Amosa 3:1-15
3 KO e fanau a Isaraela na e, Kia fanogonogo mai a mutolu ke he tau kupu nai, kua vagahau mai ai a Iehova kia mutolu, katoa mo e magafaoa oti ne ta hake e au he motu ko Aikupito, kua pehe mai,
2 Kua iloa e au a mutolu hoko mutolu he tau magafaoa oti he lalolagi; ko e mena ia to fakahala ai e au a mutolu ha ko e tau mahani kelea oti ha mutolu.
3 Ke o fakalataha kia e tokoua, kaeke kua nakai loto fakalataha a laua?
4 To tagi kia e leona ka he vao ka nakai fai mena kua hēhē ai e ia? To logona atu kia e leo he punua leona mai hana ofaga kaeke kua nakai moua e ia ha mena?
5 To to kia e manulele ke he matahele ke he kelekele, ka kua nakai tuku ai e hele māna? To hake kia e matahele mai he kelekele kaeke kua nakai moua ha mena?
6 To ulo kia e pu ke he maga, ka e nakai matakutaku ai e tau tagata? To tupu kia e malaia ke he maga, ka e nakai eke ai e Iehova?
7 To nakai ni eke he Iki ko Iehova ha mena, ka e fakakite ai e ia hana finagalo ke he hana tau fekafekau ko e tau perofeta.
8 Kua tagi e leona ko hai kia ke nakai matakutaku ai? kua vagahau mai e Iki ko Iehova, ko hai kia ke nakai perofeta atu?
9 Kia fakamatala atu e mutolu ke he tau fale iki i Asetota, mo e tau fale iki ke he motu ko Aikupito, mo e pehe atu a mutolu, Kia fakapotopoto mai a mutolu ke he tau mouga a Samaria, mo e kitekite atu a mutolu ke he tau tomumu lalahi ha ha i ai, katoa mo e favale ha ha i ai.
10 Kua pehe mai a Iehova, nakai iloa e lautolu ke eke e tau mena tonu, kua tatanaki ai e lautolu ke he tau fale iki ha lautolu e tau mena ne moua he favale mo e kaiha.
11 Ko e mena ia kua pehe mai ai e Iki ko Iehova, To ha i ai a ia kua fai fi mai, ti agaagai mai a ia ke he motu; to uta kehe foki e ia ia koe hau a malolo, to fofo foki e tau mena ha ha he tau fale iki hau.
12 Kua pehe mai e vagahau a Iehova, Tuga he laveaki mai he leveki mamoe, he gutu he leona, ua e hui po ke maga teliga, to laveaki pihia e fanau a Isaraela kua nonofo i Samaria ke he matapotu he mohega, ke he tau potu ie silika foki he mohega.
13 Kua pehe mai e Iki ko Iehova ko e Atua Sapaota, Kia fanogonogo mai a mutolu, mo e fakailoa atu ke he magafaoa a Iakopo.
14 Ko e aho ia to taui atu e au e tau holifono a Isaraela kia ia, to ahi foki e au e tau fatapoa i Peteli, to hehele kehe e tau hoe he fatapoa, ti to hifo a ia ke he kelekele.
15 To tuki e au e fale ke lata mo e vaha makalili, katoa mo e fale ke lata mo e vaha mafana; to fakaoti ai e tau fale nifo elefane, to hiku ai foki e tau fale lalahi, kua pihia mai a Iehova.