2 Timoteo 3:1-17
3 KA kia iloa e koe e mena nai, ko e tau aho fakamui to hohoko mai ai e tau aho uka;
2 Ha ko e mena ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea,
3 To nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki,
4 To afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua;
5 To ha i ai ia lautolu e gati he mahani Atua, ka kua tiaki e lautolu e malolo ne toka ai; kia kalo kehe a koe mo e tau tagata pihia.
6 Ha i ai foki e falu kua huhū atu ke he tau fale, mo e holataki e tau fifine goagoa kua pehia he tau hala, ko lautolu kua takitaki fano he tau manako kehekehe,
7 Kua ako mau a lautolu nakai noa, ka e nakai fakai ke maeke ke hohoko atu ke he maama mitaki he kupu moli.
8 Tuga a Iani mo Iameri ne totoko a laua kia Mose, kua pihia foki a lautolu ia kua totoko atu ke he kupu moli, ko e tau tagata loto kelea, kua tiaki a lautolu ke he tua.
9 Ka e nakai tolomaki atu a lautolu, ha ko e mena to iloa mitaki ni he tau tagata oti ha lautolu a goagoa, tuga ne iloa he laua a goagoa.
10 Ka ko koe, kua iloa mitaki e koe haku a kupu, ko e haku a mahani, mo e tau mena kua foli ki ai, ko e haku a tua foki, ko e fakamanavalahi, ko e fakaalofa, mo e fakauka,
11 Ko e tau mena favale mo e tau mena mamahi, ko e tau mena haia ne hohoko mai kia au i Anetioka, mo Ikonio, mo Luseta; ko e tau mena favale pihia ne mamahi ai au; ka e laveaki mai he Iki au ke he tau mena oti kana.
12 Ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.
13 Ka ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.
14 Ka ko koe, kia tumau a koe ke he tau mena kua ako ai e koe, mo e iloa tonuhia e koe, ha kua iloa e koe a ia ne fakaako atu ai kia koe,
15 Tali mai foki he vaha tote kua iloa e koe e tau Tohi Tapu, kua maeke ke fakailoilo a koe ke moua ai e moui ke he tua ha ha ia Keriso Iesu.
16 Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu,
17 Kia katoatoa ai e mitaki he tagata he Atua, kia taute ni a ia ke he tau gahua mitaki oti kana.