2 Samuela 24:1-25
24 KUA tupu foki e ita a Iehova kia Isaraela; ti fakalagalaga atu ai e ia a Tavita kia lautolu, kua pehe age, Kia fano ā koe, kia totou e koe a Isaraela mo Iuta.
2 Ti pehe age a Tavita kia Ioapo ko e iki ne pule ke he kau ha ha ia ia, Kia faifano a koe ke he tau magafaoa oti a Isaraela, ke kamata mai i Tano ke hoko atu ki Peresepa, ti totou e mutolu e motu, ke iloa ai e au po ke tokofiha e katoatoa he motu.
3 Ti pehe age a Ioapo ke he patuiki, Kia lafilafi e Iehova hau a Atua ke he motu, ke tatai mo lautolu ni kua taki teau, kia kitekite ki ai foki e tau fofoga he haku iki ko e patuiki; ka ko e ha kua finagalo ai haku iki ko e patuiki ke he mena nai?
4 Ka e mahala ai a Ioapo mo e tau takitaki kau ke he kupu he patuiki; ti o atu ai a Ioapo mo e tau takitaki kau mai mua he patuiki ke totou e motu ko Isaraela.
5 Kua laka atu e lautolu a Ioritana, ti he api a lautolu i Aroeru ke he fahi toga he maga, ha ha i ai ke he lotoga he pahua a Kato, ne fehagai mo Iasaru.
6 Ti hohoko atu a lautolu ki Kiliata, mo e motu ko Tatima-atesa; ti hohoko ai a lautolu ki Tano-iana mo e takai ai ki Saitonu.
7 Ti hohoko atu a lautolu ke he kolo i Turo, mo e tau maga oti he tau tagata Hivi mo e tau tagata Kanana; ti o atu ai a lautolu ke he fahi toga a Iuta ki Peresepa.
8 Kua o fano ai a lautolu ke he motu oti ni; kua oti e tau mahina hiva mo e tau aho ne uafulu, ti hohoko mai ai a lautolu ki Ierusalema.
9 Ti uta e Ioapo e katoatoa he tau tagata he motu kua totou ke he patuiki; ne ha i ai i Isaraela valu e teau e afe tagata malolo ne toto e pelu; ka ko e tau tagata Iuta ne lima e teau afe a lautolu.
10 Ti hukia ai e loto a Tavita ka kua oti he totou e ia e motu. Ti pehe atu a Tavita kia Iehova, Kua hala lahi ni au ke he mena kua eke e au; hanai, Iehova na e, kia fakamagalo e koe e mahani kelea he hau a fekafekau, ha kua goagoa lahi ni au.
11 Ti matike a Tavita ke he magaaho pogipogi; ti hoko mai ai e finagalo a Iehova ke he perofeta ko Kato ko e tagata kitekite a Tavita, kua pehe mai,
12 Kia fano a a koe, mo e pehe age a koe kia Tavita, Kua vagahau mai pehe a Iehova, Tolu e mena ke tuku atu e au kia koe; kia fifili la e koe taha mena he tau mena ia ke eke ai e au kia koe.
13 Ti fina age ai a Kato kia Tavita mo e tala age kia ia, kua pehe age kia ia, To fakahoko mai kia e au e hoge ke fitu e tau ke he hau a kelekele; po ke tolu e mahina ke hola ai a koe ki mua ha lautolu kua fai fi kia koe, kua tutuli ai e lautolu a koe; po ke tolu e aho ke ha i ai e tatalu ke he motu hāu? hanai, kia manamanatu la e koe, mo e iloa, po ke heigoa e kupu ke liu aki atu e au kia ia ne fakafano mai au.
14 Ti pehe mai a Tavita kia Kato, Kua fakaatukehe lahi ni au; kia veli atu ai au ke he lima a Iehova, ha kua lahi hana fakaalofa hofihofi noa, ka e aua neke veli atu ai au ke he tau lima he tau tagata.
15 Ti tuku mai ai e Iehova e tatalu kia Isaraela, ne kamata mai he aho a pogipogi ke hoko ke he aho ne kotofa; ti mamate ai e motu ke kamata i Tano ke hoko atu ki Peresepa ne fitugofulu e afe tagata.
16 Kua fakaolo atu ai he agelu hana lima ki Ierusalema ke moumou ai e ia; ti tokihala a Iehova ha ko e malaia, ti pehe age a ia ke he agelu ne moumou ai e motu, Tokai, hanai, kia taofi la e koe hau a lima. Ne tata age e agelu a Iehova ke he mena taholi saito a Aruna ko e tagata Iepusi.
17 Ti pehe atu a Tavita kia Iehova he kitia e ia e agelu ne ta ai e motu, kua pehe atu, Kitiala, ko au nai ni kua hala, ti mahani kelea ai au; ka ko e tau mamoe nai ko e heigoa kia kua eke e lautolu? kia hoko mai hau a lima kia au mo e magafaoa he haku a matua.
18 Ti fina age ai a Kato kia Tavita ke he aho ia; ti pehe atu a ia kia ia, Kia haele hake a koe, ti eke ai e koe e fatapoa kia Iehova ke he mena ne taholi saito a Aruna ko e tagata Iepusi.
19 Ti hake ai a Tavita tuga ne vagahau mai e Kato, ke lata mo e mena ne poaki mai ai e Iehova.
20 Ti kitekite atu e Aruna, ti kitia ai e ia a Tavita mo e hana tau fekafekau kua o hake mai kia ia; ti fina atu a Aruna ti fakaveli fakafohifo ai a ia ke he kelekele ke he patuiki.
21 Ti pehe age a Aruna, Ko e heigoa e mena kua haele mai ai haku a iki ko e patuiki ke he hana fekafekau? Ti pehe age a Tavita, Kua hau au, ke fakafua mai ia koe e mena taholi saito, ke ati ai e fatapoa kia Iehova, ke motuhia ai e tatalu mai he motu.
22 Ti pehe age a Aruna kia Tavita, Uta ā, ti eke poa ai he iki haku ko e patuiki ke he mena kua finagalo ki ai a ia; kitiala, ko e tau povi ke eke aki e poa huhunu, mo e tau mena ne taholi aki e saito, katoa mo e tau lakau hahamo he tau povi ke eke mo tau gaafi.
23 Ko e tau mena oti na ne foaki atu ai e Aruna ko e patuiki ke he patuiki; ti pehe age a Aruna ke he patuiki, Kia finagalo fakaalofa mai a Iehova hau a Atua kia koe.
24 Ti pehe age e patuiki kia Aruna, Nakai; to fakafua ni e au ia koe ke he mena ke fakafua aki ai; ti nakai eke ai e au e tau poa huhunu kia Iehova ke he tau poa kua moua noa. Ti fakafua atu ai e Tavita e mena taholi saito, katoa mo e tau povi ke he tau sikeli ario ne limagofulu.
25 Ti ati ai e Tavita e fatapoa kia Iehova ke he mena ia; ti eke ai e ia e tau poa huhunu mo e tau poa fakaaue. Ti fanogonogo mai a Iehova ke he liogi ma e motu, ti motuhia ai e tatalu ia Isaraela.