Esekielu 23:1-49
23 KUA hoko mai foki kia au e kupu a Iehova, kua pehe mai,
2 Ko e tama he tagata na e, ne tokoua e fifine, ko e tau tama ni he matua fifine taha,
3 Ne feuaki a laua i Aikupito, ne feuaki a laua ke he vaha ne tamafine ai ne mafota ai e tau huhu ha laua, ne fofota ai e tau huhu ha laua ko e tau tamafine ikiiki.
4 Ko e tau higoa foki ha laua ko Ahola ko e taokete, mo Aholipa hana matakainaga; ne eke foki a laua māku, ti fanau e laua ko e tau tama tane mo e tau tama fifine. Ka ko e tau higoa ha laua, ko Ahola ko Samaria haia, ko Aholipa ko Ierusalema haia.
5 Ne faivao a Ahola ha kua eke a ia maku; ne loto foki a ia kia lautolu ne manako kia ia, ko e tau tagata Asuria ko lautolu ne fetataaki mo ia.
6 Ne tapulu ai a lautolu ke he tau tapulu uli, ko e tau takitaki mo e tau pule, ko e tau fuata mitaki a lautolu oti, ko e kau heke solofanua.
7 Ti faivao a ia mo lautolu, ko e tau tagata ne mua a lautolu oti he tau tagata Asuria, mo lautolu oti ne loto a ia ki ai; ne fakakelea e ia a ia ke he tau tupua oti he lautolu.
8 Nakai tiaki e ia hana tau mahani feuaki ne eke i Aikupito; ha ko e mena momohe a lautolu mo ia ke he hana vaha tamāfine, ne fofota ai ia lautolu hana tau huhu ko e tamafine tote a ia, mo e liligi atu ha lautolu a tau feuaki ki luga hana.
9 Ko e mena ia ne tuku atu e au a ia ke he tau lima ha lautolu ne manako kia ia, ko e tau lima ni he tau tagata Asuria, ne loto a ia ki ai.
10 Ko lautolu nā ne fakanofonoa e lautolu a ia; ne uta foki e lautolu hana tau tama tane mo e hana tau tama fifine; ne keli foki e lautolu a ia ke he pelu, ti eke a ia mo kupu fakatai ke he tau fifine, ha kua fakahala e lautolu a ia.
11 Ne kitia he matakainaga hana ko Aholipa a ia, ka e mua he mahani kelea a ia he loto a ia kia lautolu ne manako kia ia ke he mahani kelea he hana matakainaga mo e hana faivao ne mua haia ke he faivao he hana matakainaga.
12 Ne loto a ia ke he tau tagata Asuria, ko lautolu ne fetataaki mo ia, ko e tau takitaki mo e tau pule ne tapulu ai ke he tau tapulu fulufuluola, ko e kau heke solofanua, ko e tau fuata mitaki a lautolu oti.
13 Ti kitia e au kua kelea tuai a ia, ne o ai a laua tokoua ke he puhala taha.
14 Ne fakaloga e ia hana tau faivao; he kitia e ia e tau tane ne ta ai ke he kaupa, ko e tau fakatino he tau tagata Kaletaia ne ta ai ke he vali kula.
15 Ne pipi e tau tokupu ha lautolu ke he tau pipi, ti ha i ai ke he tau ulu ha lautolu e tau potiki kula kehekehe, ko e tau iki takitaki kau a lautolu oti he kitekite ki ai, tuga ne tau tagata Papelonia i Kaletaia ko e motu ne fanau ai a lautolu.
16 Ne kitekite atu a ia ki ai, ti loto a ia kia lautolu, mo e fakafano atu e ia e tau fekau kia lautolu ki Kaletaia.
17 Ti o mai ai e tau tagata Papelonia nā kia ia ke he moheaga ti fakalataha ai, ti fakakelea e lautolu a ia ke he ha lautolu a tau faivao, ti kelea ai a ia ia lautolu, ti liu kehe ai hana loto ia lautolu.
18 Ti fakakite ai e ia hana tau faivao, ne fakakite foki e ia hana a nakai fai felevehi; ti liu kehe ai haku loto ia ia, tuga ne liu kehe e loto haku he hana matakainaga.
19 Ka e fakaloga ai e ia hana tau faivao, he manatu e ia ke he vaha ne tamafine ai a ia, ne feuaki ai a ia ke he motu ko Aikupito.
20 He loto a ia kia lautolu ne momohe mo ia, ko e tau tino ha lautolu kua tuga ne tino he tau asini, mo e puke vai he tau tino ha lautolu kua tuga ne puke vai he tino he tau solofanua.
21 Ti liu manatu ai e tau mena kelea ne eke e koe he hau a vaha tamafine, ne fofota ai he tau tagata Aikupito e tau huhu hau ha ko e tau huhu he hau a vahā tamāfine.
22 Ko e mena ia, Aholipa na e, kua pehe mai e vagahau he Iki ko Iehova, Kitiala, to fakaohooho atu e au a lautolu ne manako kia koe ke tau mo koe, ko lautolu ne liu kehe ai hau a loto, to ta mai e au a lautolu he tau fahi oti, ti tau a lautolu mo koe;
23 Ko e tau tagata Papelonia, katoa mo Kaletaia oti, ko Pekota, mo Soa, mo Koa, mo e tau tagata Asuria oti ne fakalataha mo lautolu, ko e tau fuata mitaki, ko e tau takitaki mo e tau pule a lautolu oti, ko e tau takitaki kau mo e tau tagata talahaua, kua heke solofanua a lautolu oti.
24 To o mai a lautolu kia koe mo e tau kanavaakau, mo e tau kariota, mo e tau veli, mo e fakapotopotoaga he motu; ti patakai e lautolu a koe mo e tau akau pāpā, mo e tau akau punuti, mo e tau potiki tau; to tuku atu foki e au e fakafiliaga kia lautolu, ti fakafili e lautolu a koe ke lata mo e fakafiliaga ha lautolu.
25 To fakahoko atu e au haku a ita tafuā kia koe, ti favale atu a lautolu kia koe; to hehele kehe e lautolu hau a ihu mo e hau a tau teliga; to mamate ke he pelu a lautolu ne toe kia koe; to uta e lautolu hau a tau tama tane mo e hau a tau tama fifine, to fakaoti foki ke he afi a lautolu ne toe kia koe.
26 To aki foki e lautolu ia koe hau a tau tapulu, mo e uta e lautolu e tau mena fulufuluola hau ne taute aki.
27 To fakahiku ai e au hau a kelea, mo e hau a tau feuaki mai he motu ko Aikupito: ti nakai liu haga hake a koe kia lautolu, mo e nakai manatu ai foki e koe a Aikupito.
28 Ha kua pehe mai e vagahau he Iki ko Iehova, Kitiala, to tuku atu e au a koe ke he tau lima ha lautolu ne vihiatia a koe, ko e tau lima ha lautolu ne liu kehe ai hau a loto.
29 To fakavihia e lautolu a koe, to uta foki e lautolu e tau mena oti ne mamahi ai a koe he gahua, to tiaki e lautolu a koe kua nakai tapulu mo e nakai fai felevehi, to fakakite ai foki e kelea he hau a faivao, ko e mahani matahavala hau, katoa mo e hau a tau faivao.
30 To eke e au e tau mena ia kia koe, ha ko e hau a mui atu ke he tau motu kehe ke faivao ai, ko lautolu haia ne kelea ai a koe ke he tau tupua ha lautolu.
31 Kua fano a koe ke he puhala he matakainaga hau, ko e mena ia kua tuku atu ai e au hana kapiniu ke he lima hau.
32 Kua pehe mai e vagahau he Iki ko Iehova, To inu a koe ke he kapiniu he hau a matakainaga, ne hokulo mo e lahi, ti eke a koe mo mena ke feki ai mo e va ki ai; kua lahi ni e mena ne toka ai.
33 To fakapuke a koe ke he inu ke konahia mo e mānu, ko e kapiniu he tau mena ke ofo ai mo e tau mena kua moumou; ko e kapiniu he hau a matakainaga ko Samaria.
34 To inu ni a koe, mo e mahagoa ai ni, to lipilipi foki e koe hana tau kapa kapiniu, mo e hēhē e koe hau a tau huhu; ha kua vagahau atu ai e au, kua pihia mai e Iki ko Iehova.
35 Ko e mena ia kua pehe mai e vagahau he Iki ko Iehova, Kua nimo au ia koe, mo e liti e koe au ki tua hau, ko e mena ia to taui ai kia koe hau a mahani matahavala, mo e hau a tau faivao.
36 Kua pehe mai foki a Iehova kia au, Ko e tama he tagata na e, to fakafili kia e koe a Ahola mo Aholipa? ati fakakite atu a kia laua ha laua a tau mena vihiatia.
37 Ha kua faivao ni a laua, ha ha he tau lima foki ha laua e toto; kua faivao a laua mo e ha laua a tau tupua; ko e tau fanau foki ha laua ne fanau mai ai e laua kia au, ne fakafano age e laua a lautolu ke he afi kia laua kia fakaoti ai a lautolu.
38 Ne eke foki e laua e mena nai kia au; ne fakakelea ai e laua haku a faituga ke he aho ia ni, mo e holi ai haku a sapati;
39 Ne kelipopo e laua e fanau he laua mo e tau tupua ha laua, ti o mai ai a laua he aho ia ni ke he faituga haku, ti holitu ai e laua; kitiala, ne eke pihia e laua i loto he fale haku.
40 Ko e mena nai foki, ne fakafano atu e mua ke he tau tane ke o mai he mena mamao, ne fakafano atu ai e fekau kia lautolu, ti kitiala, ne o mai ai a lautolu; ti koukou a koe ha ko lautolu, mo e vali ai hau a tau mata, mo e taute ai a koe ke he tau mena ke taute aki;
41 Ti nofo ai a ia ki luga he mohega fulufuluola, ti taute ai e lautolu ki mua hana, ti tuku ai e koe ki luga hana haku a tau mena manogi, mo e haku a puke lolo.
42 Ne ha ha ia ia foki e go he motu o tagata ne nonofo fakahanoa; ne tamai foki kia ia fakalataha mo e tau lalo tagata e tau tagata ne inu ke konahia mai he tutakale; ne tuku ai foki e lautolu e tau pipi lima ke he tau lima ha laua tokoua, mo e tau foufou fulufuluola ke he tau ulu ha laua.
43 Ti pehe age au kia ia kua leva he eke e tau mahani faivao, To faivao ainei a lautolu mo ia, ko ia foki mo lautolu.
44 Ka e o age a lautolu kia ia, tuga ne o age a lautolu ke he fifine fakataka, ne pihia ha lautolu a o age kia Ahola mo Aholipa, ko e tau fifine matahavala.
45 Ko e tau tagata tututonu, to fakafili e lautolu a laua, tuga he fakafili e lautolu e tau fifine faivao, tuga foki he fakafili e lautolu e tau fifine lima toto; ha ko e tau fifine faivao a laua, ha ha he tau lima foki ha laua e toto.
46 Ha kua pehe mai e vagahau he Iki ko Iehova, To ta hake e au e motu o tagata kia laua, to tuku atu foki e au a laua ke ekefakakelea ki ai, ke eke foki mo mena ne fofo he tau e tau mena ha laua.
47 To pinimaka he motu o tagata a laua ke he tau maka, ti keli ai a laua ke he tau pelu ha lautolu; to fakaoti foki e lautolu e tau tama tane mo e tau tama fifine ha laua, mo e huhunu ai e lautolu ha laua a tau fale ke he afi.
48 Ti fakahiku ai e au e mahani matahavala ke he motu, kia fakaako ai e tau fifine oti ke aua neke liu eke e lautolu tuga ne mahani matahavala ha mua.
49 To taui atu e lautolu ha mua a matahavala kia mua, to taui atu foki kia mua e hala he tau tupua ha mutolu; ti iloa ai e mua ko au ni ko e Iki ko Iehova.