2 Samuela 17:1-29
17 TI pehe age ai a Aitofele kia Apisaloma, Toka e koe au ke fifili e tau tagata hogofulu ma ua e afe, ti matike ai au mo e tutuli a Tavita ke he po nai;
2 Ti hoko atu au kia ia ka kua mategugu mo e nakai fahia a ia; ti fakamatakutaku ai e au a ia; ti fehola ai e motu oti ha ha ia ia, ti keli ai e au e patuiki hokoia.
3 Ti liuaki mai ai e au e motu oti kia koe; ko e tagata kua kumi e koe kua tuga ne liliu oti mai; ti mafola ai e motu oti.
4 Kua tonu ni e kupu ia ke he manatu a Apisaloma, mo e tau manatu he tau patu oti a Isaraela.
5 Ti pehe age a Apisaloma, Kia ui la kia Husai ko e tagata Araki, foki, ke logona ai e tautolu po ke fefe hana kupu.
6 Ti fina age ai a Husai kia Apisaloma, ti tala age a Apisaloma kia ia, kua pehe age, Kua pehe e kupu kua vagahau mai ai e Aitofele; to eke nakai e tautolu e mena hana? ka nakai, ti vagahau mai a a koe.
7 Ti pehe age a Husai kia Apisaloma, Nakai mitaki e pule ne pule ai a Aitofele ke he mena nai.
8 Kua pehe age foki a Husai, Kua iloa e koe hau a matua mo e hana tau tagata, ko e tau toa a lautolu; ti mamahi e tau loto ha lautolu tuga ne urosa ke he vao kua uta kehe ai hana tau punua; ko e matua hau foki ko e tagata tau a ia, nakai mohe a ia fakalataha mo e motu;
9 Kitiala, kua fakamumuli ai a ia ainei ke he taha luo, po ke taha mena; ka hoko ke keli ai e falu ia lautolu ke he kamataaga ti pehe age ai a lautolu kua logona e tala, Kua keli e motu ne mumui age kia Apisaloma;
10 Ko e tagata foki ne malolo, ko e hana loto kua tuga ne loto he leona, to fakalolelole ai a ia, ha kua iloa e Isaraela oti, ko e toa e matua hau, ko e tau tagata malolo foki a lautolu ne fakalataha mo ia.
11 Hanai, ko e haku a manatu hanai, kia fakapotopoto ai kia koe a Isaraela oti ni, ke kamata mai i Tano ke hoko mai ki Peresepa, ke tuga ne oneone he tahi he tokologa; mo e haele atu ni a koe ke tau.
12 Ti hohoko atu a tautolu kia ia ke he taha mena ke moua mai ai a ia, ti hohoko atu a tautolu kia ia, tuga ne to hifo ai e hahau ke he kelekele; ti nakai fakahao e tautolu taha ia lautolu, ko ia mo e tau tagata oti ha ha ia ia.
13 Ka ko e mena kaeke kua hoko a ia ke he taha maga, ti uta ai e Isaraela oti e tau toua ke he maga ia, ti toho ai e tautolu ke he vailele, ato nakai moua ai ke he mena ia taha maka tote.
14 Ti pehe age ai a Apisaloma mo e tau tagata Isaraela oti, Kua mua he mitaki e pule a Husai ko e tagata Araki ke he pule a Aitofele, ha kua finagalo a Iehova ke ulu e pule mitaki a Aitofele, kia fakahoko ai e Iehova e malaia kia Apisaloma.
15 Ti pehe age a Husai kia Satoka mo Aviata ko e tau ekepoa, Kua pehe e pule a Aitofele kia Apisaloma mo e tau patu a Isaraela, ti pehe haku a pule.
16 Ko e hanai, kia fakafano atu fakaave, mo e tala age kia laua; ti o atu ai a laua mo e tala atu kia Tavita, kia pehe age, Aua neke ahogia a koe ke he kelekele tatai ke he tutakale, ka e o atu fakaave, neke mahaikava ai e patuiki, mo e motu oti ha ha ia ia.
17 Ne nonofo a Ionatana mo Ahimaasu i Enerokelu; ti fina age e fekafekau fifine mo e tala age ai ke he patuiki ko Tavita, ha kua nakai maeke ke kitia ai a laua ke he maga.
18 Ka kua kitia a laua he taha fuata, ti talahau atu ai kia Apisaloma; ka e o atu fakaave a laua, mo e o atu a laua ke he fale he tagata i Pahurima, ne ha ha ia ia e vaikeli ke he hana lotopa, ti o hifo ai a laua.
19 Ti uta he fifine e mena ne ufi aki e vaikeli mo e fofola ai ki luga he gutu he vaikeli, ti fofola ai e ia ki luga hana e tau fua saito kua holo; ti nakai iloa he taha e mena ia.
20 Ti hohoko atu e tau fekafekau a Apisaloma ke he fifine ke he fale, ti pehe age a lautolu, Ko e fe kia a Ahimaasu mo Ionatana? Ti pehe age e fifine kia lautolu, Kua o atu tuai a laua ke he fahi atu he vailele. Kua kumi e lautolu a laua ka e nakai moua, ti liliu atu a lautolu ki Ierusalema.
21 Kua o a lautolu, ti hake ai a laua mai he vaikeli; ti o a laua mo e tala age ke he patuiki ko Tavita; ti pehe age a laua kia Tavita, Matike ā, ti o atu fakaave a mutolu ke he fahi atu he vailele, ha kua pehe e pule a Aitofele kia mutolu.
22 Ti mamatike a Tavita mo e motu oti ha ha ia ia, ti o ai a lautolu ke he fahi atu a Ioritana. Kua maama hake e la a pogipogi ti nakai ni toe ha tagata taha kua nakai o atu ke he fahi atu a Ioritana.
23 Kua kitia e Aitofele kua nakai eke hana pule ti fakanofoa ai e ia hana asini, ti matike a ia mo e fano ke he hana fale ke he hana maga, ti kotofa e ia hana tau mena ke he hana magafaoa, ti taupega e ia a ia, ti mate ai a ia, ti tanu e lautolu a ia ke he tukuaga he hana matua.
24 Ti hoko atu ai a Tavita ki Mahanaima; kua o atu foki a Apisaloma ke he fahi atu a Ioritana, ko ia katoa mo e tau tagata Isaraela oti fakalataha mo ia.
25 Ti kotofa e Apisaloma a Amasa ke pule ke he kau ke hukui aki a Ioapo; ko Amasa foki ko e tama a ia he taha tagata ko Iteru hana higoa, ko e tagata Isaraela, ne fina age a ia kia Apikaila ko e tama fifine a Nahasa, ko e matakainaga a Seruia, ko e matua fifine a Ioapo,
26 Ti heapi ai a Isaraela mo Apisaloma ke he motu ko Kiliata.
27 Kua hoko atu a Tavita ki Mahanaima, ti uta ai e Sopi ko e tama a Nahasa (mai Rapa, ko e maga he fanau a Amoni,) mo Makiro ko e tama a Amueli mai Lotapara, mo Pasili ko e tagata Kiliata mai Rokelima,
28 Ko e tau moheaga, mo e tau kapiniu, mo e tau kapiniu kelekele, mo e tau fua saito, mo e tau fua karite, mo e falaoa, mo e tau fua saito tunu, mo e tau fua pini, mo e atasemo, mo e tau fua karite tunu,
29 Mo e meli, mo e puke huhu tuli, mo e tau mamoe, mo e tau puke huhu tuli mao he tau povi, ne ta mai ai ma Tavita mo e motu ha ha ia ia, ke kai ai e lautolu; ha kua pehe age a lautolu, Kua fia kai e motu, mo e nakai fahia, mo e fia inu ke he tutakale.