2 Tau Patuiki 9:1-37
9 TI ui age he perofeta ko Elisaio ke he taha he fanau he tau perofeta, kua pehe age kia ia, Kia pipi e koe hau a tokupu, mo e uta e koe e lupo lolo nai ke he lima hau, mo e fano a koe ki Ramota Kiliata.
2 Ka hoko foki a koe ki ai ti kumi e koe a Iehu ko e tama a Iehosafata ko e tama a ia a Nimesi, ti hu age a koe mo e pehe age a koe kia ia ke matike a ia mai mua he tau matakainaga hana, ti uta e koe a ia ke he poko ki loto.
3 Ti toto e koe e lupo lolo, mo e liligi hifo ai e koe ke he hana ulu, mo e pehe age, Kua vagahau mai pehe a Iehova, Kua fakauku e au a koe ke eke mo patuiki a Isaraela. Ti hafagi e koe e gutuhala mo e hola, aua neke leo a koe.
4 Ti fano ai e fuata, ko e fuata ko e perofeta ki Ramota-Kiliata.
5 Kua hoko age a ia, kitiala, kua nonofo mai e tau takitaki kau; ti pehe age ai a ia, Ko e iki na e ha ha ia au e fekau kia koe. Ti pehe age ai a Iehu, Ko e tagata fe ia mautolu oti nai? Ti pehe age a ia, Ko koe ni, ma iki na e.
6 Ti matike ai a ia kua hu atu a ia ke he fale; ti liligi hifo ai e ia e lolo ke he hana ulu, ti pehe age a ia kia ia, Kua vagahau mai pehe a Iehova ko e Atua e Isaraela, Kua fakauku e au a koe ke eke mo patuiki he motu a Iehova, ko Isaraela.
7 Ti kelipopo e koe e magafaoa a Ahapo ko e hau a iki, kia lalago e au kia Iesepela e toto he haku a tau fekafekau ko e tau perofeta, katoa mo e toto he tau fekafekau oti a Iehova.
8 Ha ko e mena to mahaikava e magafaoa oti kana a Ahapo; ti fakaotioti ai e au e tau tama tane oti he magafaoa a Ahapo, ko e tau tupa, katoa mo e tau tagata kua toka noa i Isaraela;
9 Ti fakatatai e au e magafaoa a Ahapo mo e magafaoa a Ierepoamo ko e tama a Nepata, mo e magafaoa a Paasa ko e tama a Akia;
10 To kai foki he tau kuli a Iesepela ke he fonua ko Isereelu, ti naki tanu e taha a ia. Ti hafagi ai e ia e gutuhala a ia.
11 Ti hu atu ai a Iehu ke he tau fekafekau he hana iki. Ti pehe age e taha kia ia. Kua mafola nakai? Ko e heigoa e mena ne hau ai e tagata heketia na kia koe? Ti pehe age a ia kia lautolu, Kua iloa e mutolu e tagata katoa mo e hana fekau.
12 Ti tali age ai a lautolu, Ko e pikopiko, Kia tala mai la e koe kia mautolu. Ti pehe age a ia, Kua tuga ne mena nai mo e mena nai hana tau kupu kia au, kua pehe mai Kua vagahau mai pehe a Iehova, Kua fakauku e au a koe ke eke mo patuiki a Isaraela.
13 Ti fakaave a lautolu, kua takitaha ha lautolu mo e toto hana tapulu, mo e tuku ki lalo hana ki luga he hala papahi, kua ulo e lautolu e pu, ti pehe age a lautolu, Kua eke a Iehu mo patuiki.
14 Ti fakafualoto ai e Iehu ko e tama a Iehosafata, ko e tama a ia a Nimesi, kia Ioramo (Ne leoleo foki e Ioramo a Ramota-Kiliata, ko lautolu mo Isaraela oti, ha ko Hasaeli ko e patuiki a Suria.
15 Ka kua liu atu a Ioramo ki Isereelu ke fakamaulu ai hana tau kafokia, ne fakakafokia ai he tau tagata Suria a ia he tau a ia mo Hasaeli ko e patuiki a Suria.) Ti pehe age a Iehu, Kaeke ke o a tautolu mo mutolu, aua neke hola taha ke he maga neke fano a ia mo e talahau atu ai i Isereelu.
16 Ti heke ai e Iehu e kariota, ti fano a ia ki Isereelu, ha kua takoto ai a Ioramo; kua hifo foki a Ahasaia ko e patuiki a Iuta ke ahi a Ioramo.
17 Kua tu foki e tagata toko ki luga he kolo i Isereelu; ti kitia ai e ia e motu o tagata a Iehu kua o atu; ti pehe age a ia, Kia kitia atu e au e motu o tagata. Ti pehe age a Ioramo, Kia uta e koe a ia ke fonofono a lautolu, mo e pehe age kia lautolu, Kua mafola nakai?
18 Ti fano ai e tagata heke solofanua ke fonofono a ia, ti pehe age a ia, Kua vagahau mai pehe e patuiki, Kua mafola nakai? Ti pehe age a Iehu kia ia, Ko e heigoa kia hāu mo e mafola? Kia hau a a koe ki tua haku. Ti tala age ai e tagata toko, kua pehe age, Kua hoko atu kia lautolu, e tagata ne fakafano atu, ka e nakai ni liu mai a ia.
19 Ti fakafano age ai e ia e tagata heke solofanua ke ua aki, kua hoko age a ia kia lautolu, ti pehe age a ia, Kua pehe he vagahau mai e patuiki, Kua mafola nakai? Ti tali age ai a Iehu, Ko e heigoa kia hāu mo e mafola? Kia hau a a koe ki tua haku.
20 Ti tala age ai he tagata toko, kua pehe age, Kua hoko a ia kia lautolu, ka e nakai ni liu mai a ia; ko e fakapoi foki, kua tuga ne fakapoi a Iehu ko e tama a Nimesi, ha kua poi taha fakahanoa he fakapoi e ia.
21 Ti pehe age a Ioramo, Kia tauteute ā. Ti taute ai hana kariota. Ti o ai a Ioramo ko e patuiki a Isaraela, katoa mo Ahasaia ko e patuiki a Iuta, takitaha mo e hana kariota, kua o a laua ke feleveia mo Iehu; ti feleveia ai a lautolu mo ia ke he fonua a Napota ko e tagata Isereelu.
22 Kua kitia e Ioramo a Iehu, ti pehe age a ia, Iehu na e, kua mafola nakai? Ti pehe age a ia, Ke mafola ha ha, he loga pihia e tau feuaki he hāu a matua fifine ko Iesepela, mo e hana tau lagatau taulaatua?
23 Ti liu ai a Ioramo, mo e hola a ia, ti pehe age a ia kia Ahasaia, Ahasaia na e, ko e fakafualoto e mena nai.
24 Ti loloku ai e Iehu e kaufana mo e hana malolo katoa, kua fana e ia ti tuina ai a Ioramo ke he vahega tua ti ati e fana ke he hana ate fua; ti veli ai a ia ki loto he kariota hana.
25 Ti pehe age a Iehu kia Pitikā ko e takitaki kau hana, Kia lagaaki a a ia, mo e liti a ia ke he fahi fonua a Napota ko e tagata Isereelu, ha ko e mena, kia manatu a he heke a taua tokoua e kariota, mo e mumui atu ke he hana matua ko Ahapo, ti tuku atu ai e Iehova e kavega nai kia ia;
26 Kua pehe mai a Iehova, Ne kitia ai e au neafi e toto ni a Napota mo e toto he hana tau tama tane; kua pehe mai a Iehova, To taui atu foki e au kia koe ke he fonua nai. Ko e hanā kia uta e koe a ia mo e liti a ia ke he fonua, ke lata mo e kupu a Iehova.
27 Kua kitia e Ahasaia ko e patuiki a Iuta, ti hola ai a ia ke he puhala he fale ha ha he fonua. Ti tuli e Iehu a ia, kua pehe age foki a ia, Kia keli foki e mutolu a ia ke he kariota. Ti keli e lautolu a ia ke he mena ne o hake ai ki Kuru ha ha i Ipelamo. Ti hola a ia ki Mekito, ti mate ai a ia.
28 Ti uta ai he tau fekafekau hana a ia ke he kariota ki Ierusalema, ti tanu ai a ia ke he hana tukuaga fakalataha mo e hana tau matua ke he maga a Tavita.
29 Ko e tau hogofulu ma taha a Ioramo ko e tama a Ahapo, ne eke ai a Ahasaia mo patuiki ke pule kia Iuta.
30 Kua hoko a Iehu ki Isereelu, ti logona ai e Iesepela, ti vali ai e ia hana tau mata, mo e taute ai e ia hana ulu, ti kitekite mai a ia he fakamaama.
31 Kua hu atu a Iehu ke he gutuhala, ti pehe mai a ia, Po ke monuina nakai a Simeri ne kelipopo hana iki?
32 Ti haga hake ai a ia ke he fakamaama, kua pehe age, Ko hai kia kua kau mo au? Ko hai? Ti kitekite mai kia ia e tokoua po ke tokotolu e fekafekau ne pule.
33 Ti pehe age a ia, Kia liti hifo e mutolu a ia. Ti liti hifo ai e lautolu a ia; kua pihikia foki e kaupa mo e tau solofanua ke he hana toto; ti taholi e ia a ia.
34 Kua hu atu a ia ki fale, kua kai foki a ia mo e inu, ti pehe age a ia, Kia ahi e mutolu e fifine malaia na, mo e tanu a ia; ha ko e tama fifine he patuiki a ia.
35 Ti o ai a lautolu ke tanu a ia; ka ko e hana gati ulu, mo e hana tau tauuluhui, mo e hana tau tauulu lima hokoia ne moua ai e lautolu.
36 Ti liliu age ai a lautolu mo e tala age kia ia. Ti pehe age a ia ko e kupu a Iehova haia, ne vagahau mai ai he hana fekafekau ko Elia ko e Tisepi, ne pehe mai, To kai ai he tau kuli e tino a Iesepela ke he fonua ko Isereelu;
37 To ha i ai foki e tino a Iesepela ki luga he kelekele ke he fonua ko Isereelu tuga ne otaota; to nakai pehe age foki a lautolu ko Iesepela hanai.