Esekielu 1:1-28
1 KO e tau tolugofulu, ke he fa mahani, ke he aho lima he mahina, ne ha i ai au mo e tau tagata he paeaga ne tata age ke he vailele ko Kepara, to maihiua ai e lagi, ti kitia ai e au e tau fakakiteaga mai he Atua.
2 Ko e aho lima he mahina, ko e tau lima haia he paeaaga he patuiki ko Iehoakina,
3 Ne hoko mai ai e kupu a Iehova kia Esekielu ko e tama a Posai ko e ekepoa, ke he motu he tau tagata Kaletaia tata age ke he vailele ko Kepara; ti ha i luga hana ke he mena ia e lima a Iehova.
4 Ne kitekite au, kitiala, ko e afa ne hau he fahi tokelau, ko e aolagi lahi, mo e afi, kua huhunu ni e ia a ia, ko e kikila foki kua agaagai ai ke he aolagi, mai loto foki ne tino mai po ke apa kikila mai loto he afi.
5 Mai loto foki ko e tau fakatai ke he tau mena momoui ne fa, ko e ha lautolu a tino mai hanai, kua fakatai a lautolu ke he tagata.
6 Ko e takitaha foki a lautolu mo e hana tau mata ne fa, takitaha foki mo e hana tau tapakau ne fa.
7 Ko e tau hui ha lautolu, ko e tau hui hahako ia, mo e tau aloalohui ha lautolu kua tuga e tau aloalohui he punua povi, ne kikila mai po ke apa kula kua fakakikila.
8 Ha ha i ai foki e tau lima tagata i lalo he tau tapakau ha lautolu ke he tau fahi ne fa ha lautolu; ha ha ia lautolu ne fa, ha lautolu a tau mata mo e ha lautolu a tau tapakau.
9 Ne tutaki ai ha lautolu a tau tapakau ko e taha ke he taha; nakai tafilu he o a lautolu; ka e takitaha a lautolu mo e fano fakahako atu ki mua hana.
10 Ko e fakatai foki he tau mata ha lautolu, ha ha ia lautolu ne fa e tau mata po ke tagata, mo e tau mata po ke leona ke he fahi matau; ha ha ia lautolu ne fa foki e tau mata po ke povi ke he fahi hema; ha ha ia lautolu ne fa foki e tau mata po ke aeto.
11 Ne vevehe kehekehe ai e tau mata ha lautolu mo e tau tapakau ha lautolu i luga; takitaha mo e tutaki ai e tau tapakau ne ua, ko e tau tapakau ne ua foki ne ufiufi ai ha lautolu a tau tino.
12 Ne takitaha a lautolu mo e fano fakahako atu ki mua hana; ko e mena ka fano ki ai e agaga kua o ki ai a lautolu, nakai tafilu a lautolu, he o atu a lautolu.
13 Ko e fakatai foki he tau mena momoui, ne tino mai a lautolu tuga ne tau malala kaka he afi puho, ne tino mai po ke tau lamepa; ne faifano ai a ia ke he vaha he tau mena momoui; ne kikila foki e afi, mo e kapa e uhila mai loto he afi.
14 Ne tafepoi taufeliuaki foki e tau mena momoui, kua tino mai tuga ne uhila.
15 Kua kitekite au ke he tau mena momoui ne fa, ti kitiala, ko e veli taha ne tu ke he kelekele ke he tapa he tau mena momoui mo e ha lautolu a tau mata ne takifā.
16 Ne tino mai foki e tau veli mo e ha lautolu a tauteaga tuga e tino mai e tasisa; ne tatai a lautolu ne fa; ko e ha lautolu a tino mai mo e ha lautolu a tauteaga ne tuga e veli ki loto he veli.
17 Ne o a lautolu ke he tau fahi ne fa ha lautolu he o a lautolu, nakai liliu a lautolu he o a lautolu.
18 Ko e tau mena foki ne vakai aki e tau veli kua tokoluga ni, kua tupu ai e matakutaku; kua puke foki e tau mena ne vakai aki a lautolu ke he tau mata, kua takai ai a lautolu ne fa.
19 Ka o atu e tau mena momoui, ti o ai foki e tau veli ke he tau fahi ha lautolu; ka nikiti foki e tau mena momoui mai he kelekele, ti nikiti ai e tau veli.
20 Ko e mena ke fano ki ai e tau agaga ne o ki ai a lautolu, ko e mena ia ke fano ki ai e agaga ha lautolu; ne nikiti ki luga foki e tau veli ke he tau fahi ha lautolu; he ha ha i ai e agaga he tau mena momoui ke he tau veli.
21 Ka o a lautolu, ti o ai a lautolu na; ka tutu foki a lautolu ti tutu ai a lautolu na; ka likiti foki a lautolu ki luga he kelekele, ti likiti ai e tau veliveli fakalataha mo lautolu; he ha ha i ai e agaga he tau mena momoui ke he tau veli.
22 Ko e lagi likoliko i luga he tau ulu he tau mena momoui ne tino mai tuga ne maka tioata ne matakutakuina, ne fofola ai i luga he tau ulu ha lautolu i luga.
23 Ne hakohako foki ha lautolu a tau tapakau i lalo he lagi likoliko, ne fakafehagai; takitaha a lautolu mo e ua e tapakau ne ufiufi ai e lautolu a lautolu; takitaha foki a lautolu mo e ua e tapakau ne ufiufi aki e lautolu ha lautolu a tau tino.
24 Ti logona e au e tuputupu he tau tapakau ha lautolu he o a lautolu, kua tuga ne go he tau vai loga, tuga ne leo Hana hana e malolo oti kana; ko e tomumu tuga ne tomumu mai he kau; ka tutu a lautolu ti tuku hifo ai e lautolu e tau tapakau ha lautolu.
25 Ti ha i ai foki e tomumu mai he lagi likoliko i luga he tau ulu ha lautolu; ka tutu a lautolu, ti tuku hifo ai e lautolu e tau tapakau ha lautolu.
26 Ha ha i luga foki he lagi likoliko i luga he tau ulu ha lautolu, ne ha i ai e fakatai ke he nofoaiki, kua tino mai po ke maka safaira; ha i luga foki he fakatai ke he nofoaiki ko e fakatai kua tino mai po ke tagata i luga hana.
27 Ne kitia foki e au tuga ne tino mai he apa kikila, ne tino mai tuga e afi ne takai ai i loto, ne tino mai he hana tokupu ke hoko hake ki luga; ne tino mai foki he hana tokupu ke hoko hifo ki lalo, ne kitia foki e au kua tino mai tuga ne afi, ne ha i ai foki e kikila ne agaagai ai.
28 Tuga ne tino mai e tagaloa ke he aolagi ke he aho uha, ne pihia e tino mai he hana kikila ne agaagai ai. Ko e hana tino mai ko e fakatai ia ke he lilifu a Iehova. Ne kitia e au ti veli fakafohifo ai au, ti logona ai e au e leo he taha kua vagahau mai.