2 Tau Patuiki 16:1-20
16 KO e tau ne hogofulu ma fitu a Peka ko e tama a Remalia ne eke ai mo patuiki a Ahasa ko e tama a Iotamo ko e patuiki a Iuta.
2 Ne uafulu e tau tau a Ahasa he eke ai a ia mo patuiki; ti hogofulu ma ono e tau ne patuiki ai a ia i Ierusalema; kua nakai eke ai e ia a mahani tututonu ki mua a Iehova tuga na Tavita hana matua.
3 Ka kua fano ai a ia ke he puhala he tau patuiki a Isaraela, mo e fakafano age e ia hana tama tane ki loto he afi, tuga ne mahani fakalialia he tau motu kehe ne vega kehe ai e Iehova ki mua he fanau a Isaraela.
4 Kua eke poa foki e ia, mo e huhunu ai e tau mena manogi ke he tau mena tokoluga ki luga foki he tau matiketike, katoa mo lalo he tau akau lau uhiuhi oti.
5 Ko e vaha ia ne o hake ai a Resina ko e patuiki a Suria, mo Peka ko e tama a Remalia ko e patuiki a Isaraela ke tau ki Ierusalema ti pa takai ai e laua a Ahasa, ka e nakai maeke kia laua ke kautu kia ia.
6 Ko e vaha ia ne liu fofo ai e Resina ko e patuiki a Suria a Elata ma Suria, ti vega e ia e tau tagata Iuta i Elata; ti o mai ai e tau tagata Suria ki Elata, kua nonofo ai a lautolu kua hoko mai ni ke he aho nai.
7 Ti fakafano atu ai e Ahasa e tau fekau kia Tikelata-pilesa ko e patuiki a Asuria, kua pehe atu, Ko au ko e hāu a fekafekau mo e hau a tama, Kia haele mai a koe ke laveaki au mai he lima he patuiki a Suria mo e lima he patuiki a Isaraela, kua o mai a laua ke tau kia au.
8 Kua uta foki e Ahasa e tau ario mo e tau auro ne ha i ai ke he fale a Iehova, mo e tau mena ke he tanakiaga koloa ke he fale he patuiki, ti fakafano atu ai e ia mo mena fakaalofa ke he patuiki a Asuria.
9 Ti fanogonogo ai e patuiki a Asuria kia ia, ti hake ai e patuiki a Asuria ki Tamaseko, mo e fofo ai e ia, mo e fakapaea atu e ia a lautolu ki Kira, ne kelipopo foki e ia a Resina.
10 Ti hake atu ai e patuiki ko Ahasa ki Tamaseko ke feleveia mo Tikelata-pilesa ko e patuiki a Asuria; ti fakafano atu ai he patuiki ko Ahasa kia Uria ko e ekepoa e fakatai he fatapoa mo e hana fafati, ko e hana tauteaga oti ni.
11 Ti eke ai e Uria ko e ekepoa e fatapoa ke lata mo e tau mena oti ne poaki mai ai he patuiki ko Ahasa i Tamaseko; kua eke pihia e Uria ke tatali atu ke he patuiki ko Ahasa ka hau ai a ia i Tamaseko.
12 Kua hau e patuiki iTamaseko, ti kitia ai he patuiki e fatapoa; ti fakatata ai e patuiki ke he fatapoa, ti eke poa ai e ia ki luga hana.
13 Ti huhunu ai e ia hana poa huhunu, mo e hana poa mena kai, kua liligi foki e ia hana poa inu, kua pīpī foki e ia e toto he hana tau poa fakaaue ki luga he fatapoa.
14 Ti uta kehe e ia e fatapoa apa kula ha i mua a Iehova mai mua he fale, mai he vaha he fatapoa mo e fale a Iehova, mo e tuku ai ke he fahi tokelau he fatapoa.
15 Ti poaki age he patuiki ko Ahasa ke he ekepoa ko Uria, kua pehe age, Kia huhunu ki luga he fatapoa lahi e poa huhunu ke he pogipogi, mo e poa mena kai ke he afiafi, katoa foki mo e poa huhunu he patuiki, mo e hana poa mena kai, ko e tau poa huhunu foki he tau tagata oti he motu, katoa mo e ha lautolu a tau poa mena kai, mo e ha lautolu a tau poa inu; ti pipi ai ki luga hana e toto he tau poa huhunu, mo e toto oti he tau poa; ka e toka ai kia au e fatapoa apa kula, ke kumi atu ai e au.
16 Ti eke ai e Uria ko e ekepoa tuga ne tau mena oti ne poaki mai ai he patuiki ko Ahasa.
17 Ne hehele kehe foki he patuiki ko Ahasa e tau fahi ne takai aki e tau fakatuaga kumete ti uta kehe e ia e kumete apa kula ke holoholo ai mai luga ai he tau mena ia, ti ta hifo ai e ia e vai mai luga he tau povi apa kula ha ha i lalo hana, mo e tuku ai e ia ki luga he tau maka oti.
18 Ne liliu foki e ia ke he fale a Iehova e fakamaluaga ma e aho sapati ne eke ai e lautolu ke he fale, katoa mo e hala he patuiki i fafo, ha ko e patuiki a Asuria.
19 Ko e tau mena ne toe ne eke e Ahasa, nakai kia tohi ia ke he tau tohi ne tohi ai e tau tala ke he tau nofoaga he tau patuiki a Iuta?
20 Ti takoto a Ahasa fakalataha mo e hana tau matua, ti tanu ai a ia fakalataha mo e hana tau matua ke he maga a Tavita; ti eke ai e tama hana ko Hesekia mo patuiki ke hukui aki a ia.