2 Samuela 22:1-51
22 NE uhu ai e Tavita tau kupu he lologo nai kia Iehova ke he aho ne laveaki ai e Iehova a ia mai he tau lima ha lautolu oti kana kua fai fi kia ia katoa mo e tau lima a Saulo.
2 Kua pehe age a ia, Ko Iehova ko e haku a maka tumau haia, mo e haku a taue, mo e haku a fakamoui, ko e haku ni;
3 Ko e Atua he haku a maka tumau, to tua ni au kia ia; ko e haku a akau punuti a ia, mo e hoe he haku a fakamouiaga, ko e haku a kolo tokoluga, mo e haku a taue, ko e haku a fakamoui, kua fakamoui e koe au mai ia lautolu ne favale mai.
4 Kua ui au kia Iehova, ko ia kua lata ke fakaheke ki ai; ti fakamoui ai au mai ia lautolu kua fai fi kia au;
5 Ha kua agaagai au he tau peau ke mate ai; kua matakutaku au ke he tau vailele he tau tagata matahavala.
6 Ne agaagai au he tau hele a seoli; ha i mua ia au e tau matahele he mate;
7 Ti ui atu ai au kia Iehova ke he haku a matematekelea; ne ui atu e au ke he haku Atua; ti fanogonogo mai a ia ke he haku leo mai he faituga hana, ti hoko hake haku a tagi ke he hana na teliga.
8 Ti lulululu ai mo e vivivivi e lalolagi; ne vivivivi e tau fakaveaga he lagi, ne lulululu e ia ha kua ita ni a ia.
9 Ne hake e ahua he hana tau poko ihu; ko e afi mai he hana fofoga kua moumou; ti huhunu ai e tau malala.
10 Ti ue hifo e ia e lagi mo e haele hifo; ko e pouli foki ha ha i lalo hana tau ve.
11 Ne heke e ia e kerupi mo e lele; ne kitia a ia ke he tau tapakau he matagi.
12 Ne eke e ia e pouli mo tau fale api ke agaagai mai kia ia; ko e fakapotopotoaga he tau vai, mo e tau aolagi uli.
13 Ko e kikila ki mua hana ne huhunu ai e tau malala he afi.
14 Ne fakapakū e Iehova mai he lagi; ne vagahau mai a ia ne Mua ue atu ke he hana leo.
15 Ne fana atu e ia hana tau fana mo e fakamavehevehe a lautolu; ko e tau uhila foki kua tutuli ai a lautolu.
16 Ti kitia ai e tau hala toka he moana, ti toka noa ai e tau fakavē he lalolagi ke he akonakiaga a Iehova, ko e fakamanava he hana fofoga.
17 Kua fakaolo mai e ia hana lima mai luga, kua toto kia au mo e futi au mai he tau vai loga.
18 Kua laveaki e ia au mai he tagata malolo kua fai fi kia au; ko lautolu ne fakavihia mai kia au, ha kua mua ha lautolu a malolo ke he haku.
19 Ha i mua haku a lautolu ke he aho he haku a malaia; ka kua eke a Iehova mo toko haku.
20 Kua ta mai e ia au ke he mena pulahi, kua laveaki e ia au, ha kua finagalo fakaalofa mai a ia kia au.
21 Kua taui mai e Iehova au ke lata mo e haku a tututonu; kua taui mai e ia au ke lata mo e haku a tau lima mea.
22 Ha kua taofi taha e au ke he tau puhala a Iehova, mo e nakai mahani kelea au ke fano kehe mo e haku Atua.
23 Ha kua ha i mua haku hana tau fakafiliaga oti; nakai tuku kehe foki ia au hana tau fakatufono.
24 Ne mahani hakohako au ki mua hana; ti taofi e au a au neke hala.
25 Hanai, kua taui tuai e Iehova au ke lata mo e haku a tututonu, ke lata mo e mea he haku a tau lima ki mua hana.
26 Kua mahani fakaalofa a koe kia ia kua fakaalofa; ti mahani hakohako a koe ke he tagata mahani hakohako;
27 Ti mahani mea a koe kia ia kua mahani mea; ti mahani keukeu a koe kia ia kua mahani keukeu.
28 Kua fakamoui e koe e motu kua matematekelea; ka kua kitekite hifo a koe kia lautolu kua fakatokoluga, ti fakatokolalo ai e koe a lautolu.
29 Ha ko koe ni Iehova na e, ko e haku a lamepa a koe; to fakamaama foki e Iehova haku a pouli.
30 Ha ko koe ni ne heia ai e au e tutu he kau; ko e haku Atua ne hopo ai e au e pa.
31 Ko e Atua kua hakohako hana puhala, kua fakamoli e vagahau a Iehova; ko e akau punuti ni a ia kia lautolu oti kua tua kia ia.
32 Ha ko hai kia e Atua, ka ko Iehova ni hokoia; ko hai kia e maka tumau, ka ko e Atua ha tautolu hokoia?
33 Ko e Atua ko e haku a taue uka a ia; kua takitaki foki e ia a lautolu ne mahani hakohako ke he hana puhala.
34 Kua eke e ia haku tau hui ke tatai mo e tau hui he aila, kua fakatu e ia au ki luga he haku a tau mena tokoluga.
35 Kua fakaako e ia haku tau lima ke tau; kua loloku he tau lima haku e kaufana apa kula.
36 Kua foaki mai foki e koe e akau punuti he fakamouiaga mai ia koe; ko e hau a holoilalo kua fakamatalahi ai au.
37 Kua fakalaulahi e koe e mena ke fano ai au, neke hapelua haku tau tepu hui.
38 Ne tutuli e au a lautolu kua fai fi kia au, mo e kelipopo e au a lautolu; nakai liu mai foki au ato fakaotioti a lautolu.
39 Kua tamate e au a lautolu, mo e keli e au a lautolu; ti nakai maeke ia lautolu ke tutu ki luga; kua veveli a lautolu ki lalo he tau hui haku.
40 Kua pipi e koe au ke he malolo ke tau; kua fakatokolalo e koe kia au a lautolu ne tutu mai kia au.
41 Ko koe ni, kua haga tua mai ai kia au a lautolu ne fai fi kia au; ko lautolu foki ne fakavihia au, kua oti kana a lautolu he keli e au.
42 Ne kitekite a lautolu, ka e nakai fai fakamoui; ne kitekite a lautolu kia Iehova, ka e nakai tali mai a ia kia lautolu.
43 Kua tuki malipilipi e au a lautolu, ti tuga ne efuefu he kelekele a lautolu; ne tuki fakavalavala e au a lautolu tuga ne pelapela he tau puhala, ti taholi ai e au a lautolu.
44 Kua laveaki e koe au he taufetoko au mo e haku motu; kua leveki e koe au ke eke mo pule ke he tau motu kehe; kua fekafekau mai kia au e motu nakai iloa e au.
45 Kua fakatokolalo fakatupua mai kia au e tau tagata kehe; ka logona e lautolu, ti fanogonogo mai ai a lautolu kia au.
46 Kua mole atu e tau tagata kehe; kua o mai mo e vivivivi a lautolu he tau mena ne puipui ma lautolu.
47 Kua moui ni a Iehova, kia fakaaue foki ke he haku a maka tumau; kia fakaheke ke he Atua ko e maka tumau he haku fakamouiaga.
48 Ko e Atua kua taui atu kia lautolu ha ko au; ko ia foki kua fakatokolalo ai e tau motu kia au;
49 Ko ia kua laveaki au mai ia lautolu kua fai fi kia au; ko ia foki kua fakamatalahi au ki luga ia lautolu ne tutu mai kia au; kua laveaki e koe au mai he tagata favale.
50 Ko e mena ia ni, Iehova na e, ke fakaheke atu ai au kia koe ki mua he tau motu kehe; ti lologo atu foki e au ke he hau a higoa.
51 Ko e kolo ke moui a ia ke he hana patuiki; ti mahani totonu a ia kia ia kua fakauku e ia, ko Tavita ni haia, mo e hana fanau tukulagi.