2 Samuela 16:1-23
16 KUA mole atu fakatote e tapunu mouga he fano a Tavita, ti kitiala, kua feleveia mo ia a Tipa ko e fekafekau a Mefiposeta, mo e tau asini ua ne fakanofoa, ti fakaheke ki luga ha laua e tau areto ne ua e teau, mo e taha e teau e fuhi vine tavaki, mo e tau fakapotopotoaga fua mati tavaki ne taha e teau, mo e lupo kili manu ne puke ke he uaina.
2 Ti pehe age e patuiki kia Tipa, Ko e heigoa kia e tau mena nai hāu? Ti pehe age a Tipa, Ko e tau asini na ke heke ai a magafaoa he patuiki; ka ko e tau areto mo e tau fua mati tavaki ke kai ai e tau fuata, mo e uaina ke inu ai a lautolu kua mategugu ke he tutakale.
3 Ti pehe age e patuiki, Ko e fe kia e tama he hau a iki? Ti pehe age ai a Tipa ke he patuiki, Kitiala, kua nofo a ia i Ierusalema, ha kua pehe a ia, ko e aho nai ke liuaki mai ai he magafaoa a Isaraela kia au e kautu he haku matua.
4 Ti pehe age ai e patuiki kia Tipa, Kitiala, kia eke e koe māu e tau mena oti a Mafiposeta. Ti pehe age a Tipa, kua hufeilo ai au kia koe, kia ofania au e koe haku iki na e, ko e patuiki.
5 Ti hoko atu ai e patuiki ko Tavita ki Pahurima; ti kitiala, kua fina age ai e tagata he magafaoa a Saulo, ko Semi hana higoa, ko e tama a Kera, kua fina age ai a ia mo e kaialu.
6 Ne tauliti aki foki e ia a Tavita e tau maka, katoa mo e tau fekafekau oti he patuiki ko Tavita, ka ko e motu oti, katoa mo e tau tagata malolo oti ha ha he lima matau hana mo e hana lima hema.
7 Kua pehe age a Semi ke he hana kaialu, Fano a, kia fano a a koe ko e tagata lima toto na e, ko e tagata kolokolovao;
8 Kua taui atu e Iehova kia koe e toto oti he magafaoa a Saulo, ne eke ai a koe mo patuiki ke hukui aki a ia; kua tuku atu foki e Iehova e kautu ke he pule a Apisaloma hau a tama; kitiala, kua liuaki atu kia koe hāu a kelea, ha ko e tagata lima toto ni a koe.
9 Ti pehe age ai a Apisai ko e tama a Seruia ke he patuiki, Ko e heigoa e mena ne kaialu mai ai he kuli mate na ke he haku iki ko e patuiki? kia toka e koe au ke fano mo e hio kehe ai e au hana ulu.
10 Ti pehe age e patuiki, Ko e heigoa ha mua kia au, ko mua ko e fanau a Seruia? Kia kaialu ai pihia e ia, ha kua pehe age a Iehova kia ia, Kia kaialu ā e koe kia Tavita; ko hai kia ke pehe age ai, Kua eke pihia he ha e koe?
11 Kua pehe age foki a Tavita kia Apisai mo e hana tau fekafekau oti, Kitiala, ko e tama haku ne fanau e au, kua kumi e ia ke tamate au; ti nakai kia au atu he pihia e tagata he magafaoa a Peniamina na? Kia tokai a ia ke kaialu ai ha kua pihia mai ai a Iehova kia ia.
12 Po ke kitekite mai nakai a Iehova ke he haku a matematekelea, mo e liuaki mai e Iehova kia au e monuina ke totogi aki hana kaialu mai kia au ke he aho nai.
13 Ti o atu ai a Tavita mo e hana tau tagata ke he puhala, kua o foki fakalataha mo lautolu a Semi ke he fahi he mouga, kua fano ai a ia mo e kaialu mo e liti atu e tau maka kia ia, mo e gana atu ai e efuefu kia ia.
14 Ti hohoko atu ai e patuiki mo e motu oti ne fakalataha mo ia, kua mategugu a lautolu, ti okioki ai a lautolu ke he mena ia.
15 Ka ko Apisaloma mo e motu o tagata oti he tau tagata Isaraela kua hohoko a lautolu ki Ierusalema, katoa mo Aitofele fakalataha mo ia.
16 Kua hoko atu foki a Husai ko e tagata Araki ko e kapitiga a Tavita kia Apisaloma; ti pehe atu a Husai kia Apisaloma, Kia moui e patuiki! Kia moui e patuiki!
17 Ti pehe mai a Apisaloma kia Husai, Ko e fakaalofa hau kia hanai ke he kapitiga hau? ko e ha nakai o atu a mua mo e hau a kapitiga?
18 Ti pehe atu a Husai kia Apisaloma, Nakai ni; ha ko ia kua fifili e Iehova, mo e motu nai, mo e tau tagata oti a Isaraela, to ha i ai au mo ia, ti nofo ai au mo ia;
19 Hanai foki, ko hai kia ke fekafekau au ki ai? nakai kia ko e tama hana? tuga ne fekafekau ai au ke he matua hau, to fekafekau pihia ni au kia koe.
20 Ti pehe age a Apisaloma kia Aitofele, Kia fifili a e mutolu, po ke heigoa e mena ke eke ai e tautolu.
21 Ti pehe age a Aitofele kia Apisaloma, Kia fina age a koe ke he tau hoana fakahoa he matua hāu, ne toka e ia ke leveki e fale; ti logona e Isaraela oti, kua vihiatia a koe he hau a matua; ti fakamalolo ai a lautolu oti kua kau mo koe.
22 Ti fofola ai e lautolu e fale ie ma Apisaloma ki luga he tua fale; ti fina age ai a Apisaloma ke he tau hoana fakahoa he hana matua ki mua a Isaraela oti.
23 Ko e pule a Aitofele ne pule ai a ia ke he tau aho ia, kua tuga he huhu ai e taha ke he finagalo he Atua; ne pihia e pule oti a Aitofele ia Tavita katoa mo Apisaloma.