2 Samuela 20:1-26
20 NE ha i ai ke he mena ia e tagata matahavala, ko Sihipa hana higoa, ko e tama a Pikeri, ko e tagata Peniamina, kua ulo e ia e pu, mo e pehe age, Nakai pule a Tavita kia mautolu; ti nakai fai tufaaga a mautolu ke he tama a Iese; Isaraela na e, kia takitokotaha a mutolu mo e fano ke he hana fale ie.
2 Ti o hake ai e tau tagata Isaraela oti ia Tavita, ti mumui age a lautolu kia Sihipa ko e tama a Pikeri; ka ko e tau tagata Iuta ne pipiki atu a lautolu ke he patuiki ha lautolu ke kamata mai i Ioritana ke hoko atu ki Ierusalema.
3 Ti hu atu a Tavita ke he hana fale i Ierusalema; ti uta he patuiki e tau hoana fakahoa ne tokohogofulu, ne toka ai e ia ke leveki e fale, ti tuku e ia a lautolu ke he fale ke leveki ai, mo e fagai ai e ia a lautolu, ka e nakai fina age a ia kia lautolu; ti puipui ai a lautolu, kua hoko ke he aho ne mamate ai a lautolu, kua nonofo takape ai.
4 Ti pehe age e patuiki kia Amasa, Kia fakapotopoto mai a e koe e tau tagata Iuta kia au ke he aho tolu, ti hau ai a koe ki hinai.
5 Ti fano a Amasa ke fakapotopoto ai a Iuta, ka e tolonaki a ia e tau aho ne kotofa kia ia.
6 Ti pehe age a Tavita kia Apisai, To mua e kelea ainei ke eke ai e Sihipa ko e tama a Pikeri kia tautolu, ke he kelea ne eke e Apisaloma; kia o a a mutolu, ko koe mo e tau fekafekau he hau a iki, ti tutuli e mutolu a ia, neke moua e ia e tau maga ke nofo taue ai a ia, ti hola kehe a ia ia tautolu.
7 Ti mumui age ai kia ia e tau tagata a Ioapo, mo e kau he tau Kereti, mo e kau he tau Peleti, mo e tau tagata malolo oti ni; ti o age a lautolu i Ierusalema ke tutuli a Sihipa ko e tama a Pikeri.
8 Ha ha i ai a lautolu ke he maka lahi ha ha i Kipeona, ti hau ai a Amasa ki mua ha lautolu Ne pipi e tapulu loa a Ioapo, ti pipi foki e ia ki ai hana pelu, kua fakamau ai ke ha hana tokupu ke he hana tokaaga pelu; kua fina age a ia ti to ai e pelu.
9 Ti pehe age a Ioapo kia Amasa, Haku matakainaga na e, kua malolo nakai a koe? Ti toto atu ai e Ioapo e hafe a Amasa ke he hana lima matau ke taufigita a laua mo ia.
10 Ka e nakai manatu e Amasa ke he pelu ha ha he lima a Ioapo; ti hoka ai e ia a ia ke he manava, ti liligi ai e ia hana gakau ke he kelekele, ti nakai hoka laga ua e ia a ia; ti mate ai a ia. Ti tutuli ai e Ioapo mo e hana matakainaga ko Apisai a Sihipa ko e tama a Pikeri.
11 Ti tu ai ke he tapa hana taha tagata he tau fuata a Ioapo, ti pehe age a ia, Ko hai kua fiafia kia Ioapo, ko hai foki kua kau mo Tavita, kia mui age a ia kia Ioapo.
12 Kua taveli ai a Amasa ke he toto ke he loto puhala tu; kua kitia he tagata kua tutuulu ai e motu oti, ti uta kehe ai e ia a Amasa he puhala tu ke he vao, mo e liti e tapulu ki luga hana, he kitia e ia kua tutuulu a lautolu oti he hohoko a lautolu ki ai.
13 Kua oti he uta kehe a ia mai he puhala tu ti o atu ai e motu oti, kua mumui age kia Ioapo he tutuli a Sihipa ko e tama a Pikeri.
14 Ti fina age ai a ia ke he tau magafaoa oti a Isaraela kua hoko ki Apela ko Petemaaka foki mo e tau tagata a Peiri oti ni; kua fakapotopoto foki a lautolu mo e mumui age kia ia.
15 Ti o age a lautolu mo e pa takai a ia i Apela Petemaaka; ti aku fakatumutumu e lautolu e kelekele tata age ke he maga, kua tu ai ke he fahi he luo; ko e motu oti foki ha ha ia Ioapo ne keli atu e lautolu ke he kaupa ke ulu moumou ai.
16 Ti ui age ai e taha fifine pulotu mai loto he maga, Fanogonogo mai, kia fanogonogo mai a a mutolu; kia tala age e mutolu kia Ioapo ke fakatata mai a ia ki hinai, ke vagahau ai a maua mo ia.
17 Ti fakatata ai a ia kia ia, ti pehe age e fifine, Ko Ioapo kia a koe? Ti tali age ai a ia, Ko au hanai. Ti pehe age a ia kia ia, Kia fanogonogo mai a a koe ke he tau kupu he hau a fekafekau fifine. Ti pehe age a ia, Kua fanogonogo atu au.
18 Ti tala age ai a ia, kua pehe age, Ne vagahau ai a lautolu i tuai, pehe, To huhu ai e lautolu i Apela; ti toka ai pihia e lautolu.
19 Ko au nai ko e taha ia kua nofo mo e mafola mo e fakamoli i Isaraela; kua kumi e koe ke tamate e maga mo e matua fifine ia Isaraela; kua fakaoti e koe he ha e tufaaga a Iehova?
20 Ti tali age e Ioapo, kua pehe age, Kia mamao e mena ia, kia mamao ni ia au ke fakaoti ai po ke moumou.
21 Nakai pihia e mena, ka ko e tagata nai he mouga a Efaraimo, ko Sihipa hana higoa ko e tama a Pikeri, kua fakafualoto a ia ke he patuiki ko Tavita; kia ta mai e mutolu a ia tokotaha ni, ti fano kehe ai au he maga. Ti pehe age e fifine kia Ioapo, Kitiala, ko e liti atu ne fai hana ulu kia koe ki tua he pa.
22 Ti fina atu ai e fifine mo e hana pulotu ke he tau tagata oti he maga; ti hio ai e lautolu e lulu a Sihipa ko e tama a Pikeri, mo e liti age kia Ioapo; ti ulo e ia e pu ti mavehevehe ai a lautolu mai he maga, kua takitaha mo e fano ke he hana fale ie, ka e liu atu a Ioapo ki Ierusalema ke he patuiki.
23 Ne pule a Ioapo ke he kau oti a Isaraela, ka ko Penaia ko e tama a Iehoiata ne pule a ia ke he kau he tau Kereti mo e kau he tau Peleti.
24 Ko Aturama ne pule a ia ke he tau poa, mo Iehosafata ko e tama a Ahiluta, ko e fakamau kupu a ia;
25 Ko Siva ko e tohikupu a ia; ko Satoka mo Aviata ko e tau ekepoa a laua;
26 Ko Ira foki ko e tagata Iairo, ne eke a ia mo pule a Tavita.