2 Timoteo 2:1-26
2 HANAI, ko koe haku a tama na e, kia fakamalolo he Iki a koe ke he fakaalofa noa ha ia Keriso Iesu.
2 Ko e tau mena foki ne fanogonogo mai a koe kia au mo e tau talahau tokologa, kia tuku age e koe ke he tau tagata fakamoli, kua maeke ni ke fakaako atu ke he falu.
3 Hanai, kia fakauka a koe ke he tau mena ke mamahi ai, tuga ne tagata tau mitaki a Iesu Keriso.
4 Nakai fakai ha tagata tau kua tau mo e fakalavelave e ia a ia ke he tau mena he mouiaga nai, kia fakafiafia e ia a ia ne fifili a ia ke eke mo tagata tau.
5 Kaeke foki ke fetoko e taha ke he fetoko, nakai fakafoufou a ia ka nakai fetoko kua lata mo e fakatufono.
6 Ko e tagata gahua fonua kua gahua ai ko e tagata ia ni ke kai fakamua e tau fua ke lata ai.
7 Kia manamanatu a koe ke he tau mena kua tala atu ai au, ha ko e mena to foaki atu ai he Iki e loto matala kia koe ke he tau mena oti.
8 Kia manatu a Iesu Keriso mai he fanau a Tavita, kua fakatu mai ia lautolu kua mamate, kua lata mo e haku a vagahau mitaki;
9 Ha ko ia foki kua mamahi ai au, kua hoko ni ke he liliaga, tuga ne matahavala; ka ko e kupu he Atua kua nakai lili ia.
10 Ko e mena nai kua fakauka ai au ke he tau mena oti ha ko lautolu ne fifili, kia moua foki e lautolu e fakamouiaga ha ia Keriso Iesu mo e monuina tukulagi.
11 Ko e kupu moli hanai; ha ko e mena kaeke kua mamate a tautolu fakalataha mo ia, ti momoui foki a tautolu fakalataha ai;
12 Kaeke kua fakauka a tautolu, ti eke foki a tautolu mo tau patuiki fakalataha mo ia; kaeke ke fakatikai e tautolu a ia, ti fakatikai foki e ia a tautolu;
13 Kaeke foki kua nakai tua a tautolu, kua fakamoli agaia ni a ia, kua nakai maeke ia ia ke fakatikai e ia a ia ni.
14 Kia fakamanatu e koe a lautolu ke he tau mena ia, mo e talahau fakatonu e koe ki mua he lki, aua neke taufetoko a lautolu ke he tau kupu kua nakai aoga ke he mena taha, ka e fakahehe ai a lautolu kua fanogonogo ki ai.
15 Kia lalilali atu a koe kia eke a koe mo tagata kua fiafia ki ai e Atua, ko e ekegahua nakai fai mena ke mā ai, kua fakatokatoka fakahako e kupu moli.
16 Ka kia kalo kehe mo e tau kupu kelea mo e nakai aoga; ha ko e mena to tolomaki atu ke au atu ai e mahani hepehepe,
17 Ko e kupu foki ha lautolu to kai e ia tuga ne popo; ha i ai a Humenio mo Fileto;
18 Ko laua kua hehe mai he kupu moli, kua pehe age, Kua mole atu tuai e liu foki tu mai, kua fakamafoki kehe foki e laua e falu mai he tua.
19 Ka e pete ia kua tu e fakaveaga mau he Atua, ha ha i ai e fakamailoga nai, Kua fioia he Iki hana tau tagata; katoa mo ē, Kia o kehe mo e mahani kelea a lautolu oti kua totoku e higoa a Keriso.
20 Ka e ha ha he fale lahi nakai kuenaia e tau kapiniu auro mo e ario, ka e katoa foki mo e tau kapiniu lakau mo e kelekele, kua lilifu falu, ka e fakakelea falu.
21 Hanai, kaeke ke fakamea e taha a ia ni mai he tau mena ia, ti eke ai a ia mo kapiniu lilifu, kua fakatapu, kua aoga foki mo e Iki, kua taute mo e tau gahua mitaki oti.
22 Kia hola kehe mo e tau manako lahi he tau fuata, ka kia tutuli e tututonu, mo e tua, mo e fakaalofa, katoa mo e mafola mo lautolu kua tauui ke he lki mai he loto meā.
23 Ka ko e tau kumiaga goagoa mo e nakai fakaako mai, kia kalo kehe ai, ha kua iloa ni kua tutupu mai ai e tau taufetoko.
24 Ha kua nakai lata ke taufetoko e fekafekau he Iki, ka kia mahani molu a ia ke he tau tagata oti, kia aga a ia ke fakaako atu, kia fakauka a ia,
25 Kia akonaki atu mo e mahani molu kia lautolu kua totoko mai po ke foaki atu nakai he Atua e tokihala kia lautolu, kia iloa mitaki e lautolu e kupu moli;
26 Kia ala mai foki a lautolu mai he hele he tiapolo, ko lautolu kua moua e ia, kia eke hana finagalo.