2 Samuela 21:1-22
21 NE ha i ai e hoge ke he vaha ne patuiki ai a Tavita ke he tau tau ne tolu, ne hoge fakahololoa ni ke he tau tau; ti kumi ai e Tavita kia Iehova. Ti pehe mai a Iehova, Kua tupu ai ha ko Saulo mo e hana magafaoa kua lima toto he kelipopo ai e ia e tau tagata Kipeona.
2 Ti ui age e patuiki ke he tau tagata Kipeona, kua pehe age a ia kia lautolu; (ka ko e tau tagata Kipeona nakai mai he fanau a Isaraela a lautolu, ka ko lautolu ia ne toe he tau tagata Amori, ti eke ai he fanau a Isaraela e omonuo mo lautolu; ka ko Saulo ne kumi e ia ke kelipopo a lautolu ke he hana fakamalolo ha ko e fanau a Isaraela mo Iuta;)
3 Kua pehe age a Tavita ke he tau tagata Kipeona, Ko e heigoa kia e mena ke eke e au ma mutolu? Ko e heigoa foki e mena ke taui aki e au a mutolu, kia fakamonuina ai e mutolu e tufaaga a Iehova?
4 Ti pehe age e tau tagata Kipeona kia ia. Nakai ta mai ai ma mautolu e ario po ke auro ia Saulo mo e hana magafaoa; nakai keli foki ha tagata Isaraela ha ko mautolu. Ti pehe age a ia, Ko e mena ke tala mai ai e mutolu, to eke ni e au ma mutolu.
5 Ti pehe age a lautolu ke he patuiki, Ko e tagata ne fakaoti ai a mautolu, mo ia ne manatu kelea kia mautolu ke fakaoti a mautolu, ke nakai nonofo a mautolu ke he kelekele oti a Isaraela;
6 Kia ta mai ai kia mautolu e tau tagata tokofitu mai he tau tama tane hana, kia fakatautau ai e mautolu a lautolu ki mua a Iehova i Kipea a Saulo, ko ia ne fifili e Iehova. Ti pehe age e patuiki, To ta atu ai e au.
7 Ka e fakamoui he patuiki a Mefiposeta ko e tama a Ionatana ko e tama a Saulo, ha ko e omonuo a Iehova ha ha ia laua ko Tavita katoa mo Ionatana ko e tama a Saulo.
8 Ka kua uta he patuiki e na tama tane tokoua a Risepa ko e tama fifine a Aia ne fanau ai e ia kia Saulo, ko Aremoni mo Mefiposeta; mo e tau tama tokolima a Mekala ne fanau e ia kia Atarielu ko e tama a Tasili ko e tagata Mehola;
9 Ti tuku atu e ia a lautolu ke he tau lima he tau tagata Kipeona; ti fakatautau ai e lautolu a lautolu ke he mouga ki mua a Iehova, ti to fakalataha a lautolu tokofitu; ti tamate ai a lautolu ke he tau aho fakamua he heleheleaga ke he kamataaga he heleheleaga karite.
10 Ti uta e Risepa ko e tama fifine a Aia e ie talatala mo e fofola ai ke he maka māna, ke kamata mai he kamataaga he heleheleaga, ke hoko ke he aho ne liligi mai ai e vai mai he lagi kia lautolu; ti nakai toka e ia ha manu lele ke tu ai kia lautolu ke he aho, po ke manu he vao ke he po.
11 Kua talahau atu kia Tavita e mena ne eke e Risepa ko e tama fifine a Aia ko e hoana fakahoa a Saulo;
12 Ti fano a Tavita, ti uta ai e ia tau hui atua a Saulo mo e tau hui atua a Ionatana hana tama mai he tau tagata i Iapesa-Kiliata, ne kaiha mai ai e lautolu he male i Petesani, ne fakatautau ai he tau tagata Filisitia a lautolu ke he mena ia ke he po ne keli ai he tau tagata Filisitia a Saulo i Kilepoa.
13 Ti ta hake e ia mai he mena ia e tau hui atua a Saulo mo e tau hui atua he tama hana ko Ionatana ti fakapotopoto ai e lautolu e tau hui atua ha lautolu ne fakatautau.
14 Kua tanu e lautolu e tau hui atua a Saulo mo Ionatana hana tama ke he kelekele a Peniamina i Sila, ke he tukuaga a Kiso hana matua tane; kua eke foki e lautolu e tau mena oti ne poaki age ai he patuiki; kua mole atu e tau mena ia, ti fanogonogo mai ai e Atua ke he liogi ha lautolu ma e kelekele.
15 Ti tau foki ni e tau tagata Filisitia mo Isaraela, ti hifo a Tavita mo e hana tau fekafekau fakalataha mo ia, ti tau ai a lautolu mo e tau tagata Filisitia; ti lolelole ai a Tavita.
16 Ko Isepenopa foki, ko e taha he fanau a Rafa, ko e mamafa he hana tao ko e tolu e teau e sikeli apa kula, kua pipi ai a ia ke he pelu fou, ti pehe a ia ke keli e ia a Tavita.
17 Ti lagomatai kia ia e Apisai ko e tama a Seruia, ti ta e ia e tagata Filisitia mo e kelipopo ai a ia. Ti omonuo ai e tau tagata a Tavita kia ia, kua pehe age, Nakai haele atu foki a koe mo mautolu ke tau, neke tamate ai e koe e maama a Isaraela.
18 Kua mole atu e tau mena ia, ti tau foki e tau tagata Filisitia i Kopa; ti keli ai e Sipekai ko e tagata Usa a Sapa ko e taha ia he fanau a Rafa.
19 Ti tau foki a lautolu mo e tau tagata Filisitia i Kopa; ti keli ai e Elehanana ko e tama a Ari-oreki ko e tagata Petelehema, e matakainaga a Koriato ko e tagata Kata; ko e fuata he tao hana kua tuga ne akau fakalava he tagata lalaga ie.
20 Kua tau foki a lautolu i Kata; ha ha i ai e tagata tokoluga, ne taki ono e tau matalima hana ti taki ono hana tau matahui, ko e uafulu ma fa ia e katoatoa, ko ia foki ko e tagata Rafa.
21 Ne fakamā e ia a Isaraela ti keli ai a ia e Ionatana ko e tama a Sama ko e matakainaga a Tavita.
22 Ko lautolu tokofā na ne fanau a lautolu ia Rafa i Kata; ti mamate a lautolu ke he lima a Tavita mo e tau lima he hana tau fekafekau.