2 Samuela 9:1-13
9 TI pehe age a Tavita, Kua fai tagata nakai kua toe he magafaoa a Saulo, kia fakaalofa age au kia ia ha ko Ionatana?
2 Ha ha i ai ke he magafaoa a Saulo e fekafekau ko Tipa hana higoa, ti ui age e lautolu kia ia ke fina age kia Tavita. Ti pehe age a ia, Ko au haia ko e hau a fekafekau.
3 Ti pehe age e patuiki kia ia, Nakai kia toe ha tagata he magafaoa a Saulo, ke eke ai e au e fakaalofa he Atua kia ia? Ti pehe age a Tipa, Kua toe e tama tane a Ionatana, kua kulikuli hana tau hui.
4 Ti pehe age e patuiki, Ko e fe a ia? Ti pehe age a Tipa ke he patuiki, Kitiala, Ha ha i ai a ia ke he fale a Makiro ko e tama a Amueli i Lotapara.
5 Ti fakafano age he patuiki ko Tavita, ti ta mai ai e lautolu a ia he fale a Makiro ko e tama a Amueli i Lotopara.
6 Kua hau a Mefiposeta ko e tama a Ionatana ko e tama a ia a Saulo, kia Tavita, ti fakaveli fakafohifo a ia, mo e fakatokolalo ai a ia. Ti pehe atu a Tavita Mefiposeta na e! Ti pehe mai a ia, Kitiala, ko e hau a fekafekau hanai.
7 Ti pehe atu a Tavita kia ia, Ua matakutaku a koe, ha ko e mena to mahani mitaki atu au kia koe ha ko Ionatana hau a matua tane; to liu aki atu ni e au kia koe e tau fonua oti a Saulo hau a matua, ka ko koe, to kai mena mau a koe fakalataha mo au ke he haku laulau.
8 Ti fakaveli fakafohifo ai a ia, mo e pehe mai, Ko hai kia hau a fekafekau, ne fofoga mai ai a koe ke he kuli mate, tuga au nai?
9 Ti ui age he patuiki kia Tipa ko e fekafekau a Saulo; ti pehe age a ia kia ia, Ko e tau mena oti ne ha ha ia Saulo mo e hana magafaoa oti, kua ta age e au ke he tama he hau a iki.
10 Kia eke e koe e gahua ke he fonua māna, ko koe, mo e hau a tau tama tane, mo e hau a tau fekafekau; ti ta mai ai e koe e tau fua ma e tama he hāu a iki ke kai ai e ia; ka ko Mefiposeta ko e tama he hāu a iki to kai mena mau ni a ia ke he haku a laulau. Ha ha ia Tipa e tau tama tane ne tokohogofulu ma lima, mo e tau fekafekau ne tokouafulu.
11 Ti pehe age a Tipa ke he patuiki, Tuga ne tau mena oti kua poaki mai haku iki ko e patuiki ke he hana fekafekau to eke ni pihia he fekafekau hau. Kua pehe age e patuiki, To kai mena mau a Mefiposeta ke he haku a laulau, tuga ne taha he tau tama tane he patuiki.
12 Ha ha ia Mefiposeta e tama tane tote ko Mika hana higoa; ko lautolu oti foki ne nonofo mo e magafaoa a Tipa, ne fekafekau ai a lautolu kia Mefiposeta.
13 Ti nofo ai a Mefiposeta i Ierusalema, ha kua kai mena mau ai a ia ke he laulau he patuiki; ne kulikuli foki hana na hui ua.