2 Samuela 3:1-39
3 TI tau mau ai e magafaoa a Saulo mo e magafaoa a Tavita; ti tolomaki atu e malolo a Tavita, ka ko e magafaoa a Saulo kua au atu ai he lolelole.
2 Ne fanau ai e tau tama tane kia Tavita i Heperona; ko e hana tama uluaki ko Amanono, ko e tama a Ahinoama ko e fifine Isereelu;
3 Ko e hana tama ne tokoua aki, ko Kiliava ko e tama a Apikaila ko e hoana a Napalu ko e tagata Karamelu, ko e tama ne tokotolu aki ko Apisaloma, ko e tama a Maaka ko e tama fifine a Talemai ko e patuiki a Kesuri;
4 Ko e tama ne tokofa aki ko Atonia, ko e tama a Hakita; ko e tama ne tokolima aki ko Sepatia, ko e tama a Apitala;
5 Ko e tama ne tokoono aki ko Itereamu, ko e tama a Ekelā ko e hoana a Tavita; ne fanau a lautolu na kia Tavita i Heperona.
6 Ko e vaha ne tau ai e magafaoa a Saulo mo e magafaoa a Tavita, ne fakamalolo a Apineru ha ko e magafaoa a Saulo.
7 Ne ha ia Saulo e hoana fakahoa ko Risepā hana higoa ko e tama fifine a Aia; ti pehe age a Isoposeta kia Apineru, Ko e heigoa e mena ne fano ai a koe ke he hoana fakahoa he haku matua?
8 Ti ita lahi ai a Apineru he tau kupu a Isoposeta; ti pehe age a ia, Ko e ulu kuli ha ha ia Iuta kia au? Kua fakaalofa atu au ke he aho nai ke he magafaoa a Saulo hau a matua tane, mo e hana tau matakainaga, mo e hana tau kapitiga, ti nakai tuku atu ai e au a koe ke he lima a Tavita, ka kua pehe mai a koe kia au ke he aho nai kua hala au ke he fifine na.
9 Kia eke pihia he Atua kia Apineru mo e lafilafi ki ai, kaeke ke nakai eke e au kia Tavita ke lata mo e mena ne omonuo ai e Iehova;
10 Ke uta kehe e kautu mai he magafaoa a Saulo, ka e fakatu ai e nofoaiki a Tavita, ke pule a ia ki a Isaraela mo Iuta, ke kamata mai I Tano ke hoko atu ki Peresepa.
11 Ti nakai maeke kia ia ke tali age ha kupu kia Apineru, ha kua matakutaku a ia kia ia.
12 Ti fakafano mai e Apineru e tau fekau kia Tavita ha ko ia, kua pehe mai, Ko e motu a hai kia aenai? Ti pehe mai foki a ia kia eke e koe e maveheaga mo au, ti kitiala, to ha i ai au mo koe ke fakamafoki mai ai a Isaraela oti kia koe.
13 Ti tali atu ai a ia, Mitaki, to eke ni e taua e maveheaga mo au; ka ko e taha ni e mena ke tala atu ai e au kia koe, hanai, Ka hau a koe ke fekiteaki a taua, kaeke ke nakai ta mai fakamua e koe a Mekala ko e tama fifine a Saulo, nakai ni fekiteaki a taua mo au.
14 Kua fakafano age foki e Tavita e tau fekau kia Isoposeta ko e tama a Saulo, kua pehe age, Kia ta mai a e koe haku hoana, ne eke ai e au mo hoana ke he tau kili he kakano he tau tagata Filisitia ne taha e teau.
15 Ti fakafano atu ai e Isoposeta, mo e fofo mai a ia he hana tane ko Paletieli ko e tama a Laisa.
16 Kua o ai hana tane mo ia, ne mui age a ia kia ia mo e tagi, kua hohoko atu ki Pahurima; ti pehe age a Apineru kia ia, Fano ā, kia liu a koe; ti liu ai a ia.
17 Kua vagahau a Apineru mo e tau patu Isaraela, kua pehe age, Ne kumi fakamua e mutolu a Tavita ke eke mo patuiki ha mutolu;
18 Hanai, kia eke ā e mutolu; ha kua vagahau mai e Iehova kia Tavita, kua pehe mai, Ko e lima a Tavita haku a fekafekau to fakamoui ai e au haku motu mai he lima he tau tagata Filisitia, mo e tau lima ha lautolu oti kua fai fi kia lautolu.
19 Kua vagahau foki a Apineru ke he tau teliga he tau tagata Peniamina; ti fina atu a Apineru ke vagahau atu ai ke he tau teliga a Tavita i Heperona ke he tau mena oti ne loto ki ai a Isaraela, katoa mo e magafaoa oti a Peniamina.
20 Kua hoko atu a Apineru kia Tavita i Heperona, katoa mo e tau tagata tokouafulu ne fakalataha mo ia; ti eke ai a Tavita e galue ma Apineru mo e tau tagata he hana fenoga.
21 Ti pehe mai a Apineru kia Tavita, Ko e matike ne fai au, ke fano au, ti fakapotopoto mai ai e au a Isaraela oti, ke he haku iki ko e patuiki ti eke ai e lautolu e maveheaga mo koe, ke pule a koe ke he tau mena oti kua finagalo ai a koe; ti fakafano atu e Tavita a Apineru ti fano ai a ia mo e mafola.
22 Kitiala, ko e tau fekafekau a Tavita kua o mai a lautolu he tutuli e kau, kua ta mai foki e lautolu e tau mena loga ne fofo he tau; ka ko Apineru nakai tuai ha i ai a ia mo Tavita i Heperona, ha kua fakafano atu e ia a ia, ti kua fano a ia mo e mafola.
23 Kua hohoko mai a Ioapo mo e kau oti ha ha ia ia, ti tala age a lautolu kia Ioapo, kua pehe age, Ne hau a Apineru ko e tama a Neru ke he patuiki, ti fakafano atu e ia a ia, ti kua fano a ia mo e mafola.
24 Ti fina age ai a Ioapo ke he patuiki, kua pehe age a ia, Ko e heigoa kia e mena kua eke e koe? Kitiala, ne hau a Apineru kia koe ko e ha ne fakafano atu ai e koe a ia, ti kua fano ai a ia?
25 Kua iloa e koe a Apineru ko e tama a Neru, ne hau ai a ia ke fakavai a koe, ke kitia foki e ia hau a mahani, mo e iloa ai e ia e tau mena oti kua eke e koe.
26 Kua fina atu a Ioapo ia Tavita, ti fakafano atu e ia e tau fekau ke mumui atu kia Apineru, ti liuaki mai e lautolu a ia he vai keli ko Sira, ka e nakai iloa e Tavita.
27 Kua liu mai a Apineru ki Heperona, ti uta e Ioapo a ia ke he taha fahi ki loto he gutuhala, ke vagahau fakatekiteki ai a laua mo ia; ti hoka ai e ia a ia ke he hana manava, ti mate ai a ia, ke lukutoto aki a Asaelu e matakainaga a Ioapo.
28 Kua mole atu ia kua logona ai e Tavita, ti pehe age a ia, Kua mea au mo e haku a kautu ki mua a Iehova tukulagi he toto a Apineru ko e tama a Neru;
29 Kia toka ia ki luga he ulu a Ioapo, katoa mo e magafaoa oti he hana matua, aua neke noa he magafaoa a Ioapo mo e tagata ne ha i ai e gagao pela, mo e lepela, mo e falanaki ke he tokotoko, mo e mate ke he pelu, mo hogeia mena kai.
30 Ne keli e Ioapo mo e hana matakainaga ko Apisai a Apineru, he keli e ia a Asaelu ko e matakainaga ha laua i Kipeona ke he tau.
31 Ti pehe age a Tavita kia Ioapo mo e motu oti ha ia ia, Kia hehe e mutolu ha mutolu a tau tapulu, ti felevehi ai a mutolu ke he ie talatala, mo e tagi tatuki ai a mutolu ki mua a Apineru; ti mui atu ai e patuiki ko Tavita ke he fata.
32 Kua tanu e lautolu a Apineru i Heperona; ti tagi a Tavita mo e leo lahi ke he tukuaga a Apineru, kua tagi ai foki e motu oti.
33 Ti uhu ai he patuiki e lologo kia Apineru, kua pehe, Kua mate kia a Apineru tuga ne mate e tagata goagoa?
34 Nakai lili hau a tau lima, ti nakai tuku ai hau a tau hui ke he tau liliaga apa kula; tuga ne mate e tagata ki mua he tau tagata mahani kelea, kua mate ai pihia a koe. Ti liu tagi ai e motu oti kia ia.
35 Ti o age e motu oti kia Tavita kia kai ai e ia e tau mena kai, ka kua aho agaia; ti omonuo ai a Tavita, kua pehe age, Kia eke pihia e Iehova kia au, mo e lafilafi ki ai, kaeke ke kai ai e au e areto, po ke taha mena ato to e la.
36 Kua kitekite ai e motu oti, ti mitaki ia kia lautolu, tuga ne tau mena oti ne eke he patuiki, kua mitaki ia ke he motu oti.
37 Ti iloa ai he motu oti, katoa mo Isaraela oti ke he aho ia, nakai ko e pule he pule he patuiki ne tamate ai a Apineru, ko e tama a Neru.
38 Ti pehe age e patuiki ke he hana tau fekafekau, Kua iloa nakai e mutolu, kua matulei ai e iki ko e tagata lahi he motu a Isaraela ke he aho nai?
39 Kua lolelole ni au ke he aho nai, pete he fakauku ai au ke eke mo patuiki; ko e tau tagata nai foki, ko e tau tama a Seruia, kua mua he mahani uka a lautolu kia au; kia taui atu e Iehova kia ia kua eke e tau mena kelea, ke lata mo e hana mahani kelea.