2 Tau Patuiki 12:1-21
12 KO e tau fitu a Iehu ne eke ai a Ioasa mo patuiki; ti fagofulu e tau ne patuiki ai a ia i Ierusalema. Ko e higoa foki he hana matua fifine ko Tivia ko e tagata Peresepa.
2 Kua eke foki e Ioasa e tau mena tonu ki mua a Iehova ke he tau aho oti hana he fakaako atu ai e Iehoiata ko e ekepoa a ia.
3 Ka e nakai uta kehe ai e tau mena tokoluga kua eke poa ai e motu mo e huhunu ai e tau mena manogi ke he tau mena tokoluga.
4 Kua pehe age a Ioasa ke he tau ekepoa Ko e tau tupe oti ko e tau mena kua fakatapu kua ta mai ke he fale a Iehova, ko e tau tupe he tau tagata takitokotaha kua totou, ko e tau tupe ke totogiaki hana moui tuga ne fakalata ai e tagata, mo e tau tupe oti kua makai ki ai e loto he tagata ke ta mai ke he fale a Iehova.
5 Ko e tau ekepoa kia takitaha ha lautolu mo e uta e tau tupe he tau tagata ne mahani mo lautolu, mo e taute e lautolu e tau mena kua maona he fale ke he tau mena oti kua kitia e mutolu kua maona ai.
6 Kua hoko ke he tau uafulu ma tolu he patuiki ko Ioasa, ka kua nakai taute he tau ekepoa e tau mena ne maona he fale.
7 Ti ui ai he patuiki ko Ioasa kia Iehoiata ko e ekepoa katoa mo e tau ekepoa, kua pehe atu a ia kia lautolu, Ko e heigoa kia e mena kua nakai taute ai e mutolu e tau mena ne maona he fale? hanai, aua neke uta, foki e mutolu e tau tupe he tau tagata ne mahani mo mutolu, ka kia ta atu e mutolu ke taute ai e tau mena he fale ne maona.
8 Ti talia ai he tau ekepoa, ke nakai uta foki e lautolu e tau tupe he motu, ti nakai tuai taute e lautolu e tau mena ne maona he fale.
9 Ti uta e Iehoiata ko e ekepoa e puha, ti vili ai e ia e pu ke he ufi puha, ti tuku ai e ia ke he fahi he fatapoa, ke he fahi matau he tagata ka hu mai a ia ke he fale a Iehova; ti tuku ai he tau ekepoa ne leoleo e gutuhala e tau tupe oti ne ta mai ke he fale a Iehova.
10 Kua kitia e lautolu kua loga e tupe ke he puha, ti o hake ai e tohikupu he patuiki mo e ekepoa ne mua, kua fafao ai ke he tau kato mo e totou e laua e tau tupe ne moua ai ke he fale a Iehova.
11 Ti ta atu ai e laua e tau tupe kua fafati ke iloa ai e mamafa kia lautolu ne eke e gahua, ko lautolu ne leoleo e fale a Iehova; ti ta atu ai e lautolu ke he tau tufuaga eke akau, mo e tau tufuga ati fale, ne eke ai e gahua ke he fale a Iehova.
12 Ko e tau tagata ati pa foki, mo lautolu ne tātā maka; ke fakafua aki foki e tau akau, mo e tau maka tātā ke taute aki e tau mena ne maona he fale a Iehova katoa mo e tau mena oti ne ta atu ma e fale ke taute aki.
13 Ka e nakai eke aki ma e fale a Iehova, mai he tau tupe ne ta mai ke he fale a Iehova, e tau kapiniu ario, poke tau helehele vavae, po ke tau kapiniu, po ke tau pu, ko e falu a mena auro, po ke falu a mena ario;
14 Ka e ta atu ai e lautolu kia lautolu ne eke e gahua, ti taute ai e lautolu e fale a Iehova.
15 Kua naki fakafili e laua e tau tagata ne ta atu ki ai e tau tupe, ke ta age kia lautolu ne eke ai e gahua; ha kua eke ni e lautolu mo e fakamoli.
16 Ko e tau tupe ha ko e hehe, mo e tau tupe ha ko e hala naki ta mai ke he fale a Iehova; ko e tau mena ma e tau ekepoa haia.
17 Ko e vaha ia ne hake ai a Hasaeli ko e patuiki a Suria, ti tau a ia mo Kata, ti eke ai e ia māna; ti hagao atu a Hasaeli ko e o hake ne fai ke tau mo Ierusalema.
18 Ti uta ai e Ioasa ko e patuiki a Iuta e tau mena tapu oti ne fakatapu ai he tau matua hana ko Iehosefata, mo Iehoramo, mo Ahasaia, ko e tau patuiki a Iuta katoa mo e hana tau mena tapu, katoa mo e auro oti ne moua ai ke he tau mena ne toka ai e tau koloa he fale a Iehova, mo e fale he patuiki, ti fakafano atu ai e ia kia Hasaeli ko e patuiki a Suria, ti fano kehe ai a ia i Iereusalema.
19 Ko e tau mena ne toe ne eke e Ioasa, katoa mo e tau mena oti ne eke e ia, nakai kia tohi ia ke he tohi ne toka ai e tau tala ke he tau nofoaga he tau patuiki a Iuta?
20 Kua mamatike foki hana tau fekafekau, kua fakafualoto a lautolu, ti keli ai e lautolu a Ioasa ke he fale a Milo, ne o hifo age ai ki Sila.
21 Ha ko Iosakara ko e tama tane a Simeata, mo Iehosafata ko e tama tane a Someri, ko e hana tau fekafekau, ne kelipopo e laua a ia ti mate ai a ia; ti tanu e lautolu a ia fakalataha mo e hana tau matua ke he maga a Tavita. Ti eke ai e tama tane hana ko Amasia mo patuiki ke hukuiaki a ia.