Esekielu 26:1-21
26 KO e tau hogofulu ma taha, ko e aho fakamua he mahina, ne hoko mai ai e kupu a Iehova kia au, kua pehe mai,
2 Ko e tama he tagata na e, kua pehe mai a Turo ki Ierusalema, Aha! kua malipilipi a ia ne eke mo gutuhala he tau motu, kua liu mai a ia kia au, to makona ai au; kua moumou ai a ia.
3 Ko e mena ia kua pehe mai a vagahau he Iki ko Iehova, Turo na e, kitiala, to eke e au a koe mo fi haku, to ta hake e au e tau motu loga, ke tau a lautolu mo koe, ke tuga he fafati mai e tau peau he tahi.
4 To moumou e lautolu e tau kaupa a Turo mo e ulu ki lalo hana tau kolo, to tafi kehe e au hana tau efuefu, to eke foki e au e ia mo kaumaka ke he la.
5 To eke a ia mo mena ne fofola ai e tau kupega ki loto he tahi; ha ko au kua vagahau atu ai e au, kua pihia mai e Iki ko Iehova; to eke foki a ia mo mena ne fofo he tau ma e tau motu kehe.
6 Ko e hana tau tama fifine foki kua nonofo ki uta to keli a lautolu ke he pelu; ti iloa ai e lautolu ko au ni ko Iehova.
7 Ka kua pehe mai e vagahau he Iki ko Iehova, Kitiala, to takitaki mai e au ki Turo e patuiki a Papelonia ko Nepukanesa, ko e patuiki he tau patuiki mai he fahi tokelau, mo e tau solofanua, mo e tau kariota, mo e tau tagata heke solofanua, mo e kau, mo e tau tagata tokologa.
8 To keli ai e ia e tau tama fifine hāu ne nonofo i uta, ti eke ai e ia e tau kolo ia koe, mo e tanu fakatumutumu ai e kelekele kia koe, mo e fakatu hake ai e akau papā kia koe.
9 To fakatu atu foki e ia ke he hāu a tau kaupā e tau mena ke lipilipi aki, to lipilipi foki e ia hāu a tau kolo ke he hana tau mena matila.
10 Ko e hana tau solofanua ti ufitia a koe he efuefu ha lautolu he loga; ko e tomumu he hana tau tagata heke solofanua, mo e tau veli, mo e tau kariota to lulululu ai hāu a tau kaupā ka huhū atu ai a lautolu ke he hāu a tau gutuhala, tuga he huhū atu e tau tagata ke he maga ne malona e kaupa.
11 To taholi ai hāu a tau puhala oti he tau mahina hui he hana tau solofanua; to kelipopo ai ke he pelu hāu a tau tagata, ti liti hifo ai ke he kelekele e tau tupua ha ha i ai hau a malolo.
12 To fofo e lautolu hāu a tau koloa, mo e eke mo mena ne fofo he tau hāu a tau mena ne fakafua; to lipilipi e lautolu hāu a tau kaupā, mo e ulu moumou ai hāu a tau fale mitaki; ko e tau maka hau foki, mo e hau a tau akau, mo e hau a tau efuefu to liti e lautolu ki loto he tahi.
13 To fakahiku ai e au e go he hau a tau lologo, ko e leo foki he hau a tau kitara nakai tuai logona ai.
14 To eke e au a koe mo kaumaka ke he la; to eke a koe mo mena ke fofola ai e tau kupega; to nakai ni liu ati a koe; ha ko au ko Iehova kua vagahau atu, kua pihia mai e Iki ko Iehova.
15 Kua pehe mai e vagahau he Iki ko Iehova ki Turo, Nakai kia lulululu ai e tau motu ne takai he tahi ke he tomumu ka veli ai a koe, ka tauoi ai a lautolu kua kafokia, ka kelipopo ai e tau tagata i loto ia koe?
16 Ti o hifo ai e tau iki oti he tau motu ne tutu ai he hala kau tahi he tau nofoaiki ha lautolu, mo e toka kehe e lautolu e tau tapulu leleva ha lautolu, mo e aki ai e tau tapulu kilakila kehe ha lautolu; to tapulu ai a lautolu ke he vivivivi, to nonofo a lautolu ke he kelekele, mo e vivivivi nakai noa a lautolu, mo e ofomate ai a lautolu ha ko koe.
17 Ti tagi fekapai ai a lautolu kia koe, mo e pehe age a lautolu kia koe, Oi te! kua fakahiku a koe ne nonofo ai e tau tagata ne o mai he moana, ko e maga ne talahaua, ne malolo ai ke he tahi, ko ia mo lautolu ne nonofo ai, ko ia ne fakahoko ai e matakutaku kia lautolu ke he tau tagata oti ne nonofo ai.
18 Ti vivivivi ai e tau motu oti ne takai he tahi ke he aho ke veli ai a koe; ko e tau motu tu taha ha ha he moana, to fakaatukehe ai a lautolu he mole atu a koe.
19 Ha kua pehe mai e vagahau he Iki ko Iehova, Ka hoko ke he aho ke eke ai e au a koe mo maga kua moumou tuga ne tau maga nakai nonofo ai taha; ka hoko ke he aho ke ta hake ai e au e moana ki luga ia koe, mo e ufitia ai a koe he tau vai loga;
20 Ti ta hifo ai e au a koe ki lalo, fakalataha mo lautolu ne o hifo ai ke he luo, ko e tau motu ke he vaha i tuai, mo e fakanofo e au a koe ke he tau mena hokulo he kelekele, ke he tau mena ne eke mo tau mena kua moumou tali mai ne aho mua, fakalataha mo lautolu ne o hifo ke he luo, ke aua neke nofo ai taha ia koe; to tuku foki e au e lilifu ke he motu he tau tagata momoui.
21 Ti eke e au a koe mo mena ke matakutaku ai e tau tagata, ti nakai tuai ha ha i ai a koe; to kumi a koe ka e nakai tuai moua ai a koe tukulagi, kua pihia mai e Iki ko Iehova.