2 Tau Patuiki 7:1-20
7 TI pehe age ai a Elisaio, Kia fanogonogo mai a a mutolu ke he kupu a Iehova, Kua talahau mai pehe a Iehova, Ko e magaaho pehenai a pogipogi, to fakafua ai ke he gutuhala a Samaria e sea he falaoa mitaki ke he sikeli, ko e ua foki e sea karite ke he sikeli.
2 Ti tali age ai e taha iki, ne falanaki ai e patuiki ke he hana lima, ke he tagata he Atua, kua pehe age, Kitiala, kaeke ke eke ai e Iehova e tau gutuhala ke he lagi, po ke hoko nakai e mena na? Ti pehe age ai a ia, Kitiala, to kitia e koe ke he hau a tau fofoga, ka e nakai kai ai e koe.
3 Ne ha i ai foki ke he mena ne fina atu ai ke he gutuhala e tau tagata lepela ne tokofā, kua fevagavagahau aki a lautolu, Ko e heigoa e mena kua nonofo ai a tautolu i hinai ato mamate a tautolu?
4 Ka eke ke pehe a tautolu, Kia o a tautolu ke he maga, kua ha i ai e hoge, ti mamate ai a tautolu ke he mena ia; kaeke foki ke nonofo a tautolu i hinai, ti mamate ni a tautolu. O mai a, ke fehola a tautolu ke he kau a Suria; kaeke ke fakamomoui e lautolu a tautolu, ti momoui ai a tautolu; kaekek foki ke kelipopo e lautolu a tautolu, ti mamate ai ni a tautolu.
5 Ti mamatike ai a lautolu he po ke o atu ke he heaga api a Suria; kua hohoko atu foki a lautolu ke he tau kala he heaga api a Suria, kitiala, nakai ha ha i ai ha tagata.
6 Ha kua eke ni he Iki ke logona ai he kau a Suria e tomumu he tau kariota, mo e tomumu he tau solofanua, ko e tomumu he kau lahi. Ti fevagavagahau aki a lautolu, Kitiala, kua taui atu he patuiki a Isaraela ke he tau patuiki he tau tagata Heti, mo e tau patuiki a Aikupito ke o mai ke tau, mo tautolu.
7 Ti mamatike a lautolu, ti fehola ai a lautolu he po, kua tiaki foki e lautolu ha lautolu a tau fale ie, mo e ha lautolu a tau solofanua, mo e ha lautolu a tau asini, mo e heagaapi tuga he nonofo ai a lautolu, ti fehola ai a lautolu he fia momoui.
8 Kua hohoko atu e tau tagata lepela na ke he kala he heaga api, ti huhu atu ai a lautolu ke he taha fale ie, ti kai ai e lautolu mo e inu ai e lautolu, kua uta ai foki e lautolu he mena ia e tau ario, mo e tau auro, katoa mo e tau tapulu, ti o ai a lautolu mo e fufu e tau mena ia; ti liliu mai a lautolu, kua huhu atu ai ke he taha fale ie, kua uta ai foki e lautolu e tau mena, ti o ai a lautolu mo e fufu.
9 Ti fevagavagahauaki a lautolu, Nakai lata e mena nai kua eke e tautolu, ko e aho ke monuina ai e aho nai, ka kua fakamamate ai a tautolu; kaeke ke tatali a tautolu ato maama e aho a pogipogi, ti hoko mai ai e hala kia tautolu; o mai ā, ke o a tautolu, ke talahau ai ke he magafaoa he patuiki.
10 Ti o mai ai a lautolu, ti ui e lautolu ke he leoleo he gutuhala he maga, kua tala mai ai e lautolu kia lautolu, kua pehe mai, Ne o atu a mautolu ke he heagaapi a Suria; ti kitiala, nakai ha i ai he tagata, ti nakai ha i ai e leo he tagata; kua fakave ai e tau solofanua, ti fakave ai e tau asini, ko e tau fale ie foki tuga ne ha i ai a lautolu.
11 Ti ui age a ia ke he tau leoleo he tau gutuhala, ti talahau atu ai e lautolu ki fale ke he magafaoa he patuiki.
12 Ti matike ai e patuiki he po, kua pehe age a ia ke he hana tau fekafekau, To tala atu e au kia mutolu e mena kua eke he tau tagata Suria kia tautolu. Kua iloa e lautolu kua hoge a tautolu, ko e mena ia kua o ai a lautolu ki tua he heaga api ke fakamumuli ai ke he vao, kua pehe a lautolu, Ka o atu a lautolu ki tua he maga, ti tapatapaki momoui ai e tautolu a lautolu, ti huhu atu ai a tautolu ke he maga.
13 Ti tali age ai e taha he hana tau fekafekau, kua pehe age, Kia uta a he falu lima e solofanua he tau solofanua ne toe, kua toe ai ke he maga, kitiala ko lautolu kua tuga ne motu o tagata oti a Isaraela ne toe ai, kitiala, kua tuga ne motu o tagata oti a Isaraela ni kua fakaotioti, kia fakafano atu e tautolu ke iloa ai.
14 Ti uta ai e lautolu e tau solofanua mo e ua e kariota, ti fakafano atu ai he patuiki ke mumui atu ke he kau a Suria, kua pehe age, Kia o atu a, mo e kitekite a mutolu.
15 Ti mumui atu ai a lautolu kia lautolu, kua hohoko ki Ioritana; ti kitiala, kua puke ai e puhala oti ke he tau tapulu mo e tau kapiniu, ne tiaki ai he tau tagata Suria ke he ha lautolu a fehola fakatepetepe. Ti liliu mai ai e tau fekau, mo e tala age e lautolu ke he patuiki.
16 Ti o atu ai e motu, ti fofo e lautolu e tau mena he heaga api a Suria. Ti fakafua ai e sea he falaoa mitaki ke he sikeli, mo e ua e sea karite ke he sikeli ke tuga ne kupu a Iehova.
17 Ti kotofa he patuiki e iki ne falanaki ai a ia ke he hana lima ke leoleo ai e ia e gutuhala. Ti taholi ai he motu a ia ke he gutuhala, ti mate ai a ia, tuga ne kupu he tagata he Atua ne vagahau ai e ia he hifo atu ai e patuiki kia ia.
18 Ti hoko ai e mena ne vagahau atu ai e tagata he Atua ke he patuiki, kua pehe atu, Ko e ua e sea karite ke he sikeli, mo e sea he falaoa mitaki ke he sikeli, ke eke ai ke he gutuhala a Samaria ke he magaaho pehenai a pogipogi.
19 Ka e tali mai ai e iki na ke he tagata he Atua, kua pehe mai, Kitiala, kaeke ke eke ai e Iehova e tau gutuhala ke he lagi po ke maeke nakai ke hoko e tau mena na? Ti tali atu ai a ia, Kitiala, to fioia ni e koe ke he hau a tau fofoga, ka e nakai kai ai e koe.
20 Ti hoko ia kia ia, ha ko e mena taholi ai he motu a ia ke he gutuhala, ti mate ai a ia.