2 Tau Patuiki 14:1-29
14 KO e tau ua a Ioasa ko e tama a Iehoahasa ko e patuiki a Isaraela, ne eke ai mo patuiki a Amasia ko e tama a Ioasa ko e patuiki a Iuta.
2 Ko e uafulu ma lima e tau tau hana he eke ai a ia mo patuiki; ne uafulu ma hiva foki e tau ne patuiki ai a ia i Ierusalema. Ko e higoa foki he hana matua fifine ko Ioatana, ko e tagata Ierusalema a ia.
3 Ti eke e ia e mahani tututonu ki mua a Iehova, ka e nakai tuga a Tavita hana matua; ne eke ai e ia e tau mena oti tuga ne eke he matua hana ko Ioasa.
4 Ka e pete ia nakai uta kehe e tau mena tokoluga; ne eke agaia he motu e tau poa; mo e huhunu ai e lautolu e tau mena manogi ke he tau mena tokoluga.
5 Kua hoko ke he aho kua fakamau ai e kautu ke he hana tau lima, ti keli ai e ia hana tau fekafekau, ko lautolu ne keli e matua hana ko e patuiki.
6 Ka e nakai keli e ia e fanau ha lautolu ne keli tagata, ke lata mo e tau kupu ne tohi ke he tohi he fakatufono a Mose, ne poaki mai ai e Iehova, kua pehe mai, Aua neke keli e mutolu e tau matua ke hukui aki e fanau, ti ua keli e mutolu e fanau ke hukui aki e tau matua ha lautolu; ka kia takitaha e tagata mo e keli ai a ia ha ko e hana ni a hala.
7 Ne keli ai e ia e tau tagata Etoma ko e hogofulu e afe ke he pahua masima; ti fofo e ia a Sila ke he tau, ti ui ai e ia hana higoa ko Iokatielu kua hoko mai ke he aho nai.
8 Ti fakafano age e Amasia e tau fekau kia Ioasa ko e tama a Iehoahasa ko e tama a Iehu ko e patuiki a Isaraela, kua pehe age, Haele mai a a koe, kia feonoaki a taua.
9 Ti tali age ai a Ioasa ko e patuiki a Isaraela kia Amasia koe patuiki a Iuta, kua pehe age, Ne fakafano age he akau talatala ha ha i Lepanona ke he arasi ha ha i Lepanona, kua pehe age, Kia ta mai a e koe e tama fifine hāu ke eke mo hoana he tama haku; ka e fina age ai e manu he vao ha ha i Lepanona, mo e taholi ai e kau talatala.
10 Kua keli ni e koe a Etoma, ti fakatokoluga ai hau a loto; hula a a koe ke he mena ia, mo e nofo ai a koe ke he fale hau; ke fakatupu e kelea he ha e koe, ke malaia ai a koe, ko koe ni katoa mo Iuta fakalataha mo koe?
11 Ka e nakai fanogonogo a Amasia; ti hake ai a Ioasa ko e patuiki a Isaraela, ti feonoaki a laua ko ia mo Amasia ko e patuiki a Iuta i Petesemesa ko e maga i Iuta,
12 Ti keli ai a Iuta ki mua a Isaraela, kua taki taha a lautolu mo e fehola ke he tau fale ie ha lautolu.
13 Ti tapaki e Ioasa ko e patuiki a Isaraela a Amasia ko e patuiki a Iuta, ko e tama a Ioasa, ko e tama a ia a Ahasaia i Petesemesa, ti o mai ai a lautolu i Ierusalema, ti ulu moumou ai e ia e kaupa a Ierusalema, ne kamata mai he gutuhala a Efaraimo ke hoko atu ke he gutuhala he malokuaga, ko e fa e teau e kupita.
14 Ne uta foki e ia e tau auro mo e tau ario oti, katoa mo e tau kapiniu oti ne moua ai ke he fale a Iehova, mo e moua ai ke he mena ne tanaki ai e tau koloa ke he fale he patuiki, katoa mo e falu a iki ne uta ke eke mo tau tagata ke faliu kehe ai e ita. Ti liu atu a ia ki Samaria.
15 Ko e tau mena ne toe a Ioasa ne eke e ia, mo e hana malolo, mo e tau ha laua mo Amasia ko e patuiki a Iuta, nakai kia tohi ia ke he tohi ne toka ai e tau tala ke he tau nofoaga he tau patuiki a Isaraela?
16 Ti takoto ai a Ioasa fakalataha mo e hana tau matua ti tanu e lautolu a ia i Samaria fakalataha mo e tau patuiki a Isaraela; ti eke hana tama ko Ierepoamo ke hukui aki a ia.
17 Ne hogofulu ma lima e tau ne moui ai a Amasia ko e tama a Ioasa ko e patuiki a Iuta, tali he mate a Ioasa ko e tama a Iehoahasa ko e patuiki a Isaraela.
18 Ko e tau mena ne toe ne eke e Amasia, nakai kia tohi ai ke he tohi ne toka ai e tau tala ke he tau nofoaga he tau patuiki a Iuta?
19 Ne fakafualoto a lautolu kia ia i Ierusalema ti hola ai a ia ki Lakisa; ka e fakafano atu e lautolu falu ke tutuli a ia ki Lakisa, ti keli e lautolu a ia ke he mena ia.
20 Ti ta mai ai e lautolu a ia ki luga he tau solofanua; ti tanu e lautolu a ia i Ierusalema fakalataha mo e hana tau matua ke he maga a Tavita.
21 Ti uta ai he motu oti ko Iuta a Asaraia ke he tau hogofulu ma ono hana, mo e eke e lautolu a ia mo patuiki ke hukui aki hana matua ko Amasia.
22 Ne ati e ia a Elata mo e liuaki mai ai kia Iuta ka kua takoto tuai e patuiki fakalataha mo e hana tau matua.
23 Ko e tau ne hogofulu ma lima a Amasia ko e tama a Ioasa ko e patuiki a Iuta ne eke ai mo patuiki i Samaria a Ierepoamo ko e tama a Ioasa ko e patuiki a Isaraela, ti fagofulu ma taha e tau ne patuiki ai a ia.
24 Ti eke e ia e mahani kelea ki mua a Iehova, nakai fano kehe a ia mo e tau hala oti a Ierepoamo ko e tama a Nepata, ko ia ne fakatupu ai e hala kia Isaraela,
25 Ne liu fakamau ai e ia e katofia a Isaraela ne kamata mai he puhala ne fina age ai ki Hamato, ke hoko ke he tahi ha ha i ai e kelekele tatai, tuga ne kupu a Iehova ko e Atua a Isaraela, ne vagahau mai ai e ia ke he fekafekau hana ko Iona ko e tama a Amitai, ko e perofeta i Kataferu.
26 Ha kua fioia e Iehova e matematekelea a Isaraela kua lahi mahaki ni; kua nakai fai tagata kua nofo fakatupa, ti nakai fai tagata kua toka noa, ti nakai fai lagomatai ma Isaraela.
27 Ka e nakai vagahau mai e Iehova ke holoholo kehe e ia e higoa a Isaraela i lalo he lagi; ka e fakamoui ai e ia a lautolu ke he lima a Ierepoamo ko e tama a Ioasa.
28 Ko e tau mena ne toe ne eke e Ierepoamo, katoa mo e tau mena oti ne eke e ia, mo e hana malolo ne tau ai a ia, mo e liu fofo mai e ia a Tamaseko mo Hamato, ne eke ai e Iuta; nakai kia tohi ia ke he tohi ne toka ai e tau tala ke he tau nofoaga he tau patuiki a Isaraela?
29 Ti takoto a Ierepoamo fakalataha mo e hana tau matua, fakalataha mo e tau patuiki a Isaraela; ti eke hana tama ko Sakaria mo patuiki ke hukui aki a ia.