2 Tau Patuiki 20:1-21
20 KO e tau aho ia ne gagao ai a Hesekia kua teitei mate a ia. Ti fina age kia ia e perofeta ko Isaia ko e tama a Amota kua pehe age kia ia, Kua vagahau mai pehe a Iehova, Kia mavehe a koe mo e hāu a magafaoa, ha ko e matulei ha ne fai a koe nakai ni moui a koe.
2 Ti haga atu a ia hana fofoga ke he kaufale, ti liogi atu a ia kia Iehova, kua pehe atu.
3 Iehova na e, kua ole atu e au, kia manatu mai e koe ke he haku a fano ki mua hāu mo e fakamoli, mo e loto katoa, ne eke foki e au e tau mena ne finagalo ai e koe. Ti tagi lahi ai a Hesekia.
4 Ti nakaila hoko atu a Isaia ke he loto uho he maga, kua hoko mai ai e kupu a Iehova kia ia kua pehe mai.
5 Kia liu age a koe, ti pehe age a koe kia Hesekia ko e takitaki he haku motu, Kua talahau mai pehe a Iehova ko e Atua a Tavita ko e matua hau, Kua fanogonogo e au ke he hau a liogi, kua kitia e au hau a tau hihina mata; kitiala, to fakamalolo e au a koe, ka mole atu ua e aho to hake ai a koe ke he fale a Iehova.
6 To lafilafi atu foki e au ke he tau aho he moui hāu hogofulu ma lima e tau; to laveaki foki e au a koe katoa mo e maga nai mai he lima he patuiki a Asuria to fakamalu ai foki e au e maga nai ha ko au ni, ha ko Tavita foki haku a fekafekau.
7 Ti pehe age ai a Isaia kia uta e mutolu e lafiaga fua mati, ti uta e lautolu ti tuku ai e lautolu ke he mena ne fufula, ti malolo ai a ia.
8 Ti pehe age a Hesekia kia Isaia, Ko e heigoa kia e fakamailoga ke iloa ai to fakamalolo e Iehova au, ke hake ai au ke he faituga ke he aho tolu?
9 Ti tali age ai a Isaia, Ko e fakamailoga kia koe mai ia Iehova, ke iloa ai e koe to eke e Iehova e mena kua vagahau mai ai e ia, hanai, Po ke fina atu ki mua e ata he la hogofulu e veveheaga, po ke liu atu hogofulu e veveheaga?
10 Ti pehe age a Hesekia, Ko e mena tote ke hifo e ata hogofulu e veveheaga; aua neke pihia, ka kia liu atu ki tua e ata hogofulu e veveheaga.
11 Ti ui atu e Isaia ko e perofeta kia Iehova, ti fakaliu atu ai e ia e ata hogofulu e veveheaga kua oti hana a hifo ai ke he mena a Ahasa ne veveheaki e tau maga la.
12 Ko e vaha ia ne fakafano mai ai e Perotapalata ko e tama a Palata ko e patuiki a Papelonia, e falu ke ta mai e tau tohi mo e tau mena fakaalofa kia Hesekia; he logona e ia ne gagao a ia.
13 Ti fanogonogo a Hesekia kia lautolu, ti fakakite atu e ia kia lautolu e fale ne toka ai hana tau koloa, ko e ario, mo e auro, mo e tau mena manogi, mo e puke lolo mitaki; katoa mo e fale oti ne toka ai hana tau kanava akau, mo e tau mena oti ha ha i ai ke he hana tau mena ne tatanaki ai e koloa; nakai fai mena ke he hana fale mo e hana motu oti kua nakai fakakite atu ai e Hesekia kia lautolu.
14 Ti fina age ai e perofeta ko Isaia ke he patuiki ko Hesekia, kua pehe age kia ia, Ko e heigoa kia ne talahau ai e tau tagata na? Ne o mai i fe foki a lautolu kia koe? Ti tali age ai e Hesekia, Ko e motu mamao ne o mai ai a lautolu, ko Papelonia.
15 Ti pehe age a ia, Ko e heigoa kia kua kitia e lautolu ke he fale hau? Ti pehe age a Hesekia, Ne kitia e lautolu e tau mena oti ke he fale haku nakai fai mena ke he haku mena ne tatanaki ai e koloa kua nakai fakakite atu e au kia lautolu.
16 Ti pehe age a Isaia kia Hesekia, Kia fanogonogo mai a a koe ke he kupu a Iehova.
17 Kua pehe mai a Iehova, Kitiala, to hoko mai e tau aho ke uta ai ki Papelonia e tau mena oti ha ha he fale hāu katoa mo e tau mena oti ne tatanaki ai he tau matua hāu ke hoko mai ke he aho nai; ti nakai ni toe ha mena taha.
18 To uta foki e lautolu falu he tau tama tane hau ke tutupu mai ia koe, ke fanau ai e koe, ti eke a lautolu mo tau eunuka ke he fale he patuiki a Papelonia.
19 Ti pehe age a Hesekia kia Isaia, Kua mitaki e kupu a Iehova kua vagahau mai ai e koe, kua pehe age foki a ia, Nakai kia mitaki kaeke ke ha i ai e mafola mo e fakamoli ke he tau aho he haku a moui?
20 Ko e tau mena ne toe ne eke e Hesekia, mo e hana malolo oti, mo e vai namo mo e hala vai ne eke e ia, ne tafe mai ai e vai ki loto he maga, nakai kia tohi e tau mena ia ke he tohi ne toka ai e tau tala ke he tau nofoaga he tau patuiki a Iuta?
21 Ti takoto a Hesekia fakalataha mo e hana tau matua, ti eke ai hana tama ko Manase mo patuiki ke hukui aki a ia.