Esekielu 24:1-27
24 NE hoko mai foki e kupu a Iehova kia au ke he tau hiva ke he mahina hogofulu ke he aho hogofulu he mahina, kua pehe mai,
2 Ko e tama he tagata na e, kia tohi e koe e higoa he aho, ko e aho nai ni; kua hoko atu e patuiki a Papelonia ki Ierusalema ke he aho nai ni.
3 Kia taute a e fakatai ke he magafaoa fakafualoto, mo e pehe atu a koe kia lautolu, Kua pehe mai e vagahau he Iki ko Iehova, Kia fakatu la e ulo, kia fakatu la, mo e liligi ki ai e maga vai.
4 Kia tatanaki ai hana tau maga kakano, ko e tau maga kakano mitaki oti; ko e hui, mo e lima; kia fakapuke ai ke he tau hui ne mua he mitaki.
5 Kia uta a e tau mena ne mua he mitaki he fuifui mamoe, mo e fakapotopoto ai e tau hui ki lalo hana, kia fakavela a ke puna, mo e tunu ai e tau hui ia.
6 Ko e mena ia kua pehe mai e vagahau he Iki ko Iehova, Oi te fakaalofa ke he maga lima toto, ko e ulo ne ha i ai hana tau otaota, mo e nakai uta kehe hana tau otaota. Kia ta hake takitaha ā hana tau maga kakano, aua neke eke ki ai e vili.
7 Ha kua ha i loto ia ia e toto he tau tagata ne keli e ia; ne tuku ai e ia ki luga he kaumaka ke he la; nakai liligi ai e ia ke he kelekele ke ufia ai he efuefu.
8 To tuku e au hana toto ki luga he kaumaka ke he la; ke aua neke ufia, kia fakatupu ai e ita ke taui atu ai.
9 Ko e mena ia kua pehe mai e vagahau he Iki ko Iehova, Oi te fakaalofa ke he maga lima toto! ko au, to fakalahi ai e au e fakapotopotoaga gaafi.
10 Kia age fakaloga ai e tau gaafi, kia puho ai e afi, kia tunu fakalahi ai e tau maga kakano ti eke ai e puke ke kakano, mo e huhunu ai e tau hui.
11 Ti tuku ai kua nakai ha i ai ha maga vai, ki luga hana tau malala kaka, kia vela ai, kia kaka ai e apa kula, kia pukepuke ai hana kelea i loto ia ia, kia fakaoti ai hana tau otaota.
12 Kua oti e manava hana he gahua mamafa, ka e nakai mole atu ia ia hana tau otaota loga; nakai mole atu ai hana tau otaota ke he afi.
13 Ne ha i ai e mahani matahavala ke he hau a kelea, he fakameā e au a koe, ka e nakai meā ai a koe; ti nakai tuai fakamea a koe he hau a kelea ato fakahiku ai e au haku a ita kia koe.
14 Ko au ko Iehova kua vagahau atu e au, to hoko ai ni, to eke e au ni, nakai tiaki e au, to nakai fakahao e au a koe to nakai tokihala au; to fakafili e lautolu a koe ke lata mo e hau a tau mahani, mo e hau a tau mena ne eke, kua pihia mai e Iki ko Iehova.
15 Ne hoko mai foki kia au e kupu a Iehova, kua pehe mai,
16 Ko e tama he tagata na e, kitiala, ko e uta kehe ne fai e au ia koe, ke he tatalu, a ia kua fiafia a koe ki ai; ka e nakai tagi tatuki ai a koe, ti nakai tagi ai a koe, to nakai hihina hifo ai foki hau a tau hihina mata.
17 Kia oi fakatekiteki a, aua neke tagi a koe ha ko ia ne mate, kia pipi a hau a potiki kia koe, mo e afi hau a tau aloalohui, aua neke ufiufi e koe hau a tau laugutu, ti ua kai foki a koe e tau mena kai he tau tagata.
18 Ti vagahau atu e au ke he motu ke he pogipogi, ti mate ai e hoana haku ke he afiafi; ti eke ai e au ke he pogipogi tuga ne poaki mai ai kia au.
19 Ti pehe mai e motu kia au, Nakai kia tala mai e koe kia mautolu po ke heigoa e tau mena na kua eke e koe kia mautolu?
20 Ti pehe age au kia lautolu, Ne hoko mai e kupu a Iehova kia au, kua pehe mai,
21 Kia pehe age a koe ke he magafaoa a Isaraela, Kua pehe mai e kupu he Iki ko Iehova, Kitiala, to fakakelea e au hau a faituga, ko e malolo ha mutolu ne hula ai a mutolu, ko e mena kua fiafia ki ai a mutolu, mo e mena ne fakaalofa ki ai ha mutolu a tau loto; ko e tau tama tane foki ha mutolu, mo e tau tama fifine ha mutolu ne toka ai e mutolu to mamate a lautolu ke he pelu.
22 To eke foki e mutolu tuga he eke e au; nakai ufiufi ai e mutolu ha mutolu a tau laugutu, to nakai kai foki a mutolu e tau mena kai he tau tagata.
23 To ha i ai e tau potiki ha mutolu ke he tau ulu ha mutolu, mo e ha mutolu a tau afialoalohui ke he tau hui ha mutolu; nakai tagi tatuki a mutolu, ti nakai tagi a mutolu; ka e fakaotioti ai a mutolu ha ko e tau mahani kelea ha mutolu, ti fetauoi aki a mutolu ko e taha ke he taha.
24 To eke ai a Esekielu mo fakamailoga kia mutolu; ke tuga ne tau mena oti ne eke e ia, to eke pihia foki e mutolu; ka hohoko mai e tau mena ia, ti iloa ai e mutolu ko au ko e Iki ko Iehova.
25 Ko koe foki ko e tama he tagata na e, ko e aho ke uta kehe ai e au ia lautolu ha lautolu a malolo, ko e fiafia he ha lautolu a lilifu, ko e mena ne fiafia ki ai a lautolu, ko e mena ne manako ki ai ha lautolu a tau loto, ko e tau tama tane ha lautolu, mo e tau tama fifine ha lautolu.
26 Nakai kia hau ai kia koe ke he aho ia e tagata kua hao ke logona ai e koe ke he hau a tau teliga?
27 Ko e aho ia to vevete ai hau a gutu kia ia kua hao, ti vagahau ai e koe, mo e nakai fakamate foki a koe; ti eke ai a koe mo fakamailoga kia lautolu; ti iloa ai e lautolu ko au ni ko Iehova.