2 Tau Patuiki 18:1-37
18 KO e tau tolu a Hosea ko e tama a Ela ko e patuiki a Isaraela ne eke mo patuiki a Hesekia ko e tama a Ahasa ko e patuiki a Iuta
2 Ne uafulu ma lima e tau tau hana he eke a ia mo patuiki; ti uafulu ma hiva e tau ne patuiki ai a ia i Ierusalema. Ko e higoa foki he hana matua fifine ko Avi ko e tama fifine a Sakaria.
3 Ne eke e ia e tau mena tonu ki mua a Iehova, tuga ne tau mena oti ne eke he matua hana ko Tavita.
4 Ne uta kehe e ia e tau mena tokoluga ti tukimalipilipi e ia e tau tupua, ti hio ki lalo e ia e tau tupua a Asaira, ne tukimalipilipi foki e ia e gata apa kula ne eke e Mose; ha ko e mena hoko ni ke he vaha ia ne huhunu he fanau a Isaraela e tau mena manogi ke he gata ia, ti ui ai e ia, ko e potu apa kula.
5 Ne tua a ia kia Iehova ko e Atua a Isaraela; ti nakai fai tagata ke tatai mo ia he tau patuiki oti a Iuta ne mumui atu kia ia, ti pihia foki mo lautolu ne fakamua atu kia ia.
6 Ne pipiki ni a ia kia Iehova, ti nakai fano kehe a ia he mui atu kia ia, ka e omaoma a ia ke he hana tau poaki ne poaki mai ai e Iehova ia Mose.
7 Ne ha i ai a Iehova mo ia, ti monuina ai a ia ke he tau mena oti ne fano a ia ki ai; ti fakafualoto a ia ke he patuiki a Asuria, mo e nakai fekafekau a ia kia ia.
8 Ti keli ai e ia e tau tagata Filisitia ke hoko ni ki Kasa mo e hana tau katofia; ko e kolo he tau tagata toko, katoa mo e maga kua nofo taue.
9 Ne fa e tau he patuiki ko Hesekia, ko e fitu foki ia e tau a Hosea ko e tama a Ela ko e patuiki a Isaraela, ti hake ai a Salemanesa ko e patuiki a Asuria ki Samaria, ti pa takai ai e ia.
10 Kua mole foki tolu e tau ti fofo ai e lautolu e maga; ko e tau ono ia a Hesekia, ko e tau hiva foki haia a Hosea ko e patuiki a Isaraela, ne fofo ai a Samaria.
11 Ti uta he patuiki a Asuria a Isaraela mo e fakapaea atu e ia a lautolu ki Asuria, ti fetuku atu e ia a lautolu ki Hala mo Havoli ne tata age ke he vailele ko Kosana, katoa mo e tau maga a Metai.
12 Ha kua nakai fanogonogo a lautolu ke he leo a Iehova ha lautolu a Atua, ka e holi e lautolu hana maveheaga, ko e tau mena oti ne poaki mai ai e Mose ko e fekafekau a Iehova, nakai fanogonogo a lautolu ki ai, ti nakai eke ai e lautolu.
13 Ko e tau hogofulu ma fa he patuiki ko Hesekia, ne hake ai a Sanerivi ko e patuiki a Asuria ke he tau maga oti kua nonofo ke he tau taue i Iuta mo e tau ki ai a ia, ti eke ai e ia māna.
14 Ti fakafano atu e Hesekia ko e patuiki a Iuta ke he patuiki a Asuria i Lakisa, kua pehe atu, Kua hehe tuai; kia haele kehe a koe ia au; ka ko e mena ke kotofa mai e koe kia au to eke ai e au. Ti kotofa mai ai he patuiki a Asuria kia Hesekia ko e patuiki a Iuta tolu e teau e taleni ario, mo e tolugofulu e taleni auro.
15 Ti ta age e Hesekia kia ia e tau ario oti ne moua ai e ia ke he fale a Iehova, mo e tau ario ne moua ai ke he mena ne tatanaki ai e tau koloa ke he fale he patuiki.
16 Ko e vaha ia ne fofole ai e Hesekia e auro ha ha i ai ke he tau gutuhala he faituga a Iehova, katoa mo e tau pou ne fakakili aki ke he auro e Hesekia ko e patuiki a Iuta, ti ta age ai ke he patuiki a Asuria.
17 Ti fakafano mai he patuiki a Asuria a Taretana, mo Ravesarisa, mo Ravesake, mo e kau lahi i Lakisa ke he patuiki ko Hesekia i Ierusalema. Ti o hake ai a lautolu, ti hohoko atu a Ierusalema. Kua o hake a lautolu, ti o mai ai a lautolu, ti tutu tata age a lautolu ke he hala vai he namo i luga ke he puhala tu he fonua he tagata unu tapulu.
18 Ti ui mai a lautolu ke he patuiki, ti o atu ai kia lautolu a Eliakimo ko e tama a Hilikia ko ia ne pule ke he magafaoa, mo Sevena ko e tohikupu, mo Ioaa ko e tama a Asafo ko e tagata fakamau kupu.
19 Ti pehe age a Ravesake kia lautolu, Kia pehe atu a mutolu kia Hesekia, Kua vagahau mai pehe he patuiki lahi, ko e patuiki a Asuria, Ko e heigoa kia e mena nai ke tua ki ai kua tua ai a koe;
20 Kua pehe a koe (ka ko e tau kupu noa ni,) ha ha ia koe e pulotu mo e malolo ke lata mo e tau; hanai, ko hai kia kua tua ki ai a koe kua fakafualoto mai ai a koe kia au?
21 Kitiala, kua tua a koe ke he tokotoko na ko e kaho kua maihiihi ko Aikupito, ka tokotoko ai e tagata ti tuina ai hana lima ti ati ni; kua pihia a Farao ko e patuiki a Aikupito kia lautolu oti kua tua kia ia.
22 Kaeke foki ke pehe mai a mutolu kia au, Kua tua a mautolu kia Iehova ha mautolu a Atua; nakai kia ko ia ne uta kehe ai e Hesekia hana tau mena tokoluga mo e hana tau fatapoa, mo e pehe atu a ia kia Iuta mo Ierusalema, Kia hufeilo a mutolu ki mua he fatapoa nai?
23 Hanai, kia ta mai ā e koe falu a mena ke fakamau aki e fakafua ke he haku a iki ko e patuiki a Asuria, ti ta atu ai e au kia koe ua e afe e solofanua, kaeke kua maeke kia koe ke ta mai e tau tagata kua lata ke heke ai.
24 Ti maeke fefe kia koe ke vega taha takitaki kau ne muikau kiliku he tau fekafekau he haku iki? Ka kua tua a koe ki Aikupito ke moua ai e tau kariota mo e kau heke solofanua.
25 Ti kua kau noa kia au mo Iehova he hau ai au ke he mena nai ke fakaoti ai a ia? Ne pehe mai a Iehova kia au, Hake a a koe ke he motu na mo e fakaoti ai e koe a ia.
26 Ti pehe age a Eliakimo ko e tama a Hilikia, mo Sevena, mo Ioaa, kia Ravesake, Kia vagahau mai a koe ke he hau a tau fekafekau ke he vagahau Arama, ko e mena logona ai e mautolu; ka e au neke vagahau mai a koe kia mautolu ke he vagahau Iuta ke fanogonogo ai e tau tagata ha ha i luga he kaupa.
27 Ti tali age ai a Ravesake kia lautolu, Kua fakafano mai kia au he iki haku ke he iki hau katoa mo koe ke vagahau atu e au ke he tau kupu ia, ka e nakai kia fakafano mai au ke he tau tagata kua nonofo ki luga he kaupa, kia kai ai e lautolu ha lautolu a otaota, mo e inu e lautolu ha lautolu a ligi vai fakalataha mo mutolu?
28 Ti tu ai a Ravesake ti ui e ia mo e leo lahi ke he vagahau Iuta, kua pehe age, Fanogonogo mai ā a mutolu ke he tau kupu he patuiki lahi, ko e patuiki a Asuria;
29 Kua vagahau mai pehe e patuiki, Aua neke fakavai e Hesekia a mutolu; ha kua nakai maeke kia ia ke laveaki a mutolu mai he lima hana.
30 Aua neke fakatupu foki e Hesekia ha mutolu a tua kia Iehova, kua pehe atu a ia, To laveaki mai ni e Iehova a tautolu; nakai tuku atu e maga nai ke he lima he patuiki a Asuria.
31 Aua neke fanogonogo a mutolu kia Hesekia ha kua vagahau mai pehe e patuiki a Asuria, Kia eke e tautolu ke mafola a tautolu mo au, ti o mai a a mutolu kia au, ti takitaha a mutolu mo e kai ke he hana ni a vine, ke takitaha foki ke he hana ni a mati, mo e takitaha a mutolu mo e inu magavai ai ke he hana ni a vaikeli;
32 Ato fina atu ai au mo e uta a mutolu ke he motu tuga ne motu ha mutolu, ko e motu ne toka ai e saito mo e uaina, ko e motu ne toka ai e areto mo e tau uluvine, ko e motu ne ha i ai e puke lolo olive mo e meli; kia momoui a mutolu ka e aua neke mamate; ti ua fanogonogo a mutolu kia Hesekia ke fakaohooho e ia a mutolu, kua pehe atu, To laveaki mai e Iehova a tautolu.
33 Kua laveaki nakai he taha atua he tau motu oti, hana motu mai he lima he patuiki a Asuria?
34 Ko fe kia e tau atua a Hamata mo Arepata Ko fe kia e tau atua a Sefavaima, a Hena mo Iva? Ne laveaki nakai e lautolu a Samaria mai he lima haku?
35 Ko hai kia he tau atua oti he tau motu kua laveaki e tau motu ha lautolu mai he lima haku, kia laveaki ai e Iehova a Ierusalema mai he lima haku?
36 Ti fakamamate e motu, nakai tali age a lautolu ha kupu kia ia; ha kua pehe mai e poaki he patuiki, Aua neke tali age a mutolu kia ia.
37 Ti o mai ai a Eliakimo ko e tama a Hilikia, ko e tagata ne pule ke he magafaoa, mo Sevena ko e tohikupu, mo Ioaa ko e tama a Asafo ko e tagata fakamau kupu, ne o age a lautolu kia Hesekia, mo e ha lautolu a tau tapulu kua mahehe, ti tala age e lautolu kia ia e tau kupu a Ravesake.