Esekielu 18:1-32
18 NE hoko mai foki kia au e kupu a Iehova, kua pehe mai,
2 Ko e heigoa e mena kua eke ai e mutolu e fakatai nai ke he motu a Isaraela, kua pehe, Kua kai he tau matua tane e tau fua vine mui, ka e maniania ai e tau nifo he fanau?
3 Kua pehe mai e Iki ko Iehova, Kua moui au, nakai eke foki e mutolu e fakatai na ke he motu a Isaraela.
4 Kitiala, ko e tau agaga oti, ko e haku ni a lautolu; tuga he eke māku e agaga he matua tane, ti pihia foki e agaga he tama tane; ko e tagata kua hala to mate a ia.
5 Ka ko e mena kaeke kua mahani tututonu e tagata, mo e eke e ia e mahani hakohako, mo e tututonu,
6 Nakai kai ai a ia ki luga he tau mouga, ti nakai haga hake a ia ke he tau tupua he magafaoa a Isaraela, kua nakai fakakelea e ia e hoana he taha tagata, ti nakai fakatata age a ia ke he fifine ke he hana a nofo kehe;
7 Nakai ekefakakelea atu e ia ke he taha, kua liuaki atu e ia e mena ne fakamau aki e fakafua ne toka kia ia he tagata ne uta noa ai e tau mena ia ia ke totogi, nakai fofo e ia e tau mena he taha, kua age e ia hana tau mena kai kia ia ne hoge, kua fakatapulu foki e ia a ia kua nakai fai felevehi;
8 Kua nakai age e ia e tau mena ke totogi fakaloga mai, ti nakai talia e ia e mena ne moua ai he totogi fakaloga mai, ne liuaki e ia hana lima mai he mahani kelea, mo e eke ai e ia e fakafiliaga tonu ke he taha tagata mo e taha tagata.
9 Kua fano a ia ke he haku a tau fakatufono, kua omaoma a ia ke he haku a tau fakafiliaga, ke eke mo e fakamoli, kua mahani tututonu a ia; to moui ni a ia kua pihia mai e Iki ko Iehova.
10 Kaeke ke fanau ai e ia e tama tane ko e tagata fofo mena, mo e fakamaligi toto a ia, mo e eke ai e ia taha mena he tau mena ia,
11 Nakai eke foki e ia e tau mena oti ne lata, ka e kai a ia ki luga he tau mouga, mo e fakakelea e ia e hoana he taha tagata.
12 Ne eke fakakelea e ia kia lautolu ne matematekelea mo lautolu ne nonofogati, ne fofo mena a ia, ti nakai liuaki age e mena ne toka ia ia, ke fakamau aki e fakafua, ne haga hake a ia ke he tau tupua mo e eke e tau mena vihiatia.
13 Ne age e ia hana tau mena ke totogi fakaloga mai, ti talia foki e ia e mena ne fakalahi aki, to moui kia ia? Nakai ni moui a ia, ne eke e ia e tau mena vihiatia oti na to mate ni a ia; ti ha ha ia ia ni hana toto.
14 Kitiala, kaeke ke fanau he tagata e tama tane, ka kitekite a ia ke he tau hala oti ne eke he matua tane hana, mo e manamanatu ai a ia mo e nakai eke e ia e tau mena pihia;
15 Nakai kai ai a ia ki luga he tau mouga, ti nakai haga hake a ia ke he tau tupua he magafaoa a Isaraela, ti nakai fakakelea e ia e hoana he taha tagata,
16 Nakai eke fakakelea foki e ia ke he taha, ti nakai eke e ia e mena ne toka ia ia ke fakamau aki e fakafua, ti nakai fofo mena foki a ia, ka kua age e ia hana tau mena kia ia ne hoge, mo e fakatapulu e ia a ia kua nakai fai felevehi.
17 Ne liu aki mai e ia hana lima ia ia ne matematekelea, nakai eke e ia e totogi fakaloga, po ke mena ne fakalahi aki, ne eke e ia haku a tau fakafiliaga, mo e fano ai a ia ke he haku a tau fakatufono; nakai mate a ia ha ko e mahani kelea he hana matua tane, ka to moui ni a ia.
18 Ka ko e hana matua tane, ne favale a ia ti fofo e ia e tau mena he taha tagata; mo e eke ai e ia e tau mena nakai mitaki ke he hana motu, kitiala, to mate a ia ha ko e hana mahani kelea.
19 Ka e pehe mai a mutolu, Nakai kia taui atu ke he tama e mahani kelea he matua tane? Kaeke kua eke he tama e mahani kua lata mo e mahani tututonu, kua omaoma a ia ke he haku a tau fakatufono oti, mo e eke ai to moui ni a ia.
20 Ko e tagata kua hala to mate ni a ia; nakai taui atu e mahani kelea he matua ke he tama, to nakai taui atu foki e mahani kelea he tama ke he matua; to ha i luga he tagata tututonu hana mahani tututonu, to ha i luga foki he tagata mahani kelea hana mahani kelea.
21 Kaeke ke liu kehe e tagata mahani kelea mo e tau hala oti hana ne eke e ia, mo e omaoma a ia ke he haku tau fakatufono oti, mo e eke ai e ia e mahani kua lata, mo e mahani tututonu, to moui ni a ia, nakai mate.
22 Ko e hana tau holifono oti ne eke e ia nakai talahaua ia kia ia; ko e hana mahani tututonu ne eke e ia to moui ai a ia.
23 Kua pehe mai e Iki ko Iehova, Kua fiafia kia au ka mate e tagata mahani kelea? kua nakai kia fiafia au ka liu kehe a ia mo e hana tau mahani ke moui ai a ia?
24 Kaeke ke liu kehe e tagata tututonu mo e hana mahani tututonu, mo e mahani kelea a ia, mo e eke e ia ke lata mo e tau mena vihiatia oti kua eke he tagata mahani kelea, to moui kia a ia? Nakai tuai manatu ai hana tau mahani tututonu oti ne eke e ia; ko e hana hala ne hala ai a ia, mo e hana hehe ne hehe ai; to mate a ia ha ko e tau mena ia.
25 Ka kua pehe mai a mutolu, Kua nakai tatai e tau puhala he Iki. Kia fanogonogo mai a, ko e magafaoa a Isaraela na e, Nakai kia tatai haku a tau puhala? Nakai kia ko e tau puhala ha mutolu kua nakai tatai?
26 Ka liu kehe a ia ne tututonu mo e hana mahani tututonu, mo e eke e ia e mahani kelea mo e mate ai a ia; ko e hana mahani kelea ne eke kua mate ai a ia.
27 Ka liu kehe foki a ia ne mahani kelea mo e hana mahani kelea ne eke e ia, mo e eke e ia e mahani kua lata mo e mahani tututonu, to fakamoui ai e ia hana agaga.
28 Ha kua manamanatu a ia mo e liu kehe a ia mo e hana tau holifono ne eke e ia, to moui ni a ia, nakai mate.
29 Ka e pehe mai e magafaoa a Isaraela, Kua nakai tatai e tau puhala he Iki. Ko e magafaoa a Isaraela na e, nakai kia tatai e tau puhala haku? Nakai kia ko e tau puhala ha mutolu kua nakai tatai?
30 Ko e mena ia to fakafili ai e au a mutolu, takitokotaha ke lata mo e hana tau hala, ko e magafaoa a Isaraela na e, kua pihia mai e Iki ko Iehova. Liliu mai a, kia liliu kehe a mo e ha mutolu a tau holifono oti; ti nakai eke e mahani kelea mo mena ke tupetupe ai a mutolu.
31 Kia tiaki a e tau holifono oti ha mutolu ne holifono ai a mutolu, mo e eke a ma mutolu e loto fou, mo e agaga fou; ha kua fia mamate he ha a mutolu ko e magafaoa a Isaraela na e?
32 Ha kua nakai fiafia au ke he mateaga he tagata kua mate, kua pihia mai e Iki ko Iehova; hanai, kia liliu mai a a mutolu ti momoui ai a mutolu.