2 Tau Patuiki 5:1-27
5 KO Naamanu ko e takitaki kau he patuiki a Suria, ko e tagata aoga a ia ke he hana iki mo e talahaua ni, ha ko ia ne hoko mai ai e monuina ia Iehova ki Suria; ko ia foki ko e toa malolo, ka ko e lepela a ia.
2 Ne o atu e tau kau a Suria ti ta mai ai e lautolu he motu ko Isaraela taha tama fifine tote ne fofo he tau, ti eke a ia mo fekafekau he hoana a Naamanu.
3 Ti pehe age a ia ke he hana iki fifine, Ane mai kua fakalataha haku iki mo e perofeta ha ha i Samaria, po kua fakamalolo e ia a ia he hana lepela.
4 Ti fano taha, kua tala age ke he hana iki, kua pehe age, Ne pehe, mo e pehe e tau kupu he tama fifine mai he motu ko Isaraela.
5 Ti pehe age ai e patuiki a Suria, Hau ā ke fano, to fakafano atu ai e au e tohi ke he patuiki a Isaraela. Ti fano a ia, ti uta ai e ia hogofulu e taleni ario, mo e ono e afe e sikeli auro, katoa mo e tau tapulu ne hogofulu.
6 Ne uta e ia e tohi ke he patuiki a Isaraela, kua pehe e tohi, Ka hoko atu e tohi nai kia koe, kikite la, kua fakafano atu e au kia koe haku a fekafekau ko Naamanu, kia fakamalolo e koe a ia he hana lepela.
7 Kua totou he patuiki a Isaraela e tohi ti hehe ai e ia hana tau tapulu, kua pehe age, Ko au kia ko e Atua, ke tamate mo e fakamoui, kua fakafano mai ai he tagata na e tagata kia au ke fakamalolo e au a ia he hana lepela? Kia manamanatu la mo e iloa e mutolu, kua kumi e ia e mena ke alanaki ai ke fai taua mai kia au.
8 Ka kua logona e tagata he Atua ko Elisaio kua hēhē he patuiki a Isaraela hana tau tapulu, ti fakafano age e ia ke he patuiki kua pehe age, Ko e ha ne hēhē ai e koe hau a tau tapulu? Kia hau a ia kia au, ti iloa ai e ia, ha ha ia i Isaraela ni e perofeta.
9 Ti hau ai a Naamanu mo e hana tau solofanua, mo e hana tau nofoa fakataveli, ti tu ai a ia ke he gutuhala he fale a Elisaio.
10 Ti fakafano atu ai e Elisaio e fekafekau kia ia kua pehe atu, Kia fano a a koe, ti koukou lagafitu a koe i Ioritana, ti liu mai ai hau a tino tuai kia koe, ti mea ai a koe.
11 Ti ita ni a Naamanu, mo e fano kehe, kua pehe age, Kitiala, ne pehe au, to hau ni a ia ki fafo, mo e tu mai, mo e ui ke he higoa a Iehova hana Atua, mo e alo ai hana lima ke he mena ne ha i ai e gagao ti maulu ai e lepela.
12 Nakai kia mua he mitaki a Apana mo Farapa ko e tau vailele i Tamaseko, ke he tau vai oti i Isaraela? Nakai kia maeke ke koukou ai au, mo e mea ai au? Ti tafilu ai a ia mo e fano kehe a ia mo e ita lahi.
13 Ka kua fakatata age hana tau fekafekau kia ia, ti vagahau ai a lautolu kia ia, kua pehe age, Ma matua na e, kane vagahau atu e perofeta kia koe ke he mena lahi, nakai kia eke ai e koe? Ti nakai kia au atu he eke ai e koe, ha kua pehe atu a ia kia koe, Kia koukou a ti mea ai a koe?
14 Ti hifo ai a ia, kua uku lagafitu a ia i Ioritana, ke lata mo e kupu he tagata he Atua, ti liu mai ai hana tino tuai tuga ne tino he tama tote, ti mea ai a ia.
15 Ti liu ami a ia ke he tagata he Atua, ko ia mo lautolu oti ha ha ia ia, ne hau a ia, ti tu mai a ia ki mua hana, kua pehe mai, Kitiala, kua iloa nai e au kua nakai fai atua ke he lalolagi oti ni, ka kua ha i ai a ia i Isaraela ni, Hanai, kia talia e koe e mena fakaalofa he hau a fekafekau.
16 Ka e pehe atu a ia, Kua moui a Iehova, ko ia kua tu ai au ki mua hana, nakai uta e au ha mena. Ti fakamakamaka atu a ia kia ia ke talia e mena ka e nakai mafai a ia.
17 Ti pehe mai ai a Naamanu, Kaeke ke nakai, ka kia ta mai ai ke he hāu a fekafekau ua e kavega he tau falata he kelekele? ha ko e mena nakai tuai eke hāu a fekafekau e poa huhunu, po ke taha poa ke he tau atua kehe, ka ko Iehova ni.
18 Ka kia fakamagalo mai e Iehova ke he hāu a fekafekau ke he mena nai, ka fano haku iki ke he fale a Rimoni ke fakaveli fakafohifo ai, ti falanaki ai a ia ke he haku lima, ti fakaveli fakafohifo ai au ke he fale a Rimoni, ka fakaveli fakafohifo ai au ke he fale a Rimoni, kia fakamagalo e Iehova ke he hau a fekafekau ke he mena na.
19 Ti pehe atu a ia kia ia, Kia fano a koe mo e monuina. Ti fano ai a ia, kua nakai mamao foki.
20 Ti pehe age a Kehasi ko e fekafekau a Elisaio ko e tagata he Atua, Kitiala, kua toka he iki haku e tau mena he tagata Suria na, ko Naamanu he nakai eke ai e ia e tau mena ne ta mai e ia; kua moui a Iehova to tutuli atu e au a ia, ti moua ai e au taha mena ia ia.
21 Ti tutuli atu ai e Kehasi a Naamanu. Kua kitia foki e Naamanu a ia kua poi atu kia ia, ti hifo ai a ia he nofoa fakataveli ke feleveia mo ia kua pehe age a ia, Kua monuina nakai?
22 Ti pehe age a ia, Kua monuina; kua fakafano mai au he haku iki ke pehe atu, Kitiala, kua o mai nai kia au tokoua e fuata, he fanau he tau perofeta, mai he mouga Efaraimo, kia ta mai a e koe ma laua taha taleni ario, katoa mo e ua e tapulu.
23 Ti pehe age a Naamanu kia ia, Tokai, kia uta la ua e taleni. Ti fakamakamaka atu a ia kia ia, ti fafao ai e ia ua e taleni ario ke he tau kato ne ua, katoa mo e ua e tapulu, kua tuku atu e ia ke he hana tau fekafekau tokoua, ti uta ai e laua, kua mumua atu kia ia.
24 Kua hohoko atu a lautolu ke he matiketike, ti uta ai e ia e tau mena ia laua, kua tuku atu ke he fale, ti fakafano atu e ia e tau tagata ke liliu, ti o ai a laua.
25 Ka kua hu atu a ia ki fale, ti tu atu a ia ki mua hana iki. Ti pehe age a Elisaio kia ia, Kehasi na e, ne hau a koe i fe? Ti pehe age a ia, Nakai ni fano hau a fekafekau ke he taha mena.
26 Ti pehe age a ia kia ia, Nakai kia tokoua a koe mo e loto haku, he liu mai e tagata he haua nofoa fakataveli ke fonofono a koe? Ko e vaha nai kia ke talia ai e tau ario, mo e talia ai e tau tapulu, mo e tau ulu olive, mo e tau ulu vine, mo e tau mamoe, mo e tau povi, mo e tau fekafekau tane, mo e tau fekafekau fifine?
27 Ko e mena ia to pipiki atu ai e lepela a Naamanu kia koe mo e hau a fanau ke hoko atu ke he tau hau a mui. Ti fano kehe a ia i mua hana, kua lepela ni, kua hina tuga ne kiona.