Amosa 7:1-17
7 KUA pehe he fakakite mai kia au he Iki ko Iehova; kitiala, ne fakatupu ai e ia e tau hē akerise he kamata ke tupu hake e vao fakamui; kitiala, ko e vao ne tupu fakamui haia, ka kua mole atu e heleheleaga motie he patuiki.
2 Ati oti kua oti he kai e tau akau mateafu he fonua, ti pehe atu au, Ko e Iki na e, Iehova, kua ole atu au kia fakamagalo mai e koe; po ke tu fefe a Iakopo, ha kua lolelole ni a ia?
3 Ne tokihala a Iehova he mena na; ti pehe mai a Iehova, To nakai hoko.
4 Kua pehe he fakakite mai kia au he Iki ko Iehova; kitiala, kua ui atu e Iki ko Iehova kia taufetoko ai ke he afi, ti fakaoti ai e ia e moana lahi, mo e fakaoti ai taha maga he fonua.
5 Ti pehe atu au, Ko e Iki na e, ko Iehova, kua ole atu au kia koe, kia toka ai; po ke tu fefe kia a Iakopo, ha kua lolelole ni a ia?
6 Kua tokihala a Iehova he mena na; kua pehe mai e Iki ko Iehova, To nakai hoko foki e mena na.
7 Ne pehe he fakakite mai e ia kia au; kitiala, ne tu ai e Iki ke he kaupa ne taute aki ke he fua tautau, ha ha he lima hana e fua tautau.
8 Ti pehe mai e Iki kia au, Amosa na e, ko e heigoa kia kua kitia e koe? Ti pehe age au, Ko e fua tautau. Ti pehe mai ai e Iki, Kitiala, to tuku e au e fua tautau ki loto he motu haku ko Isaraela, to nakai fano leva foki au ia lautolu;
9 To eke ai e tau mena tokoluga a Isaako mo tau mena kua moumou, to ulu moumou foki e tau faituga a Isaraela; to tu atu au mo e pelu ke he magafaoa a Ierepoamo.
10 Ti fakafano atu e Amasia ko e ekepoa i Peteli ke he patuiki a Isaraela ko Ierepoamo, kua pehe atu, Kua fakafualoto a Amosa kia koe ke he magafaoa a Isaraela, nakai maeke ke he motu ke fakauka ai ke he hana tau kupu oti.
11 Ha kua vagahau mai pehe a Amosa, to matulei ai a Ierepoamo ke he pelu, to takitaki atu ni a Isaraela mo tau tagata kua moua he tau mai he kelekele ha lautolu.
12 Kua pehe age foki a Amasia kia Amosa, Ko e tagata kitekite na e, fano a, kia hola atu a koe ke he motu ko Iuta, mo e kai mena ai a koe ke he mena ia, mo e perofeta ai a koe.
13 Ka e aua neke perofeta foki a koe i Peteli; ha ko e faituga he patuiki haia, ko e fale foki he patuiki haia.
14 Ti tali age ai a Amosa kia Amasia, kua pehe age, Nakai ko e perofeta au, nakai ko e tama foki au he perofeta; ka ko e leveki manu au, mo e tagata gahua ke he tau sukamora.
15 Ka e uta e Iehova au he mui atu au ke he fuifui mamoe, mo e pehe mai a Iehova kia au, Fano a, kia perofeta atu a koe ke he motu haku ko Isaraela.
16 Hanai, kia fanogonogo mai a ke he kupu a Iehova. Kua pehe mai a koe, Aua neke perofeta atu a koe kia Isaraela, ti ua vagahau atu foki a koe ke he magafaoa a Isaako.
17 Ko e mena ia kua pehe mai e vagahau a Iehova, To eke e hoana hau mo fifine fakataka ke he maga, to veveli foki ke he pelu hau a tau tama tane mo e hau a tau tama fifine, to vevehe ai ke he afo ke fafati aki hau a tau fonua; to mate foki a koe ke he motu kelea; ti fakapaea atu ni a Isaraela mai he kelekele hana.