2 Tau Patuiki 25:1-30
25 NE hiva e tau, ti hogofulu e mahina he eke ai a ia mo patuiki, ko e aho hogofulu he mahina ti hau ai a Nepukanesa ko e patuiki a Papelonia, ki Ierusalema, ko ia mo e hana kau oti, ti heapi ai a lautolu, mo e eke takai ai e lautolu e tau kolo ke tau mo ia.
2 Ti pa takai ai e maga kua hoko ke he tau hogofulu ma taha he patuiki ko Setekaia.
3 Ko e aho hiva foki he mahina fa ne tupu lahi ai e hoge ke he maga, ti nakai fai mena kai ma e tau tagata he motu.
4 Ti maona ai e maga, ti fehola ai e kau oti he po ke he puhala ke he gutuhala, ke he vaha he na kaupa ua, ne tata age ke he fonua he patuiki; (ne agaagai foki e maga he tau tagata Kaletaia;) ne fano foki e patuiki he puhala ke he kelekele tatai.
5 Ti tutuli he kau he tau tagata Kaletaia e patuiki ti moua ai e lautolu a ia ke he kelekele tatai a Ieriko;ti fakamavehevehe mai ia ia hana kau oti.
6 Ti tapaki e lautolu e patuiki, mo e ta hake e lautolu a ia ke he patuiki a Papaelonia i Ripela; ti vagahau ai e lautolu mo ia ke he fakahala.
7 Ne kelipopo foki e lautolu e tau tama tane tokoua a Setekaia ki mua hana; ti fakapouli e lautolu hana tau mata, mo e lili e lautolu a ia ke he tau liliaga apakula, mo e uta a ia ki Papelonia,
8 Ko e mahina lima ko e aho fitu he mahina ko e tau hogofulu ma hiva haia he patuiki ko Nepukanesa ko e patuiki a Papelonia ne hau ai ki Ierusalema a Nepusatana ko e takitaki he kau leoleo, ko e fekafekau he patuiki a Papelonia.
9 Ti huhunu ai e ia e fale a Iehova, mo e fale he patuiki, katoa mo e tau fale oti i Ierusalema; ko e tau fale lalahi oti foki ne huhunu ai e ia ke he afi.
10 Ne ulu moumou foki he kau oti he tau tagata Kaletaia ne ha i ai mo e takitaki he kau leoleo e kaupa ne takai aki a Ierusalema.
11 Ko lautolu ne toe he motu ne ha i ai agaia ke he maga, mo lautolu ne fehola, ko lautolu ne fehola ke he patuiki a Papelonia, katoa mo lautolu ne toe he motu o tagata, ne uta kehe ai e Nepusatana ko e takitaki he kau leoleo a lautolu.
12 Ka e toka ai he takitaki he kau leoleo e falu ko e tau tagata nonofogati he motu ke eke mo tau tagata taute vine, mo e tau tagata gahua fonua.
13 Ko e tau pou apa kula foki ne ha i ai ke he fale a Iehova, mo e tau fakatuaga kumete, katoa mo e vai apa kula ne ha i ai ke he fale a Iehova, ne lipilipi ai he tau tagata Kaletaia ti uta ai e lautolu e apa kula ia ki Papelonia.
14 Ne uta foki e lautolu e tau ulo mo e tau aku, mo e tau helehele vavae, mo e tau kapiniu, katoa mo e tau mena apa kula oti ne eke aki e lautolu e fekafekauaga.
15 Ne uta foki he takitaki he kau leoleo, e tau kumete ma e tau efuefu afi, mo e tau kumete; ko e auro, ko e tau mena ne eke aki he auro, mo e ario ko e tau mena ne eke aki he ario.
16 Ko e tau pou ne ua, ko e vai ne taha. katoa mo e tau fakatuaga kumete ne eke e Solomona ma e fale a Iehova; nakai ni fafati e mamafa he tau mena oti na.
17 Ko e loa he taha pou ko e hogofulu ma valu e kupita, ko e kapetala apa kula foki ha i luga hana; ko e loa he kapetala ko e tolu e kupita; ko e mena kua taute po ke kupega mo e tau rimoni ha ha he kapetala ne takai aki, ko e apa kula oti ia; ti tuga ne tau mena ia e tau mena ke he pou ne ua aki katoa mo e mena fakakupega.
18 Ne uta foki he takitaki he kau leoleo a Seraia ko e ekepoa ne mua, mo Sefanaia ko e ekepoa he vahega ne ua aki katoa mo e tau leoleo gutuhala tokotolu.
19 Ti uta foki e ia mai he maga taha fekafekau ne mua ne kotofa ke pule ke he kau, mo e tau tagata tokolima ia lautolu ne kitia e fofoga he patuiki, ne moua a lautolu ke he maga, mo e tohikupu he takitaki kau, ne fakapotopoto ai e tau tagata he motu; katoa mo e tokoonogofulu e tagata he motu ne moua ai ke he maga.
20 Ti uta e Nepusatana ko e takitaki he kau leoleo a lautolu, mo e takitaki e ia a lautolu ke he patuiki a Papelonia i Ripelā.
21 Ti keli he patuiki a Papelonia a lautolu, ne tamate ai e ia a lautolu i Ripelā, ke he motu ko Hamato. Ti fakapaea a Iuta mai he kelekele ha lautolu.
22 Ka ko e tau tagata ne toe ke he motu ko Iuta, ne toka ai e Nepukanesa ko e patuiki a Papelonia, ne kotofa a Ketalia ko e tama a Aikamo, ko e tama a ia a Safana, ke pule a ia kia lautolu.
23 Ne logona ai he tau takitaki kau oti, ko lautolu mo e tau tagata ha lautolu, kua kotofa he patuiki a Papelonia a Ketalia ke pule, ti o mai ai a lautolu kia Ketalia i Misepa, ko Isamaeli ko e tama a Netanaia, mo Iohanana ko e tama a Karea, mo Seraia ko e tama a Tanumeta ko e tagata Netopa, mo Iaasania ko e tama he tagata Maaka, ko lautolu mo e tau tagata ha lautolu.
24 Ti omonuo ai a Ketalia kia lautolu, mo e tau tagata ha lautolu, ne pehe age foki a ia kia lautolu, Ua matakutaku a mutolu ha ko e tau fekafekau he tau tagata Kaletaia kia nonofo a a mutolu ke he motu, mo e fekafekau a mutolu ke he patuiki a Papelonia, ti monuina ai a mutolu.
25 Ka kua hoko ke he mahina fitu, ti o mai ai a Isamaeli ko e tama a Netanaia, ko e tama a ia a Elisama, ko e magafaoa taha a laua mo e patuiki, mo e tau tagata tokohogofulu fakalataha mo ia, ti keli e lautolu a Ketalia, ti mate ai a ia katoa mo e tau tagata Iuta mo e tau tagata Kaletaia ha ha ia ia i Mitepa.
26 Ti mamatike ai e motu oti, ko e tau tama ikiiki mo e tau tagata momotua, katoa mo e tau takitaki kau, ti o atu a lautolu ki Aikupito, ha kua matakutaku a lautolu ke he tau tagata Kaletaia.
27 Kua hoko ke he tau tolugofulu ma fitu he paeaaga a Iehoakina ko e patuiki a Iuta, ko e mahina hogofulu ma ua, ko e aho uafulu ma fitu he mahina, ti fakatokoluga ai e ulu a Iehoakina ko e patuiki a Iuta mo e ta mai ai a ia he fale puipui he pule a Evilemerota ko e patuiki a Papeloma ke he tau ne eke ai a ia mo patuiki;
28 Ti vagahau atu e ia mo e fakaalofa kia ia mo e tuku atu e ia hana nofoaiki ke mua ke he tau nofoaiki he tau patuiki ne ha i ai mo ia i Papelonia;
29 Ti totogi aki e ia hana tau tapulu ne tapulu ai a ia ke he fale puipui; ti kai mena ai a ia nakai noa ki mua hana ke he tau aho oti he hana moui.
30 Ko e hana tufaaga foki, ko e tufaaga mau ne momoi atu kia ia he patuiki ke he taha aho mo e taha aho, ke he tau aho oti he hana moui.