2 Tau Patuiki 15:1-38
15 KO e uafulu ma fitu e tau a Ierepoamo ko e patuiki a Isaraela ti eke ai mo patuiki a Asaraia ko e tama a Amasia ko e patuiki a Iuta.
2 Ko e hogofulu ma ono e tau tau hana he eke ai a ia mo patuiki, ti limagofulu ma ua e tau ne patuiki ai a ia i Ierusalema. Ko e higoa foki he matua fifine hana ko Iekalia, ko e tagata Ierusalema a ia,
3 Ne eke ai e ia e mahani tututonu ki mua a Iehova ke lata mo e tau mena oti ne eke e Amasia ko e matua tane hana.
4 Ka e nakai ni uta kehe e tau mena tokoluga; ne eke poa agaia he motu, mo e huhunu ai e tau mena manogi ke he tau mena tokoluga.
5 Ne ta foki e Iehova e patuiki, ti eke a ia mo lepela ke hoko ke he aho ne mate ai a ia; ti fale kehe a ia. Ka kua pule a Iotamo ko e tama he patuiki ke he magafaoa, kua fakafili ai e ia e tau tagata he motu.
6 Ko e tau mena ne toe ne eke a Asaraia, mo e tau mena oti ne eke e ia, nakai kia tohi ia ke he tohi ne toka ai e tau tala ke he tau nofoaga he tau patuiki a Iuta?
7 Kua takoto foki a Asaraia fakalataha mo e hana tau matua, ti tanu e lautolu a ia fakalataha mo e hana tau matua, ke he maga a Tavita; ti eke hana tama ko Iotamo mo patuiki ke hukui aki a ia.
8 Ko e tau tolugofulu ma valu a Asaraia ko e patuiki a Iuta, ne eke a Sakaria ko e tama a Ierepoamo mo patuiki a Isaraela i Samaria, ti ono e mahina ne patuiki ai a ia.
9 Ne eke e ia e mahani kelea ki mua a Iehova tuga ne eke he tau matua hana; nakai ni fano kehe a ia mo e tau hala a Ierepoamo ko e tama a Nepata, ko ia ne fakatupu ai e hala kia Isaraela.
10 Ti fakafualoto kia ia e Saluma ko e tama a Iapesi, ti keli e ia a ia ki mua he motu, ti tamate e ia a ia; ti eke a ia mo patuiki ke hukui aki a ia.
11 Ko e tau mena ne toe ne eke e Sakaria, kitiala kua tohi ai ke he tohi ne toka ai e tau tala ke he tau nofoaga he tau patuiki a Isaraela.
12 Ko e kupu haia a Iehova ne vagahau atu e ia kia Iehu, kua pehe atu, To nonofo ai e tau tama tane hāu ke he nofoaiki a Isaraela ke hoko ke he hau ne fa aki. Ti hoko ai ni pihia.
13 Ko e tolugofulu ma hiva e tau tau a Usia ko e patuiki a Iuta, he eke a Saluma ko e tama a Iapesi mo patuiki; ko e mahina katoa foki ne patuiki ai a ia i Samaria;
14 Ti hake a Manahema ko e tama tane a Kati i Tiresa, kua hoko ki Samaria, ti keli e ia a Saluma ko e tama a Iapesi i Samaria, ti tamate e ia a ia, ti eke a ia mo patuiki ke hukui aki a ia.
15 Ko e tau mena ne toe ne eke a Saluma, katoa mo e fakafualoto ne fakafualoto ai e ia, kitiala, kua tohi ke he tohi ne toka ai e tau tala ke he tau nofoaga he tau patuiki a Isaraela.
16 Ti keli e Manahema a Tipesa, mo latuolu oti ha i ai, mo e hana tau katofia ke kamata mai i Tiresa; ha kua nakai hafagi e lautolu e tau gutuhala kia ia, ne keli ai e ia a lautolu; ti ihi ai e tau manava he tau fifine fatu oti ha ha i ai.
17 Ko e tau tolugofulu ma hiva a Asaraia ko e patuiki a Iuta ne eke ai a Manahema ko e tama a Kati mo patuiki i Isaraela, ti hogofulu e tau ne patuiki ai a ia i Samaria.
18 Ne eke foki e ia e mahani kelea ki mua a Iehova; ko e tau aho oti he hana moui nakai fano kehe a ia mo e tau hala a Ierepoamo ko e tama a Nepata, ko ia ne fakatupu ai e hala kia Isaraela.
19 Ne fina age a Pula ko e patuiki a Asuria ke tau ke he motu; ka e ta age e Manahema taha e afe e taleni ario kia Pula, kia lagomatai e ia kia ia, ke fakamau ai e kautu kia ia.
20 Ti kotofa ai e Manahema e tau tupe kia Isaraela, ke he tau iki lalahi oti ne muhu koloa, ko e taki limagofulu e taleni he tau tagata ke uta ke he patuiki a Asuria. Ti liu atu ai e patuiki a Asuria nakai tuai nofo a ia ke he motu.
21 Ko e tau mena ne toe ne eke e Manahema, mo e tau mena oti ne eke e ia, nakai kia tohi ia ke he tohi ne toka ai e tau tala ke he tau nofoaga he tau patuiki a Isaraela.
22 Ti takoto a Manahema fakalataha mo e hana tau matua, ti eke ai e tama hana ko Pekahia mo patuiki ke hukui aki a ia.
23 Ko e tau ne limagofulu a Asaraia ko e patuiki a Iuta, ne eke ai a Pekahia ko e tama a Manahema mo patuiki a Isaraela i Samaria, ti ua e tau ne patuiki ai a ia.
24 Ne eke foki e ia e mahani kelea ki mua a Iehova, nakai fano kehe a ia mo e tau hala a Ierepoamo ko e tama a Nepata, ko ia ne fakatupu ai e hala kia Isaraela.
25 Ti fakafualoto kia ia a Peka ko e tama a Remalia ko e hana takitaki kau, ne keli e ia a ia ke he kolo ha ha he fale he patuiki; ko lautolu mo Arekopa, mo Arie, ne fakalataha foki mo ia e tau tagata Kiliata ne tokolimagofulu; ne keli e lautolu a ia, ti eke a ia mo patuiki ke hukuiaki a ia.
26 Ko e tau mena ne toe ne eke e Pekahia, katoa mo e tau mena oti ne eke e ia, kitiala, kua tohi ia ke he tohi ne toka ai e tau tala ke he tau nofoaga he tau patuiki a Isaraela.
27 Ko e tau ne limagofulu ma ua a Asaraia ko e patuiki a Iuta, ne eke ai a Peka ko e tama a Remalia mo patuiki a Isaraela i Samaria, ti uafulu e tau ne patuiki ai a ia.
28 Ne eke foki e ia e mahani kelea ki mua a Iehova, nakai ni fano kehe a ia mo e tau hala a Ierepoamo ko e tama a Nepata, ko ia ne fakatupu ai e hala kia Isaraela.
29 Ko e vaha ne patuiki ai a Peka i Isaraela, ne hau ai a Tikelata-pilesa ko e patuiki a Asuria, ti fofo ai e ia a Iono, mo Apela Petemaaka, mo Ianoa, mo Katesa, mo Hasora, mo Kiliata, mo Kalilaia, ko e tau motu oti a Nafatali; ti uta e ia a lautolu mo e fakapaea atu a lautolu kia Asuria.
30 Ti fakafualoto a Hosea ko e tama a Ela kia Peka ko e tama a Remalia, ti keli e ia a ia ti mate ai a ia; ti eke a ia mo patuiki ke hukui aki a ia, ke he tau uafulu a Iotamo ko e tama a Usia.
31 Ko e tau mena ne toe ne eke e Peka, katoa mo e tau mena oti ne eke e ia, kitiala, kua tohi ke he tohi ne tokai e tau tala ke he tau nofoaga he tau patuiki a Isaraela.
32 Ko e tau ua a Peka ko e tama a Remalia, ko e patuiki a Isaraela, ne eke ai mo patuiki a Iotamo ko e tama a Usia, ko e patuiki a Iuta.
33 Ko e uafulu ma lima e tau tau hana he eke a ia mo patuiki, ti hogofulu, ma ono e tau ne patuiki ai a ia i Ierusalema. Ko e higoa foki he hana matua fifine ko Ierusa ko e tama fifine a Satoka.
34 Ne eke foki e ia e tau mena tonu ki mua a Iehova; ne eke ai e ia tuga ne tau mena oti ne eke he matua hana ko Usia.
35 Ka ko e tau mena tokoluga nakai uta kehe; ne eke poa agaia he motu, mo e huhunu ai e tau mena manogi ke he tau mena toko luga. Ne eke ai e ia e gutuhala ke he fahi ki luga he fale a Iehova.
36 Ko e tau mena ne toe ne eke e Iotamo katoa mo e tau mena oti ne eke e ia, nakai kia tohi ia ke he tohi ne toka ai e tau tala ke he tau nofoaga he tau patuiki a Iuta?
37 Ko e vaha ia ne kamata ai e Iehova ke fakafano mai a Resina ko e patuiki a Suria, katoa mo Peka ko e tama a Remalia ke tau ki Iuta.
38 Ti takoto ai a Iotamo fakalataha mo e hana tau matua, ti tanu ai a ia fakalataha mo e hana tau matua ke he maga a Tavita; ti eke e tama hana ko Ahasa mo patuiki ke hukui aki a ia.