2 Samuela 18:1-33
18 TI totou e Tavita e tau tagata ha ha ia ia, ti kotofa ai e ia e tau takitaki he tau tokoafe, mo e tau takitaki he tau tokoteau ke pule kia lautolu.
2 Ti fakafano atu e Tavita e motu ke he tau veveheaga ne tolu, ko e taha veveheaga ke pule ai a Ioapo, ko e veveheaga ne uaaki ke pule ai a Apisai ko e tama a Seruia, mo e veveheaga ke tolu aki ke pule ai a Itai ko e tagata Kata; ti pehe age e patuiki ke he motu, Ko au foki, to o ni a tautolu fakalataha mo mutolu.
3 Ka e pehe age ai e tau tagata, nakai ni haele atu a koe, ha ko e mena kaeke ke fehola a mautolu, nakai manatu mai e lautolu kia mautolu; kaeke foki ke mamate e maga ne veveheua aki a mautolu, nakai ni manatu mai e lautolu kia mautolu; hanai kua tatai a koe mo e tokohogofulu e afe ia mautolu; hanai, mitaki ke lagomatai mai e koe kia mautolu mai he maga.
4 Ti pehe age e patuiki kia lautolu, Ko e mena ne mitaki kia mutolu to eke ai e au; ti tu ai e patuiki ke he tapa he gutuhala, ka kua o atu e motu oti ke he tau kau ne taki tokoteau mo e taki tokoafe.
5 Ti poaki atu e patuiki kia Ioapo, mo Apisai, mo Itai, kua pehe atu, Kia totonu atu a mutolu ke he fuata ko Apisaloma ha ko au. Kua logona he motu oti, he poaki atu ai e patuiki ke he tau takitaki kau oti e kupu ia kia Apisaloma.
6 Kua o atu e motu ke he vao ke feleveia mo Isaraela; ti tau ai a lautolu ke he vao motua a Efaraimo.
7 Ti keli ai he tau fekafekau a Tavita ke he mena ia e motu ko Isaraela; ne eke ai ke he aho ia ke he mena ia e keliaga lahi, ko e uafulu ni e afe e tagata.
8 Ti tau fano ai e kau ke he fuga kelekele oti ke he mena ia; ti mua he tokologa he motu ne mamate ai ke he vao kia lautolu ne mamate ke he pelu ke he aho ia.
9 Ti feleveia ai a Apisaloma mo e tau fekafekau a Tavita; ne heke a Apisaloma he falata, ti fano e falata ki lalo he tapeneto lālā loga, ti apitia ai hana ulu ke he tapeneto, kua toka ai a ia ke he vaha he lagi mo e lalolagi, ka e fano kehe e falata ne heke a ia.
10 Kua kitia ai he taha tagata ti tala age a ia kia Ioapo, kua pehe age, Kitiala, ne kitia e au a Apisaloma ne tautau ai ke he tapeneto.
11 Ti pehe age a Ioapo ke he tagata ne tala age e mena ia kia ia, Kitiala, ne kitia e koe a ia, ko e heigoa e mena nakai keli ai e koe a ia, ke to hifo a ia ke he kelekele? ane mai kua eke pihia e koe, po kua ta atu e au kia koe hogofulu e tupe ario, mo e taha e pipi.
12 Ti pehe age e tagata kia Ioapo, Pete ni he fafati mai e tau tupe ario ne taha e afe ke he lima haku, nakai fakaolo atu e au haku lima ke he tama he patuiki; ha ko e mena poaki atu he patuiki kia koe mo Apisai mo Itai, ti logona ai e mautolu ne pehe atu, A mutolu neke pipiki atu e taha ke he fuata ko Apisaloma.
13 Ane mai kua eke pihia e au po kua fakavai e au a au; ha kua nakai galo ai ha mena taha ke he patuiki; ko koe foki po kua hokotaki e koe au kia ia.
14 Ti pehe age a Ioapo nakai maeke kia au ke tutu ai a taua mo koe pehenai. Ti uta ai e ia tolu e tao ke he hana lima, ti hoka ai e ia ke he manava a Apisaloma ka kua moui agaia a ia ki loto he tapeneto.
15 Ti agaagai ai e tau fuata tokohogofulu, ko e tau hoa a Ioapo, ti ta e lautolu a Apisaloma kua tamate e lautolu a ia.
16 Ti ulo e Ioapo e pu ti liliu mai ai e motu he tutuli a Isaraela; ha kua taofi e Ioapo e motu.
17 Ti uta e lautolu a Apisaloma, mo e liti ai a ia ke he luo lahi ke he vao; ti fakapotopoto ai e lautolu e tau maka ki luga hana, ko e pepe maka lahi mahaki; ka ko Isaraela oti ne takitokotaha mo e hola ke he hana fale ie.
18 Ne uta e Apisaloma, ka kua moui a ia, e fakamailoga, mo e fakatu ai ke he pahua he patuiki, ha kua pehe a ia, Nakai fai tama tane au ke ui aki haku higoa, ti ui ai e ia hana higoa ke he fakamailoga ia, ti fakahigoa ai e mena ia, Ko e fakamailoga a Apisaloma; kua hoko ni ke he aho nai.
19 Ti pehe age a Ahimaasu ko e tama a Satoka, Kia toka e koe au ke poi, mo e tala age ke he patuiki, kua laveaki e Iehova a ia mai he lima ha lautolu kua fai fi kia ia.
20 Ka e pehe age a Ioapo kia ia, Nakai uta e koe ke he aho nai, ka hoko ke he taha aho to uta ai e koe e ogo, ka ko e aho nai nakai uta ogo a koe, ha kua mate e tama he patuiki.
21 Ti pehe age a Ioapo ke he tagata Kusa, Kia fano a a koe, ti tala age e koe ke he patuiki e mena ne kitia e koe. Ti fakaveli fakafohifo ai e tagata Kusa kia Ioapo, ti poi ai a ia.
22 Ti pehe age foki a Ahimaasu ko e tama a Satoka kia Ioapo, Kia tuku mai e koe kia au; ke poi atu foki au ke mui atu ke he tagata Kusa. Ti pehe age a Ioapo, Haku tama na e, ke poi a koe he ha ha kua nakai moua e koe ha tala?
23 Ti pehe age a ia, Kia tuku mai ai ni ke poi au. Ti pehe age a ia, Ati poi a? Ti poi ai a Ahimaasu ke he puhala he kelekele tatai, ti mua atu a ia ke he tagata Kusa.
24 Ne nofo a Tavita ke he vaha he na gutuhala ua; ka kua fano e tagata toko ki luga he gutuhala ki luga he kaupa, ne kitekite e ia ti kitia atu ai e ia, kitiala, ko e tagata kua poi tokotaha mai.
25 Ti ui age e toko mo e tala age ai ke he patuiki. Ti pehe age e patuiki, Kaeke kua tokotaha a ia, kua fai ogo a ia. Kua poi ai a ia, ti fakatata mai ai a ia.
26 Ti kitia ai he toko ko e taha tagata foki kua poi mai; ti ui age he toko ke he leoleo he gutuhala kua pehe age, Kitiala, ko e taha tagata foki kua poi mai tokotaha. Ti pehe age e patuiki, Ko e tagata kua ta mai e ogo foki hanā.
27 Ti pehe age ai e toko, Kua kitia e au e tagata ne mua mai kua poi a ia, tuga ne fa poi a Ahimaasu ko e tama a Satoka. Ti pehe age e patuiki, Ko e tagata mitaki a ia, kua ta mai ai e ia e ogo melie.
28 Ti ui mai ai e Ahimaasu, kua pehe mai ke he patuiki, Kia monuina, ti fakaveli fakafohifo ai a ia ke he kelekele ki mua he patuiki; kua pehe age, Kia fakaaue atu kia Iehova hau Atua, ko ia kua tuku mai e tau tagata ne nikiti e tau lima ha lautolu ke tau ke he haku iki ko e patuiki.
29 Ti pehe atu e patuiki, Kua monuina nakai e fuata ko Apisaloma? Ti pehe mai ai a Ahimaasu, Ne kitia e au e go lahi he tau tagata he fakafano mai e Ioapo e fekafekau he patuiki ko au ni ko e hau a fekafekau, ka e nakai iloa e au po ke heigoa.
30 Ti pehe atu e patuiki, Afe a a koe, mo e tu kehe; ti afe ai a ia mo e tu kehe.
31 Ti kitiala, kua hau ai e tagata Kusa; ti pehe mai e tagata Kusa, Haku iki na e, ko e patuiki, ko e ogo melie! Ha kua laveaki e Iehova a koe ke he aho nai mai he tau lima ha lautolu oti ne tutu mai ke tau kia koe.
32 Ti pehe atu e patuiki ke he tagata Kusa, Kua monuina nakai e fuata ko Apisaloma? Ti pehe mai e tagata Kusa, Kia tuga ne fuata ia a lautolu kua fai fi ke he haku iki ko e patuiki, katoa mo lautolu oti kana kua tutu mai ke ekefakakelea kia koe.
33 Ti fakaatukehe ai e finagalo he patuiki, ti hake a ia ke he poko ki luga he gutuhala, ti tagi ai a ia, kua pehe a ia he hake ai a ia, Haku tama Apisaloma na e, haku tama na e, haku tama Apisaloma na e! kua fia mate au ke hukui aki a koe Apisaloma haku tama na e, haku tama na e!