2 Samuela 19:1-43
19 TI talahau atu ai kia Ioapo, Kitiala, kua tagi mo e manu ai e patuiki ha ko Apisaloma.
2 Ti eke ai e kautu he kau ke he aho ia mo mena ke mānu ai e motu oti, ha kua logona ai he motu ke he aho ia kua mamahi e patuiki ha ko e tama hana.
3 Ne o age fufu e motu ke he maga ke he aho ia, tuga ne o fufu e tau tagata kua ma he fehola a lautolu he tau.
4 Kua ufiufi e patuiki hana fofoga; ti tagi ai e patuiki mo e leo lahi, Haku tama Apisaloma na e! Apisaloma haku tama na e, haku tama na e!
5 Ti hu atu ai a Ioapo ke he patuiki ke he fale, ti pehe atu a ia, Kua fakama e koe ke he aho nai e tau fekafekau oti hau, kua laveaki a koe he aho nai, mo e hau a tau tama tane, mo e hau a tau tama fifine, mo e hau a tau hoana, mo e hau a tau hoana fakahoa,
6 Ha kua fakaalofa a koe kia lautolu kua fakavihia a koe, mo e fakavihia e koe a lautolu kua fakaalofa kia koe; ha kua fakakite mai e koe ke he aho nai, kua nakai fai manatu a koe ke he tau iki mo e tau fekafekau; ha kua kitia e au ke he aho nai, ane moui a Apisaloma, ka e mamate a mautolu oti he aho nai, po kua mitaki ia kia koe.
7 Hanai, kia matike a a koe, mo e haele atu, mo e fakamafana e koe hau a tau fekafekau; ha kua omonuo e au kia Iehova, kaeke ke nakai haele atu a koe, nakai ni nofo ha tagata taha mo koe ke he po a magaaho; ti mua he kelea e mena ia kia koe he tau mena kelea oti kua hoko kia koe tali mai hāu a vaha fuata ke hoko mai ke he aho nai.
8 Ti matike ai e patuiki mo e nofo ke he gutuhala; ti tala age e lautolu ke he motu oti, kua pehe age, Kitiala, kua nofo e patuiki ke he gutuhala; ti o mai ai e motu oti ki mua he patuiki. Ka ko Isaraela kua takitaha mo e hola ke he hana fale ie.
9 Ne ha i ai ke he tau tagata oti e taufetoko ke he tau magafaoa oti a Isaraela, kua pehe, Ne laveaki he patuiki a tautolu, mai he tau lima ha lautolu ne fai fi kia tautolu, ne laveaki mai foki e ia a tautolu he tau lima he tau tagata Filisitia, ka ko ainei kua hola a ia he motu ha ko Apisaloma.
10 Ko Apisaloma foki ne fakauku ai e tautolu ke pule kia tautolu, kua mate a ia ke he tau; hanai, ko e ha nakai vagahau ai a mutolu ke liuaki mai ai e patuiki?
11 Ti fakafano atu ai he patuiki ko Tavita kia Satoka mo Aviata ko e tau ekepoa, kua pehe atu, Kia vagahau atu a mua ke he tau patu a Iuta, kia pehe atu, Ko e ha ne fakamui ai a mutolu ke liuaki mai ai e patuiki ke he hana fale? ha kua hoko ni e kupu a Isaraela oti ke he patuiki ke uta ai a ia ke he hana fale.
12 Ko e tau matakainaga haku a mutolu, ko e haku tau huimotua mo e haku kakano a mutolu; ko e ha ne fakamui a mutolu ke liuaki mai ai e patuiki.
13 Kia pehe age foki a mua kia Amasa, Nakai kia ko e haku tau huimotua mo e haku kakano a koe? Kia eke pihia he Atua kia au, mo e lafilafi mai pihia, kaeke ke nakai eke e au a koe mo takitaki kau ki mua haku ko he tau aho oti ke hukui aki a Ioapo.
14 Ti fakahagao mai e ia e tau loto he tau tagata Iuta oti tuga ne tagata tokotaha; ti fakafano mai e lautolu ke he patuiki, kua pehe mai, Kia liu mai a koe mo e hau a tau fekafekau oti.
15 Ti liu mai e patuiki, kua hoko ki Ioritana; ti o mai ai Iuta ki Kilikala ke fonofono e patuiki, ke takitaki ai e patuiki mai he fahi atu a Ioritana.
16 Ti alumaki a Semi ko e tama a Kera, ko e tagata Peniamina, ne nofo i Pahurima, ti hifo a ia fakalataha mo e tau tagata Iuta ke fonofono a Tavita ko e patuiki,
17 Mo e tau tagata taha e afe ne fakalataha mo ia ia Peniamina; katoa mo Sipa ko e fekafekau he magafaoa a Saulo, mo e hana tau tama tane tokohogofulu ma lima, mo e hana tau fekafekau ne tokouafulu fakalataha mo ia; ti laka atu e lautolu a Ioritana ki mua he patuiki.
18 Ti fina age e vaka ke fetuku ai e magafaoa he patuiki, mo e eke e tau mena kua finagalo ki ai a ia, ti fakaveli ai a Semi ko e tama a Kera ki mua he patuiki, ka kua fina atu ai a ia ke he fahi atu a Ioritana.
19 Ti pehe age a ia ke he patuiki, Aua neke taui mai kia au he iki haku haku a hala; aua neke manatu foki a koe ke he mahani kelea he hau a fekafekau ke he aho ne haele mai ai haku a iki ko e patuiki i Ierusalema, ti aua neke toka loto ai he patuiki.
20 Ha kua iloa he fekafekau hau kua hala tuai au; ti kitiala, kua hau ai au, kua mua mai ni au he magafaoa oti a Iosefa, ke hifo mai ke feleveia ai mo e iki haku ko e patuiki.
21 Ti tali age ai e Apisai ko e tama a Seruia, kua pehe age, Nakai kia mate a Semi he mena ia? he kaialu e ia kia ia ne fakauku e Iehova.
22 Ti pehe age a Tavita, Ko e heigoa kia ha mua kia au, ko mua ko e fanau a Seruia? ha kua eke ni a mua mo fakalavelave kia au ke he aho nai; ke keli kia taha he aho nai ia Isaraela? Ha ko e mena nakai kia iloa e au ko au ni ko e patuiki a Isaraela ko he aho nai?
23 Ti pehe age ai e patuiki kia Semi, Nakai ni mate a koe; ti omonuo ai e patuiki kia ia.
24 Kua hifo foki a Mefiposeta ko e tama a Saulo ke feleveia mo e patuiki; kua nakai taute e ia hana tau hui, ti nakai taute e ia hana hafe, ti nakai unu ai hana tau tapulu, tali he aho ne fina atu ai e patuiki ke hoko mai ke he aho ne hau ai a ia mo e monuina.
25 Kua fina atu a ia ki Ierusalema ke feleveia ai mo e patuiki; ti pehe atu e patuiki kia ia, Mefiposeta na e, ko e heigoa e mena nakai o ai a taua mo au?
26 Ti pehe mai a ia, Haku iki na e ko e patuiki, ne fakavai he fekafekau haku au; ha kua pehe age hau a fekafekau, to fakanofoa e au e asini maku, ke heke ai au, ke o atu a maua mo e patuiki, ha kua kulikuli hau a fekafekau.
27 Ti fatipiko ai e ia ke he hau a fekafekau ke he iki haku ko e patuiki; ka e tuga ne agelu he Atua haku a iki ko e patuiki; hanai, kia eke a e koe e mena kua finagalo a koe ki ai;
28 Ha ko e mena nakai ha i ai taha ke he magafaoa he haku a matua, ha ko e tau tagata kua lata ke mamate a mautolu oti ki mua haku a iki ko e patuiki, ka e kotofa e koe hau a fekafekau ke fakalataha mo lautolu kua kai mena ke he laulau ni hau; ti heigoa kia e mena haku kua toe kua lata ke tagi atu foki au ke he patuiki?
29 Ti pehe atu e patuiki kia ia, Kua vagahau mai foki he ha a koe ke he tau mena hau? nakai kia pehe atu au, ko koe mo Tipa, kia vevehe la e mua e fonua.
30 Ti pehe mai a Mefiposeta ke he patuiki, Kia uta ai pihia e ia e tau mena oti māna; ha kua hoko mai ai haku iki ko e patuiki mo e monuina ke he hana fale.
31 Ko Pasili foki ko e tagata Kiliata, ne hifo ai a ia i Rokeli; ti o a lautolu mo e patuiki ke he fahi atu a Ioritana, kia takitaki atu ai e ia a ia ke he fahi atu a Ioritana.
32 Ne motua lahi ni a Pasili, ne valugofulu hana tau tau; ko ia ni ne fagai e patuiki he nofo ai a ia i Mahanaima, ha ko e iki lahi ni a ia.
33 Ti pehe atu e patuiki kia Pasili, Kia o atu a taua mo au, ti nonofo fakalataha a taua mo au i Ierusalema.
34 Ka e pehe mai a Pasili ke he patuiki, Ne fiha e tau aho he tau tau he haku a moui kua toe, ke hake ai a taua mo koe ko e patuiki ki Ierusalema?
35 Ko e valugofulu e tau tau haku ke he aho nai; kua iloa kia e au e mitaki mo e kelea? kua logona kia he fekafekau hau e tau mena kua kai, mo e tau mena kua inu? ke logona foki kia e au e tau leo he tau tane kua lologo, mo e tau fifine kua lologo? Ke fakalavelave foki he ha hau a fekafekau ke he iki haku ko e patuiki?
36 Ke o atu fakatote ke he fahi atu a Ioritana e fekafekau hau mo e patuiki; ti taui mai he ha he patuiki ke he taui lahi na?
37 Kia toka e koe hau a fekafekau ke liu, kia mate ai au ke he haku maga, tata age ke he tukuaga he haku a matua tane mo e haku a matua fifine. Ka e kitiala, ko e fekafekau hau ko Kimehama; kia o atu a ia mo e haku iki ko e patuiki, ti eke e koe māna e mena kua finagalo a koe ki ai.
38 Ti pehe atu ai e patuiki, To o atu a maua mo Kimehama; ti eke ai e au māna e mena kua loto a koe ki ai; ko e tau mena oti foki ke tala mai e koe kia au to eke ai e au māu.
39 Ti o atu ai e motu oti ke he fahi atu a Ioritana, ti fina atu ai e patuiki, ti taufigita ai e patuiki mo Pasili, mo e fakamonuina atu e ia kia ia; ti liu atu a ia ke he hana motu.
40 Ti fina atu ai e patuiki ki Kilikala, ko Kimehama foki ne o a laua mo ia. Ko e motu oti a Iuta ne o a lautolu mo e patuiki, katoa mo e maga ne veveheua aki e motu a Isaraela.
41 Ti kitiala, ko e tau tagata Isaraela oti, kua o age a lautolu ke he patuiki, ti pehe age a lautolu ke he patuiki, Ko e heigoa e mena ne kaiha ai a koe he tau matakainaga ha mautolu, ko e tau tagata Iuta, ti ta mai ai e lautolu e patuiki mo e hana magafaoa he fahi atu a Ioritana, katoa mo e tau tagata oti a Tavita fakalataha mo ia.
42 Ti tali age ai e tau tagata Iuta oti ke he tau tagata Isaraela, Ha kua magafaoa a mautolu mo e patuiki, ti ita he ha a mutolu he mena na? Kua kai kia e mautolu e tau mena he patuiki? po kua ta mai kia e ia ha mena fakaalofa kia mautolu;
43 Ti tali age ai e tau tagata Isaraela ke he tau tagata Iuta, kua pehe age, Ne hogofulu e magafaoa ha mautolu ke he patuiki; ti lahi foki ha mautolu a mena ia Tavita ka e tote ha mutolu, ti fakavihia mai he ha a mutolu kia mautolu, mo e nakai fai kupu mai fakamua kia au, ke liuaki mai ai haku a patuiki? Ti mua he mamafa he tau kupu he tau tagata Iuta ke he tau kupu he tau tagata Isaraela.