2 Tau Patuiki 13:1-25
13 KO e tau uafulu ma tolu a Ioasa ko e tama a Ahasaia ko e patuiki a Iuta, ne eke ai a Iehoahasa ko e tama a Iehu mo patuiki a Isaraela i Samaria, ti hogofulu ma fitu e tau ne patuiki ai a ia.
2 Ne eke foki e ia e mahani kelea ki mua a Iehova, mo e fano ai a ia ke he tau hala a Ierepoamo ko e tama a Nepata, ne fakatupu ai e hala kia Isaraela, nakai ni fano kehe a ia mo e tau mena ia.
3 Ti tupu ai e ita a Iehova kia Isaraela, ti tuku atu e ia a lautolu ke he lima a Hasaeli ko e patuiki a Suria, mo e lima a Penihata ko e tama a Hasaeli ke he tau aho oti.
4 Ti le atu e Iehoahasa kia Iehova, ti fanogonogo mai a Iehova kia ia; ha kua fioia e ia e matematekelea a Isaraela he favale mai ai e patuiki a Suria kia lautolu.
5 (Ti foaki mai ai e Iehova e fakamoui kia Isaraela, ti hao mai ai a lautolu he tau lima a Suria; ti nonofo ai e tau tagata Isaraela ke he tau fale ie ha lautolu tuga ne vaha fakamua.
6 Ka e pete ia nakai o kehe a lautolu mo e tau hala he magafaoa a Ierepoamo, ne fakatupu ai e hala kia Isaraela, ka e o ai ni a lautolu; ti toka agaia foki e tupua a Asaira i Samaria.)
7 Kua nakai toka foki e ia e tau tagata ma Iehoahasa, ka ko e tau tagata heke solofanua ne tokolimagofulu, mo e hogofulu e kariota, mo e kau ne o ke he tau hui ha lautolu ne hogofulu e afe tagata; ha kua fakaoti ai he patuiki a Suria a lautolu ti eke e ia a lautolu ke tuga ne efuefu kua taholi.
8 Ko e tau mena ne toe ne eke e Iehoahasa mo e tau mena oti ne eke e ia, katoa mo e hana malolo, nakai kia tohi ke he tohi ne toka ai e tau tala ke he tau nofoaga he tau patuiki a Isaraela?
9 Kua takoto foki a Iehoahasa fakalataha mo e hana tau matua, ti tanu e lautolu a ia i Samaria; ti eke e tama hana ko Ioasa mo patuiki ke hukuiaki a ia.
10 Ko e tau tolugofulu ma fitu he patuiki ai a Ioasa i Iuta, ne eke a Ioasa ko e tama a Iehoahasa mo patuiki a Isaraela i Samaria, ti hogofulu ma ono e tau ne patuiki ai a ia.
11 Ne eke foki e ia e mahani kelea ki mua a Iehova, nakai fano kehe a ia mo e tau hala oti a Ierepoamo ko e tama a Nepata, ne fakatupu ai e hala kia Isaraela ka e fano ai a ia.
12 Ko e tau mena ne toe ne eke e Ioasa, katoa mo e tau mena oti ne eke e ia, mo e hana malolo ne tau ai a ia mo Amasia ko e patuiki a Iuta, nakai kia tohi ai ke he tohi ne toka ai e tau tala ke he tau nofoaga he tau patuiki a Isaraela?
13 Kua takoto foki a Ioasa fakalataha mo e hana tau matua, ti nofo ai a Ierepoamo ke he hana nofoaiki. Ti tanu ai a Ioasa i Samaria fakalataha mo e tau patuiki a Isaraela.
14 Kua moua a Elisaio he gagao ne mate ai a ia. Ti hifo a Ioasa ko e patuiki a Isaraela kia ia, mo e tagi ai ki luga hana mata, kua pehe age, Haku matua na e, haku matua ne e, ko e tau kariota a Isaraela mo e hana kau heke solofanua.
15 Ti pehe age a Elisaio kia ia. Toto la e kaufana mo e tau fana. Ti toto ai e ia e kaufana mo e tau fana.
16 Ti pehe age a ia ke he patuiki a Isaraela, Kia tuku hau a lima ki luga he kaufana, ti tuku atu ai e ia hana lima; ti tuku atu ai e Elisaio hana tau lima ki luga he tau lima he patuiki.
17 Ti pehe age a ia, Kia hafagi la e fakamaama ke he fahi uta. Ti hafagi ai e ia. Ti pehe age a Elisaio, Fana a. Ti fana ai e ia. Ti pehe age a ia, Ko e fana he fakamouiaga ke eke e Iehova, mo e fana he fakamouiaga mai ia Suria, ha ko e mena to keli e koe a Suria i Afeka ato fakaoti ai e koe a ia.
18 Ti pehe age ai a ia, Kia toto ā e koe e tau fana. Ti toto ai e ia. Ti pehe age a ia ke he patuiki a Isaraela. Kia ta la e koe e kelekele. Ti ta lagatolu e ia, ti toka.
19 Ti ita ai e tagata he Atua kia ia, kua pehe age. Ane ta lagalima po ke lagaono e koe po kua keli e koe a Suria ato fakaoti ai e koe a ia; ka ko ainei, ko e lagatolu hokoia ke keli ai e koe a Suria.
20 Kua mate a Elisaio ti tanu e lautolu a ia. Ne o age foki e tau kau a Moapi ke he motu ke he kamataaga he tau.
21 Ha ne tanu e lautolu e tagata, ti kitiala, kua kitia e lautolu e kau; ti liti e lautolu e tagata ke he tukuaga a Elisaio; kua hoko hifo e tagata, kua piki atu ke he tau hui atua a Elisaio, ti liu moui ai a ia, kua tu ki luga ke he hana tau hui.
22 Ka kua favale atu a Hasaeli ko e patuiki a Suria kia Isaraela ke he tau aho oti a Iehoahasa.
23 Ka kua fakaalofa mai a Iehova kia lautolu, kua fakaalofa hofihofi noa mai foki a ia kia lautolu, ti hagao mai a ia kia lautolu ha ko e hana maveheaga mo Aperahamo, mo Isaako, mo Iakopo; kua nakai finagalo foki a ia ke fakaoti ai a lautolu, ti nakai liti foki e ia a lautolu mai mua hana ke he vaha ia.
24 Kua mate a Hasaeli ko e patuiki a Suria, ti eke ai a Penihata hana tama mo patuiki ke hukuiaki a ia.
25 Ti liu fofo mai e Ioasa ko e tama a Iehoahasa he tau lima a Penihata ko e tama a Hasaeli, e tau maga ne fofo mai he tau lima a Iehoahasa hana matua tane ke he tau. Ne keli lagatolu e Ioasa a ia, ti liu moua mai ai e ia e tau maga a Isaraela.