2 Samuela 4:1-12
4 KUA logona he tama a Saulo ko Isoposeta kua mate a Apineru i Heperona, ti fakalolelole ai a ia, ti fakaatukehe ai a Isaraela oti.
2 Ne ha i ai ke he tama a Saulo ko Isoposeta ko e tau tagata tokoua, ko e tau takitaki kau a laua, ko e higoa he taha ko Paana, ko e higoa he taha ko Rekapa, ko e tau tama tane a Rimoni ko e tagata Perota, mai he magafaoa a Peniamina; (ha kua totou foki a Perota kia Peniamina;
3 Ne fehola e tau tagata Perota ki Kitaima, ti nonofo paea ai a lautolu kua hoko mai ke he aho nai.)
4 Ha ha i ai kia Ionatana ko e tama a Saulo e tama tane ne kulikuli ai hana tau hui; ne lima hana tau tau he hoko age ai e ogo kia Saulo mo Ionatana i Isereelu; ti toto ai a ia he fifine ne leveki a ia, ti hola ai a ia; kua fakatepetepe a ia ke hola, ti to e tama ti kulikuli ai a ia; ko e higoa hana ko Mefiposeta.
5 Kua o atu e tau tama tane a Rimoni ko e tagata Perota, ko Rekapa mo Paana, kua hohoko atu a laua ke he fale a Isoposeta ke he magaaho ne vevela ai e la; ha ne takoto ai a ia ke he hana moheaga ke he tupoula.
6 Ti o atu a laua ki loto he fale ke uta saito, ti hoka e laua a ia ke he manava; ti fehola ai a Rekapa mo Paana hana matakainaga;
7 Kua huhu atu a laua ke he fale, ka ko ia, ne takoto ke he hana moheaga ke he poko ne fa takoto ai a ia, ti ta e laua a ia mo e kelipopo a ia, mo e hio kehe e laua hana ulu; ti uta ai e laua hana ulu; ti o atu ai a laua he po katoa ke he puhala he kelekele tatai.
8 Ti ta mai ai e laua e ulu a Isoposeta kia Tavita i Heperona; ti pehe mai a laua ke he patuiki, Kitiala, ko e ulu hanai a Isoposeta ko e tama a Saulo, ne fai fi kia koe, ko ia ne eke ke kelipopo a koe, kua taui atu e Iehova ha ko koe ko e iki na e ko e patuiki, ke he aho nai kia Saulo mo e hana fanau.
9 Ti tali atu a Tavita kia Rekapa mo Paana hana matakainaga, ko e tau tama a Rimoni ko e tagata Perota, kua pehe atu a ia kia laua, Kua moui a Iehova, ko ia ne laveaki mai au he tau mena matematekelea oti kana,
10 Ne tala mai e taha kia au, kua pehe mai, Kitiala, kua mate tuai a Saulo, piko ni a ia kua ta mai ai e ia e tala mitaki, ti tapaki e au a ia mo e kelipopo a ia i Tikelaka, ko e taui haia ne ta age e au kia ia ha ko e hana tala.
11 Ka ko e hanai, ko e tau tagata mahani kelea kua keli ai e laua e tagata tututonu ke he hana fale ki luga hana moheaga, nakai kia taui atu ai e au hana toto kia mua, mo e uta kehe e au a mua mai he lalolagi.
12 Ti poaki atu e Tavita ke he tau fuata, ti keli ai e lautolu a laua, mo e hio kehe e lautolu ha laua a tau tauululima, mo e ha laua a tau tauuluhui, mo e tautau ai ki luga he vai namo i Heperona; ka ko e ulu a Isoposeta ne uta e lautolu mo e tanu ke he tukuaga a Apineru i Heperona.