2 Tesalonia 3:1-18
3 KO e kupu hanai kua toe, ko e tau matakainaga na e, kia liogi a mutolu ma mautolu, kia mafiti mo e lilifu e kupu he Atua, tuga he eke ia mutolu;
2 Kia laveaki foki a mautolu mai he tau tagata mahani kelea mo e hala; ha ko e mena nakai ha he tau tagata oti kana e tua.
3 Ka e fakamoli e Iki, ko ia kua fakatumau a mutolu, mo e leveki a mutolu mai ia ia ne kelea.
4 Kua tua foki a mautolu ke he Iki kia mutolu, kua eke e mutolu e tau mena kua tala atu ai e mautolu kia mutolu, to eke mau foki e mutolu;
5 Kia takitaki foki he Iki ha mutolu a tau loto ke he fakaalofa he Atua, mo e fakauka a Keriso.
6 Kua tala atu e mautolu kia mutolu, ko e tau matakainaga na e, ke he higoa he Iki ha tautolu ko Iesu Keriso, ke vevehe kehe a mutolu mo e tau matakainaga oti kua mahani hemu, kua nakai lata mo e kupu toka tuai, ne moua e lautolu mai ia mautolu.
7 Ha kua iloa ni e mutolu e tonu ke fifitaki mai a mutolu kia mautolu; ha ko e mena nakai mahani hemu a mautolu he nonofo a mautolu ia mutolu.
8 Ti nakai kai noa foki e mautolu ha mena kai he taha tagata, ka e gahua ni a mautolu ke he gahua mamafa mo e mamahi ke he po katoa mo e aho, neke fakamamafa atu ke he taha ia mutolu.
9 Nakai pihia he nakai fai pule a mautolu, ka kia eke a mautolu mo fakafifitaki kia mutolu, kia fifitaki mai a mutolu kia mautolu.
10 Ha kua tala atu e mautolu e mena nai kia mutolu ke he vaha ne nofo ai ia mutolu, kaeke ke nakai fia gahua e taha, aua foki neke kai a ia.
11 Ha kua logona e mautolu ha ia mutolu falu kua mahani hemu, nakai gahua ni, ka e hanihani ke he tau gahua kehe.
12 Kua tala atu a mautolu kia lautolu na, mo e ole atu ki ai, ha ko e Iki ha tautolu ko Iesu Keriso, kia gahua a lautolu mo e nonofo fakatekiteki, mo e kai e lautolu e tau mena kai ha lautolu ni.
13 Ko mutolu foki, ko e tau matakainaga na e, aua neke fakalolelole a mutolu ke he mahani mitaki.
14 Kaeke ke nakai omaoma e taha ke he kupu ha mautolu ke he tohi nai kia fakamailoga e tagata ia; aua foki neke feoaki a mutolu mo ia, kia ma ai a ia.
15 Aua foki neke manatu a mutolu ko ia ko e fi, ka kia tomatoma a mutolu kia ia tuga ne matakainaga.
16 Ko e hanai, ko e Iki ni hana e monuina, kia foaki e ia e monuina kia mutolu nakai noa, ke he tau mena oti kana. Kia ha ha ia mutolu oti kana e Iki.
17 Ko e fakaalofa haku, ko au ko Paulo, kua tohi ke he haku lima, ko e fakamailoga ia he haku a tau tohi oti kana; kua tohi au pihia ni.
18 Kia ha ha ia mutolu oti kana e fakaalofa noa he Iki ha tautolu ko Iesu Keriso. Amene.