2 Timoteo 1:1-18
1 KO au ko Paulo ko e aposetolo a Iesu Keriso ke he finagalo he Atua, kua lata mo e talahauaga he moui ha ia Keriso Iesu,
2 Haku tohi hanai kia Timoteo ko e tama fakahele haku; kia ha ha ia koe e fakaalofa noa, mo e fakaalofa, mo e monuina mai he Atua ko e Matua, katoa mo Keriso Iesu ha tautolu a Iki.
3 Kua fakaaue au ke he Atua, ko ia kua fekafekau au ki ai mo e loto manamanatu hifo kua mea, tuga ne moua mai he haku a tau tupuna, ti kua manatu e au a koe nakai noa ke he haku a tau liogi ke he po mo e aho;
4 Kua manako lahi au ke kitia a koe, ha kua manatu e au hāu a tau hihina mata, kia puke ai au ke he fiafia;
5 Kua manatu foki au ke he tua fakamoli ha ha ia koe, ne ha ia Loi fakamua ko e matua fifine he matua fifine hau, katoa mo Eunike ko e hau a matua fifine, ka ko e haku a taofi ha ha ia koe foki ni.
6 Ko e mena ia kua fakamanatu atu ai au kia koe ke liu foki fakapuho e mena fakaalofa mai he Atua, ha ha ia koe he fakalago atu e au haku a tau lima.
7 Ha ko e mena nakai foaki mai he Atua kia tautolu e Agaga ke matakutaku ai, ka kia fakamalolo ai, mo e fakaalofa ai, mo e akonaki atu ai.
8 Hanai, aua neke mā a koe ke he talahauaga ke he Iki ha tautolu, po ko au kua lili ha ko ia; ka kia mamahi fakalataha a tautolu ha ko e vagahau mitaki, ke lata mo e malolo he Atua,
9 Ko ia kua fakamomoui a tautolu, mo e ui mai ke he uiaga tapu, nakai fakalata ke he tau gahua ha tautolu, ka e fakalata ke he hana finagalo ni mo e hana fakaalofa noa ne foaki mai kia tautolu ha ia Keriso Iesu, ka e nakaila kamata ai e tau hau.
10 Ka kua fakailoa mai tuai ainei he fakakite mai ha tautolu a Fakamoui ko Iesu Keriso, he fakaoti e ia e mate, ka e fakamaama mai ke he vagahau mitaki e moui nakai tuai popo;
11 Kua kotofa ai au ko e ogo, mo e aposetolo, mo e akoako ke he tau motu kehe.
12 Ko e mena ia kua mamahi ai au ke he tau mena ia; ka e nakai mā au, ha kua iloa e au a ia kua tua au ki ai, mo e iloa mali e au kua maeke ni ia ia ke leveki e mena ne tuku atu ai e au kia ia ke hoko atu ke he aho ia ni.
13 Kia eke e koe mo fakafifitaki hau e tau kupu tonu, ne fanogonogo ai a koe kia au mo e tua mo e fakaalofa ha ia Keriso Iesu.
14 Ko e mena mitaki ne tuku atu kia koe kia leveki ai e koe ke he lagomatai mai he Agaga Tapu kua nofo i loto ia tautolu.
15 Kua iloa e koe e mena nai, ko lautolu oti ha i Asia kua tiaki tuai e lautolu au ha ia lautolu a Fugelu mo Hemokene.
16 Kia fakaalofa e Iki ke he magafaoa a Oneseforo; ha kua fakamafana mai e ia lagaloga kia au, ti nakai mā foki a ia ke he haku a toua lapatoa,
17 Ka kua ha i Roma a ia, ti kumi fakamakutu mai ai e ia au, ti moua ni.
18 Kia foaki he Iki kia ia ke moua e fakaalofa mai he Iki ke he aho ia ni. Kua iloa mitaki e koe e tau mena loga ne fekafekau mai ai a ia kia au i Efeso.