2 Tau Patuiki 11:1-21
11 KUA kitia he matua fifine a Ahasaia ko Atalia kua mate hana tama, ti matike ai a ia mo e kelipopo e fanau oti he patuiki.
2 Ka ko Iosapa ko e tama fifine he patuiki ko Ioramo, ko e mahakitaga a Ahasaia, ne uta e ia a Ioasa ko e tama tane a Ahasaia, ne kaiha e ia a ia mai he tau tama tane he patuiki ne tamate; ti fufu ai e lautolu a ia ko laua mo e fifine ne fakahuhu a ia ke he poko mohe, ti nakai kitia e Atalia a ia; ti nakai keli ai a ia.
3 Ti ha i ai a laua mo ia kua fufu ai ke he fale a Iehova ke he ono e tau. Kua eke foki a Atalia mo patuiki he motu.
4 Ka ko e tau fitu, ne fakafano atu ai e Iehoiata, mo e ta mai ai e ia e tau iki he tau takiteau, mo e kau he tau Kereti, katoa mo e kau leoleo, ti o mai a lautolu kia ia ke he fale a Iehova; ti eke ai e ia e maveheaga mo lautolu mo e pehe age a ia ke omonuo ai e lautolu ke he fale a Iehova, ti fakakite atu ai e ia kia lautolu e tama tane he patuiki.
5 Ti poaki ai e ia kia lautolu, kua pehe age, Ko e mena ke eke e mutolu hanai; ko e taha veveheaga, ko e hana veveheaga ne tolu aki ha mutolu ke huhu mai ke he sapati, to eke a lautolu mo tau leoleo he fale he patuiki.
6 Ti ha i ai taha veveheaga ne toluaki ke he gutuhala a Sura, ti ha i ai foki taha veveheaga ne toluaki ke he gutuhala ki tua he kau leoleo; to leoleo ai pihia e fale neke feoho mai a lautolu.
7 Ko e ua foki e vahega ko mutolu oti ke huhu atu ke he sapati, to leoleo ai e lautolu e fale a Iehova ne tata age ke he patuiki.
8 Ti agaagai a mutolu ke he patuiki ko e tagata mo e hana tau kanavaakau ke he hana tau lima, ka hau foki taha ki loto he kau ne fakaatuatu kia keli ai a ia; kia ha i ai foki a mutolu mo e patuiki ke he hana hu atu mo e hana hu mai.
9 Ti eke ai he tau iki he tau takiteau ke lata mo e tau mena oti ne poaki atu ai e Iehoiata ko e ekepoa kia lautolu; ne takitaha a lautolu mo e uta hana tau tagata ko lautolu ke hu mai ke he sapati, katoa mo lautolu ke huhu atu ke he sapati; ti o mai ai a lautolu kia Iehoiata ko e ekepoa.
10 Ti ta age ai he ekepoa ke he tau iki he tau takiteau e tau tao mo e tau akau punuti he patuiki ko Tavita, ne ha i ai ke he fale a Iehova.
11 Ti tutu ai e kau leoleo, ko e tagata mo e hana kanavaakau ke he hana tau lima, ne kamata mai he fahi matau he fale, ke hoho atu ke he fahi hema he fale, ke he fahi he fatapoa mo e fale, mo e agaagai ai ke he patuiki.
12 Ti ta mai ai e ia e tama he patuiki, ti tuku ai e ia ki luga hana e foufou, mo e ta atu kia ia e fakatufono; ti eke e lautolu a ia mo patuiki, mo e fakauku e lautolu a ia; ti patipati e lautolu ha lautolu a tau lima mo e pehe age, Kia moui e patuiki.
13 Kua logona e Atalia e go he motu ne tafepoi, ti hau ai a ia ke he motu o tagata ke he fale a Iehova.
14 Kua kitekite a ia, kitiala, ko e patuiki ne tu ke he tapa he pou, tuga ne mahani ke tu ai, mo e tau iki mo e tau pu ke ulo ne tata age ke he patuiki, mo e tau tagata oti he motu kua fiafia mo e ulo ai e tau pu; ti hēhē ai e Atalia hana tau tapulu, mo e hea, Ko e fakafualoto, Ko e fakafualoto.
15 Ti poaki atu e Iehoiata ko e ekepoa ke he tau iki he tau takiteau, ne eke mo tau takitaki kau, kua pehe atu a ia kia lautolu, Kia uta e mutolu a ia ki tua he kau ne fakaatuatu, ko ia foki ke mui atu kia ia kia keli e mutolu a ia ke he pelu. Ha kua pehe age e ekepoa, Aua neke keli a ia ke he fale a Iehova.
16 Kua eke e lautolu e puhala māna, ti fano ai a ia ke he puhala ne o mai ai e tau solofanua ke he fale he patuiki, ti keli e lautolu a ia ke he mena ia.
17 Ti eke e Iehoiata e maveheaga mo Iehova mo lautolu, ko e patuiki mo e motu, ke eke a lautolu mo motu a Iehova; ko e maveheaga foki mo e patuiki mo e motu.
18 Ti o age e tau tagata oti he motu ke he fale a Paala, mo e ulu moumou ai e lautolu, ti tukimalipilipi fakaoti e lautolu hana tau fatapoa, mo e hana tau tupua; ti kelipopo e lautolu a Matana ko e ekepoa a Paala ki mua he fatapoa. Ti kotofa ai he ekepoa e tau leoleo ke he fale a Iehova.
19 Ti uta ai e ia e tau iki he tau takiteau mo e kau he tau Kereti, mo e kau leoleo, katoa mo e tau tagata oti he motu, ti ta hifo e lautolu e patuiki mai he fale a Iehova ke he fale he patuiki, ti o ai a lautolu ke he puhala he gutuhala he kau leoleo ke he fale he patuiki ti fakanofo e lautolu a ia ke he nofoaiki he tau patuiki.
20 Ti fiafia ai e tau tagata oti he motu, ti mafola e maga; ka kua keli a Atalia ke he pelu tata age ke he fale he patuiki.
21 Ne fitu e tau a Ioasa he eke ai a ia mo patuiki.