Esekielu 14:1-23
14 TI o mai kia au falu a patu a Isaraela ti nonofo ai a lautolu ki mua haku.
2 Ti hoko mai ai kia au e kupu a Iehova kua pehe mai,
3 Ko e tama he tagata na e, kua fakatu ai he tau tagata na ha lautolu a tau tupua ke he tau loto ha lautolu, mo e tuku e lautolu ki mua ha lautolu e tau mahani kelea ha lautolu ke tupetupe ai; ke hūhū mai kia a lautolu kia au?
4 Ko e mena ia kia vagahau atu e koe kia lautolu, mo e pehe atu kia lautolu, Kua pehe mai e vagahau he Iki ko Iehova, Kaeke ke ha i ai e tagata he magafaoa a Isaraela kua fakatu ai hana tau tupua ke he hana loto, mo e tuku ai ki mua hana hana tau mahani kelea ke tupetupe ai a ia, mo e fina age ai a ia ke he perofeta; ko au ko Iehova to tali age e au kia ia ne fina age, ke lata mo e loga he hana tau tupua;
5 Kia moua ai e au e magafaoa a Isaraela ke he tau loto ni ha lautolu, ha kua o kehe a lautolu oti ia au ha ko e tau tupua ha lautolu.
6 Ko e mena ia kia pehe atu a ke he magafaoa a Isaraela, Kua pehe mai e vagahau he Iki ko Iehova, Kia liliu mai a, ti liliu kehe a a mutolu he tau tupua ha mutolu, kia hahaga kehe ha mutolu a tau mata he tau mena vihiatia oti ha mutolu.
7 Ha ko e tagata he magafaoa a Isaraela, po ke tagata kehe kua nofo ke he motu a Isaraela, kua fano kehe ia au, mo e fakatu ai hana tau tupua ke he loto hana, mo e tuku e ia ki mua hana e tau mahani kelea hana ke tupetupe ai a ia, mo e fina age ai ke he perofeta ke hūhū mai kia au, ko au ko Iehova, ko au ni, to tali atu e au kia ia.
8 To eke e au e tagata na mo fi haku, to eke foki e au a ia mo mena ke ofo ai, mo fakamailoga, mo kupu fakatai foki, to vevehe kehe foki e au a ia mo e haku motu; ti iloa ai e mutolu ko au ko Iehova
9 Ka ko e mena kaeke kua fakahehe e perofeta mo e vagahau atu ai e ia e kupu, ko au ko Iehova kua fakahehe ai e au e perofeta na, to fakaolo atu foki e au haku lima kia ia mo e fakaoti e au a ia mai he motu haku ko Isaraela.
10 To taui atu ni ha lautolu a mahani kelea; to tatai e taui he perofeta mo e taui hana ne kumi atu kia ia;
11 Ke aua neke hehe foki e magafaoa a Isaraela ke he ha lautolu a o kehe ia au, mo e nakai liu kelea ai a lautolu ke he tau holifono oti ha lautolu; ka kia eke a lautolu mo motu haku, mo e eke au mo Atua ha lautolu, kua pihia mai e Iki ko Iehova.
12 Kua hoko mai foki kia au e kupu a Iehova, kua pehe mai,
13 Ko e tama he tagata na e, kaeke ke hala e motu nai kia au, he holifono a lautolu, ti fakaolo atu e au haku a lima, mo e papaki ai e tokotoko he hana tau mena kai, mo e tuku atu ai e hoge, mo e fakaoti ai e tau tagata katoa mo e tau manu ha ha i ai;
14 Ane mai ha ha i ai e tau tagata tokotolu nai ko Noa, ko Tanielu, mo Iopu, po kua laveaki e lautolu a lautolu hoko lautolu ni ke he mahani tututonu ha lautolu, kua pihia mai e Iki ko Iehova.
15 Kaeke ke tuku atu e au e tau manu favale ke o age ai ke he motu, mo e fakaoti ai e tau tagata, kia toka noa ai e motu, mo e nakai tuai fina age ai taha ha ko e tau manu;
16 Ane ha ha i ai e tau tagata tokotolu ia, kua pehe mai e Iki ko Iehova, kua moui au, po kua nakai laveaki e lautolu ha lautolu a tau tama tane, poke ha lautolu a tau tama fifine, to laveaki a lautolu hoko lautolu ni ka to eke ai e motu mo mena toka noa.
17 Kaeke foki ke fakahoko atu e au e pelu ke he motu na, mo e pehe atu au, Ko e pelu na e, kia fina age a koe ke he motu; ke fakaoti ai e au e tau tagata katoa mo e tau manu;
18 Ane ha ha i ai e tau tagata tokotolu na, kua pehe mai e Iki ko Iehova kua moui ni au, po kua nakai laveaki ai e lautolu ha lautolu a tau tama tane po ke ha lautolu a tau tama fifine, ka to laveaki mai a lautolu hoko lautolu ni.
19 Kaeke foki ke tuku atu e au e tatalu ke he motu na, mo e liligi atu ki ai haku a ita lahi, ke he toto ke fakamaligi, ke fakaoti ai e tau tagata katoa mo e tau manu;
20 Ane ha ha i ai a Noa, mo Tanielu, mo Iopu, kua pehe mai e Iki ko Iehova, kua moui ni au, po kua nakai laveaki e lautolu ha lautolu a tau tama tane, po ke ha lautolu a tau tamafifine; to laveaki e lautolu a lautolu hoko lautolu ni ke he mahani tututonu ha lautolu.
21 Ko e mena ia kua pehe mai e vagahau he Iki ko Iehova; Ka e nakai kia au atu ai he pihia ka tuku atu e au ki Ierusalema haku a tau fakahala mamafa ne fa, ko e pelu, mo e hoge, mo e tau manu favale, mo e tatalu, ke fakaoti ai e tau tagata katoa mo e tau manu?
22 Ka e kitiala, to toe ai ni a lautolu kua hao, to takitaki atu ai a lautolu, ko e tau tama tane katoa mo e tau tamafifine; kitiala, to o mai a lautolu kia mutolu ti kitia ai e mutolu ha lautolu a mahani, mo e tau mena ha lautolu ne eke; ti mafanatia a mutolu ha ko e kelea kua fakahoko atu e au ki Ierusalema katoa foki mo e tau mena oti kua fakahoko atu e au ki ai.
23 To mafanatia a mutolu kia lautolu ka kitia e mutolu ha lautolu a mahani mo e ha lautolu a tau mena ne eke; ti iloa ai e mutolu kua nakai eke noa e au e tau mena oti ne eke e au ki ai, kua pihia mai e Iki ko Iehova.