2 Samuela 2:1-32
2 KUA mole atu e tau mena na ti huhu atu a Tavita kia Iehova, kua pehe atu, To hake nakai au ke he taha maga a Iuta? Ti pehe mai a Iehova kia ia, Kia hake ā Ti pehe atu a Tavita, Ko e maga fe ke hake au ki ai? Ti pehe mai a ia, Ko Heperona.
2 Ti o hake a Tavita ki ai, ko ia katoa mo e hana tau faoa fifine tokoua, ko Ahinoama ko e fifine Isereelu, mo Apikaila ko e hoana a Napalu ko e tagata Karamelu.
3 Ko e hana tau tagata foki ne ha ia ia, ne o hake a lautolu mo Tavita, ne takitaha e tagata mo e hana magafaoa ti nonofo a lautolu ke he tau maga i Heperona.
4 Kua o age e tau tagata Iuta, ti fakauku ai e lautolu a Tavita ke he mena ia ke eke mo patuiki he magafaoa a Iuta. Kua talahau mai foki e lautolu kia Tavita, kua pehe mai, Ko e tau tagata Iapesa-Kiliata ne tanu e lautolu a Saulo.
5 Ti fakafano atu e Tavita e tau fekau ke he tau tagata Iapesa-Kiliata, kua pehe atu kia lautolu, Kia monuina a mutolu ia Iehova, he mahani mitaki pihia a mutolu ke he iki ha mutolu ko Saulo, he tanu e mutolu a ia.
6 Ko e hanai, kia totonu mai mo e fakamoli mai a Iehova kia mutolu; ko au foki, to taui atu e au e tau mena mitaki nai, ha kua eke e mutolu e tau mena na.
7 Hanai, kia malolo ai ha mutolu a tau lima, ti eke a a mutolu mo tau tagata toa; ha kua matulei ha mutolu a iki ko Saulo; ka kua fakauku he magafaoa a Iuta au ke eke au mo patuiki ha lautolu.
8 Ka ko Apineru ko e tama a Neru ko e takitaki kau ha ha ia Saulo, kua uta e ia a Isoposeta ko e tama a Saulo, ti o atu a laua mo ia ki Mahanaima.
9 Ti eke e ia a ia mo patuiki a Kiliata, mo e tau tagata Asurī, mo Isereelu, mo Efaraimo, mo Peniamina, katoa mo Isaraela oti ni.
10 Ne fagofulu e tau tau a Isoposeta ko e tama a Saulo he eke a ia mo patuiki a Isaraela, ti ua e tau ne pule ai a ia; ka ko e magafaoa a Iuta ne mumui atu a lautolu kia Tavita.
11 Ko e katoa he tau aho ne eke ai a Tavita mo patuiki ke he magafaoa a Iuta i Heperona, ko e fitu ni e tau ti ono e mahina.
12 Kua o atu a Apineru ko e tama a Neru, mo e tau fekafekau a Isoposeta ko e tama a Saulo, i Mahanaima ki Kipeona.
13 Kua o atu foki a Ioapo ko e tama a Seruia, mo e tau fekafekau a Tavita, ti feleveia ai a lautolu ke he vai namo i Kipeona; ti nonofo ai a lautolu, ko lautolu nai ke he taha fahi he vai namo, ka ko lautolu na ke he taha fahi he vai namo.
14 Ti pehe age a Apineru kia Ioapo, Kia mamatike a e tau fuata ke takalo ki mua ha tautolu; ti pehe age a Ioapo, Kia mamatike a a lautolu.
15 Ti mamatike, mo e o atu ai e tokohogofulu ma ua ka totou, he tau tagata Peniamina, ko e tau fekafekau a Isoposeta ko e tama a Saulo; mo e tokohogofulu ma ua he tau fekafekau a Tavita.
16 Ti fakatau toto e lautolu ha lautolu a tau ulu, ti fakatau hoka ai e lautolu ha lautolu a tau kahokaho ke he tau pelu ha lautolu; ti mamate fakalataha ai a lautolu. Ti ui ai e mena ia, Ko e fonua he tau titipi matila, ha ha i Kipeona.
17 Ti lahi mahaki ni e tau ke he aho ia; ti mahala ai a Apineru mo e tau tagata Isaraela ki mua he tau fekafekau a Tavita.
18 Ha i ai e tau tama tokotolu a Seruia, ko Ioapo, mo Apisai, mo Asaelu; ne māmā e tau hui a Asaelu tuga ne sevi he vao.
19 Kua tutuli e Asaelu a Apineru, ti nakai afe a ia ke he fahi matau po ke fahi hema he mui atu a ia kia Apineru.
20 Ti haga ki tua a Apineru, ti pehe age a ia, Ko koe kia ma Asaelu na e? Ti pehe age a ia, Ko au hanai.
21 Ti pehe age a Apineru kia ia, Kia afe a koe ke he fahi matau po ke fahi hema, ti tapaki e koe taha fuata, mo e uta e koe hana tau kanavaakau māu. Ka e nakai mafai a Asaelu ke fano kehe he mui atu kia ia.
22 Ti liu pehe age a Apineru kia Asaelu, Fano kehe a a koe neke mui mai a koe kia au; ke keli e au a koe he ha? ti maeke fefe ke fekiteaki a maua mo e matakainaga hau ko Ioapo?
23 Ka e nakai mahalo a ia ke fano kehe; ti hoka ai e Apineru a ia ke he mui tao ke he manava ti ati ai e tao ke he hana tua; ti veli ai a ia, ti mate a ia ke he mena ia ni; ko lautolu oti kua hohoko ke he mena ne veli ai a Asaelu mo e mate ai, kua tutu ai a lautolu.
24 Ka e tutuli e Ioapo mo Apisai kia Apineru; kua to e la he hohoko atu a lautolu ke he mouga ko Ama, ha ha i mua a Kia ke he puhala ke he tutakale a Kipeona.
25 Ti fakapotopoto atu e fanau a Peniamina kia Apineru, kua eke a lautolu mo kau taha; ti tutu ai a lautolu ke he tapunu he taha mouga.
26 Ti ui age a Apineru kia Ioapo, kua pehe age, to kai ai fakaoti kia he pelu? Nakai kia iloa e koe ko e mena kona ni ke he fakahikuaga? To pehe age a fe a koe ke he motu ke liliu ke aua neke mumui atu ke he tau matakainaga ha lautolu?
27 Ti pehe age a Ioapo, Kua moui e Atua, ane nakai vagahau mai a koe, po kua o hake ai e motu takitaha a pogipogi ti nakai mumui atu a lautolu ke he tau matakainaga ha lautolu.
28 Ti ulo ai e Ioapo e pu, ti tutu ai e motu oti, nakai liu tutuli e lautolu a Isaraela, ti nakai tau foki a lautolu.
29 Ti o ai a Apineru mo e hana tau tagata ke he kelekele tatai ke he po oti ti ahogia a lautolu; kua o atu a lautolu ke he fahi atu a Ioritana, ti o age a lautolu i Pitirona oti, ti hohoko atu ai a lautolu ki Mahanaima.
30 Ka kua liu mai a Ioapo he tutuli atu kia Apineru, ti fakapotopoto ai e ia e motu oti; ko e tau fekafekau a Tavita nakai ha ha i ai, ko e tokohogofulu ma hiva e tagata, katoa mo Asaelu.
31 Ka ko e tau fekafekau a Tavita ne keli e lautolu e tau tagata Peniamina mo e tau tagata a Apineru toko tolu e teau ti onogofulu e tagata ti mamate ai.
32 Kua uta e lautolu a Asaelu, mo e tanu e lautolu a ia ke he tukuaga he hana matua tane i Petelehema; ti o ai a Ioapo mo e hana tau tagata ke he po katoa ti ahogia a lautolu i Heperona.