2 Tau Patuiki 22:1-20
22 KO e valu e tau a Iosia he eke ai a ia mo patuiki, ti tolugofulu ma taha e tau ne patuiki ai a ia i Ierusalema. Ko e higoa foki he hana matua fifine ko Ietita ko e tama fifine a Ataia ko e tagata Potikati.
2 Ne eke ai e ia e mahani tututonu ki mua a Iehova, ne fano foki a ia ke he puhala oti a Tavita hana matua, nakai fano kehe ai a ia ke he fahi matau, po ke fahi hema.
3 Ko e tau hogofulu ma valu ne pule ai e patuiki ko Iosia, ne fakafano atu ai he patuiki a Safana ko e tama a Asalaia, ko e tama a ia a Mesulama, ko e tohikupu, ke he fale a Iehova, kua pehe atu,
4 Kia hake a a koe kia Hilikia ko e ekepoa ne mua, kia totou ai e ia e tau tupe oti kua ta mai ke he fale a Iehova, ko e tau mena ne tatanaki mai he motu e lautolu ne leoleo e tau gutuhala;
5 Mo e ta age ai e lautolu kia lautolu kua eke e gahua, ko e tau leoleo he fale a Iehova, ti uta ai e lautolu kia lautolu kua eke e gahua ke he fale a Iehova, ke taute ai e tau mena he fale ne maona;
6 Ne ta age ai ke he tau tufuga eke akau mo e tau tufuga ati fale, mo e tau tagata ati pa, ke fakafua aki foki e tau akau mo e tau maka tātā, ke taute aki e fale.
7 Ka e nakai fakafili a lautolu he tau tupe ne ta age ai ke he tau lima ha lautolu; ha kua eke e lautolu mo e fakamoli ni.
8 Ti pehe age a Hilikia ko e ekepoa ne mua kia Safana ko e tohikupu, Kua moua e au e tohi he fakatufono ke he fale a Iehova. Ti ta age e Hilikia e tohi kia Safana ti totou ai e ia.
9 Ti hau ai a Safana ko e tohikupu ke he patuiki, ti tala age a ia ke he patuiki, kua pehe age, Kua liligi he tau fekafekau hāu e tau tupe ne moua ai ke he fale, kua ta age foki ia kia lautolu kua eke e gahua, ko e tau leoleo ke he fale a Iehova.
10 Ti tala age e Safana ko e tohikupu ke he patuiki, kua pehe age, Ne ta mai e Hilikia ko e ekepoa e tohi kia au. Ti totou ai e Safana ki mua he patuiki.
11 Kua logona he patuiki e tau kupu he tohi he fakatufono, ti hehe ai e ia hana tau tapulu.
12 Ti pehe age ai e patuiki kia Hilikia ko e ekepoa, mo Aikamo ko e tama a Safana, mo Akapora ko e tama a Mikaia, mo Safana ko e tohikupu, katoa mo Asaia ko e fekafekau he patuiki, kua pehe age,
13 Kia o a a mutolu, ti huhu atu a mutolu kia Iehova maku, mo e motu, katoa foki ma Iuta oti ni ke he tau kupu he tohi nai kua moua, ha kua tupu lahi ni e ita a Iehova kia tautolu, ha kua nakai fanogonogo e tau matua ha tautolu ke he tau kupu he tohi nai ke eke ai e lautolu ke lata mo e tau mena oti kua tohi mai ai kia tautolu.
14 Ti o atu ai a Hilikia ko e ekepoa, mo Aikamo, mo Akapora, mo Safana, mo Asaia kia Hulata ko e perofeta fifine ko e hoana a Saluma ko e tama a Tikeva, ko e tama a ia a Harehasa, ko e tagata ne leveki e tau tapulu, (ne nofo a ia i Ierusalema ke he mena ne talahaua ko e maga ne ua aki;) ti vagahau ai a lautolu mo ia,
15 Ti pehe age a ia kia lautolu, Kua talahua mai pehe a Iehova ko e Atua a Isaraela. Kia pehe age a mutolu ke he tagata ne fakafano mai a mutolu kia au,
16 Kua talahau mai pehe a Iehova, Kitiala ko e tamai ha ne fai e au e malaia ke he mena nai katoa mo lautolu kua nonofo ai, ko e tau kupu oti ni he tohi kua totou ai he patuiki a Iuta;
17 Ha kua tiaki e lautolu au ka e huhunu e lautolu e tau mena manogi ke he tau atua kehe kia fakahogohogomanava mai a lautolu kia au ke he tau mena oti ne eke ai he tau lima ha lautolu; ko e mena ia ni ko e puho ha ne fai haku a ita ke he mena nai, ti nakai ni tamate,
18 Ka ko e patuiki a Iuta ne fakafano mai a mutolu ke huhu kia Iehova, kia tala age pehe a mutolu kia ia, Kua talahau mai pehe a Iehova ko e Atua a Isaraela ke he tau kupu ne fanogonogo a koe ki ai,
19 Ha kua molu hāu a loto, ti fakatokolalo ai a koe ki mua a Iehova, he fanogonogo a koe ke he tau mena ne vagahau atu ai e au ke he mena nai, mo lautolu ne nonofo ai, ke eke a lautolu mo tau tagata ke ofo ki ai, mo tau tagata foki ke kaialu ki ai, kua hēhē foki e koe hau a tau tapulu, mo e tagi a koe ki mua haku; kua pehe mai a Iehova. Kua fanogonogo foki e au kia koe.
20 Ko e hanai, kitiala, to lafi atu e au a koe ke he hāu a tau matua, to hoko atu foki a koe ke he hau a tukuaga mo e mafola; ka e nakai kitia e koe e tau malaia oti ke ta mai ai e au ke he mena nai. Ti liliu a lautolu mo e tala age ai e lautolu ke he patuiki.