Efeso 2:1-22
2 KO mutolu foki ne mamate he tau holifono mo e tau hala,
2 Ne o fano ai a mutolu ke he vaha i tuai, ke lata mo e mahani he lalolagi nai, ke lata mo e takitaki ha lautolu kua pule ha he pulagi, ko e agaga haia kua gahua ai ni ainei kia lautolu kua faliuliu;
3 Ha i ai foki a tautolu, ne mahani fakalataha a tautolu oti kana mo lautolu ke he vaha i tuai he nonofo ai ke he tau manako lahi he tau tino ha tautolu, mo e eke foki e tautolu e tau mena kua loto ki ai e tino katoa mo e tau manatu, ne fanau mai foki a tautolu mo fanauaga he ita, tuga foki a lautolu kua toe;
4 Ka ko e Atua ha ha i ai e fakaalofa lahi ue atu, ha ko e hana fakaalofa lahi ne fakaaIofa mai ai a ia kia tautolu,
5 Ne fakamomoui mai e ia a tautolu fakalataha mo Keriso, ka kua mamate a tautolu he tau holifono, (ko e fakaalofa noa kua fakamomoui ai a mutolu,)
6 Ne fakatutu fakalataha mai foki e ia, mo e fakanonofo fakalataha a tautolu mo Keriso Iesu ke he tau mena ha he lagi;
7 Kia fakakite ai e ia ke he tau hau nakaila hohoko mai e homo atu he lahi ni he hana fakaalofa noa, he totonu mai kia tautolu ha ko Keriso Iesu.
8 Ha ko e fakaalofa noa kua fakamomoui ai a mutolu ke he tua; nakai mai ia mutolu foki ia, ka ko e mena foaki noa mai he Atua,
9 Nakai ko e tau gahua, neke hula ai taha.
10 Ha ko tautolu, ko e hana gahua haia, kua eke a tautolu kia Keriso Iesu, kia eke ai e tau gahua mitaki, ne kotofa tuai ai he Atua kia mahani ai a tautolu.
11 Hanai, kia manamanatu a mutolu ko e tau tagata kehe a mutolu ke he tino i tuai, kua talahaua ko e tau tagata nakai peritome a mutolu e lautolu kua talahaua kua peritome ke he tino, kua eke he tau lima,
12 Ko e vaha ia, nakai ha ia mutolu a Keriso, ko e tau tagata kehe a mutolu mo e kautu a Isaraela, ko e tau tagata kehe foki mo e maveheaga ha i ai e tau mena kua talahaua, nakai ha ia mutolu e amaamanaki, kua noa foki a mutolu mo e Atua ke he lalolagi.
13 Ka ko e vaha nai, ha ko Keriso Iesu, kua fakatata mai tuai a mutolu ne vaha mamao i tuai ha ko e toto a Keriso.
14 Ko ia foki ne mafola ai a tautolu, ne eke e ia mo taha e na faoa, kua ulu foki e ia e pa ke he vaha loto ne veveheua ai,
15 Kua fakaoti foki e ia ke he hana ni a tino e faitaua, ko e fakatufono haia e tau poakiaga ha he tau kupu fakatonu; kia eke ai e ia a laua tokoua mo tagata fou e taha ni ha ha ia ia, kia tupu ai e mafola,
16 Mo e fakafeilo e ia mo e Atua e faoa tokoua ke he tino e taha ha ko e satauro, ha kua tamate ai e faitaua;
17 Kua haele mai foki a ia ti fakamatala mai e vagahau mitaki he mafola kia mutolu ne vaha mamao, katoa foki mo lautolu kua tata mai.
18 Ha kua moua e tautolu oti ia ia e takitakiaga ke he Matua ke he Agaga taha.
19 Hanai, nakai tuai ko e tau tagata kehe a mutolu, po ke tau tagata paea, ka ko e motu fakalataha mo e tau tagata tapu, ko e faoa foki he Atua;
20 Kua ati hake ki luga he fakaveaga he tau aposetolo mo e tau perofeta, Ko Iesu Keriso haia ko e maka ke fakamau aki e malokuaga,
21 Kua fakataitai ia ia e fale katoa kua hake, ke eke mo faituga tapu ke he Iki,
22 Ko ia foki kua ati hake fakalataha ai a mutolu ke he Agaga, ke eke mo haeleaga he Atua.