina; ko mutolu, mo e tau tama tane tokoua ha mua, ko Ahimaasu e tama hāu, mo Ionatana ko e tama a Aviata.
28 Kitiala, to tatali au ke he kelekele tatai ke he tutakale, ato ta mai ai e kupu ia mutolu, ke fakailoa mai ai kia au.
29 Ti liuaki atu ai e Satoka mo Aviata e puha he Atua ki Ierusalema; ti nonofo ai a laua.
30 Kua hake a Tavita ke he mouga ko Olive, kua hake ai a ia mo e tagi, mo e ufiufi ai e ia hana fufuga; kua hake ni a ia mo e nakai afi ai hana tau aloalohui; ko e motu oti foki ha ha ia ia, kua takitaha a lautolu mo e ufiufi ai ha lautolu a tau ulu, kua o hake a lautolu, kua o a lautolu mo e tagi.
31 Ti talahau ai kia Tavita, kua pehe, Kua ha i ai a Aitofele mo e tau tagata fakafualoto ne fakalataha mo Apisaloma. Ti pehe age ai a Tavita, Iehova na e kia ulu moumou e koe e pule a Aitofele.
32 Kua hoko atu a Tavita ke he tapunu mouga, ne fa hufeilo ai ke he Atua, Kitiala, kua feleveia mo ia a Husai ko e tagata Araki, kua hēhē ai hana tapulu, mo e kelekele ha ha i luga hana ulu.
33 Ti pehe age a Tavita kia Husai, Kaeke ke o a taua mo au ti eke a koe mo fakalavelave kia au;
34 Ka ko e mena kaeke ke liu atu a koe ke he maga mo e pehe age a koe kia Apisaloma, Ko e patuiki na e, ko au ko e hau a fekafekau, ne fekafekau fakamua au ke he matua hau, ka ko ainei, to fekafekau ai au kia koe; ti ulu ai e koe maaku e pule a Aitofele.
35 Nakai kia ha ha ia koe ke he mena ia a Satoka mo Aviata, ko e tau ekepoa? ko e tau kupu oti ke logona ai e koe ke he fale he patuiki, ti talahau atu e koe kia Satoka mo Aviata, ko e tau ekepoa.
36 Kitiala, ha ha i ai mo laua e tau tama tane tokoua ha laua, ko Ahimaasu ko e tama a Satoka, mo Ionatana ko e tama a Aviata, ti fakafano mai e mutolu ia laua e tau kupu oti ke logona ai e mutolu.
37 Ti fano ai a Husai ko e kapitiga a Tavita ke he maga; ti hau ai a Apisaloma ki Ierusalema.