Esekielu 15:1-8
15 KUA hoko mai foki kia au e kupu a Iehova, kua pehe mai,
2 Ko e tama he tagata na e, ko e heigoa kia e mena ne mua ai e akau ko e vine he tau akau oti, ko e la vine ne ha i ai mo e tau akau he vao?
3 To uta kia e akau he vine ke eke aki taha gahua? po ke eke aki e fao ke tautau ai e tau mena?
4 Kitiala, kua liti ke he afi ke eke mo gaafi, kua huhunu ni ke he afi hana na matapotu ua, ti huhunu ai hana lotoga, ko e mena aoga kia ma e taha gahua?
5 Kitiala, nakai eke aki ha gahua he katoatoa ai ti au atu he nakai aoga ke eke ai taha gahua he oti ai ke he afi, mo e huhunu ai.
6 Ko e mena ia kua pehe mai e vagahau he Iki ko Iehova, Ke tuga ne akau ko e vine he tau akau he vao, kua tuku atu e au ma e afi ke eke mo gaafi, to tuku atu pihia foki e au a lautolu kua nonofo i Ierusalema.
7 To eke foki a lautolu mo tau fi haku, to o atu a lautolu mai he afi, ka e fakaoti a lautolu he afi; ti iloa ai e mutolu ko au ni ko Iehova, ka eke e au a lautolu mo tau fi haku.
8 To tuku atu foki e au a mutolu ke eke mo mena kua moumou, ha kua hala lahi ni a lautolu, kua pihia mai e Iki ko Iehova.