Esekielu 27:1-36
27 NE hoko mai foki kia au e kupu a Iehova, kua pehe mai,
2 Ko koe na ko e tama he tagata, kia tagi aue ā a koe ha ko Turo;
3 Mo e pehe age a koe ki Turo, Ko koe kua nofo ke he mena ne fina age ai ki tahi, ko e tagata fakafua koloa he tau motu ke he tau motu loga ne tutu ai he hala kau tahi, kua pehe mai e vagahau he Iki ko Iehova, Turo na e, kua pehe a koe, Ko au, kua katoatoa ni haku a fulufuluola.
4 Ha ha i loto he tahi hau a tau katofia, ne fakakatoatoa ai he tau tagata ne ta a koe hau a fulufuluola.
5 Ne eke ai e lautolu hau a tau lapa oti he tau perosi mai Senira; ne ta age foki e lautolu e tau arasi i Lepanona ke eke aki e fanā hāu.
6 Ko e tau aluna mai Vasana ne eke aki e lautolu hāu a tau fohe; ne eke ai hāu a tau nofoa ke he tau nifo elefane ne fakafulufuluola aki ke he tau tasura mai he tau motu ne takai he tahi i Kitimo.
7 Ko e ie kilakila kehe mai Aikupito ko e la hāu haia ke eke ia mo fakamailoga māu; ko e ie uli mo e ie kula uhi mai he tau motu ne takai he tahi i Elisa, ne ufiufi ai a koe.
8 Ko e tau tagata ne nonofo i Saitonu mo Arati ne eke a lautolu mo tau tagata alo vaka hāu; ko e tau tagata iloilo hāu, Turo na e, ha ha ia koe a lautolu, ne eke a lautolu mo tau tagata fakatila vaka hāu.
9 Ko e tau patu a Kavali mo e hana tau tagata iloilo ne eke a lautolu mo tau tufuga ponoponoti vaka māu; ko e tau vaka oti he tahi mo e tau kanovaka ha lautolu ne ha ha ia koe ke fakafua ai hāu a tau koloa.
10 Ne ha i ai ke he kau hāu e tau tagata Peresia, mo Luti, mo Futu, ne eke a lautolu mo tau tagata tau hāu; ne tautau ai e lautolu ia koe e akau punuti mo e potiki tau, ne fakafulufuluola ai e lautolu a koe.
11 Ne ha i ai i luga hāu a tau kaupā ke he tau fahi oti, e tau tagata Arati fakalataha mo e kau hau, ne ha i ai foki ke he tau kolo hāu e tau tagata Kamati; ne tautau takai ai e lautolu e tau akau punuti ha lautolu ke he hāu a tau kaupā; ne fakakatoatoa ai e lautolu hāu a fulufuluola.
12 Ko Tasisa, ko e fakafua koloa a ia ha ha ia koe, he loga e tau koloa oti; ko e ario, ko e lapatoa, ko e apa hina, mo e pili ne fakafua ai e lautolu hāu a tau mena fakafua.
13 Ko Iavana ko Tupalu, mo Meseko, ko e tau fakafua koloa ia ha ha ia koe, ne age e lautolu e tau tagata mo e tau kapiniu apa kula ke fakafua aki hāu a tau mena fakafua.
14 Ko e tau tagata he magafaoa a Tokaremo, ne fakafua aki e lautolu hana tau mena fakafua he tau solofanua, mo e tau solofanua ke heke ai ke tau, mo e tau falata.
15 Ko e fanau a Titana ko e tau fakafua koloa a lautolu ha ha ia koe; ko e tau motu loga ne takai he tahi ne eke mo tau mena ke fakafua ai hāu a tau mena ne eke, ne ta mai ai e lautolu kia koe e tau nifo elefane mo e tau kieto ke taui aki.
16 Ko Suria ko e fakafua koloa a ia ha ha ia koe he loga hāu a tau mena ne eke, ne fakafua aki e lautolu hau a tau mena fakafua he tau nofeka, mo e ie kula uhi, mo e tau tapulu kilakila kehe, mo e ie lino, mo e tau feo, mo e tau maka kula.
17 Ko Iuta foki mo e motu ko Isaraela ko e tau fakafuakoloa a lautolu ha ha ia koe; ne fakafua aki e lautolu hāu a tau mena fakafua he tau fua saito Meniti, mo e panaka, mo e meli, mo e puke lolo, mo e pili pasama.
18 Ko Tamaseko ko e fakafua koloa a ia ha ha ia koe he loga hāu a tau mena ne eke, he loga foki e tau koloa oti, ko e uaina a Helepona mo e tau fulu mamoe hina.
19 Ko Vetana mo Iavana-meusala ne fakafua ai e lautolu hāu a tau mena fakafua, ko e tau lapatoa taute, mo e tau kesia, mo e tau kani, ne ha i ai ke he hau a tau mena fakafua.
20 Ko Titana ko e fakafua koloa ha ha ia koe a ia, ke he tau ie fulufuluola ke fofola ai ke he tau solofanua ka heke.
21 Ko Arapi, mo e tau iki oti a Kitara, ko e tau fakafuakoloa a lautolu ha ha ia koe, ko e tau punua mamoe, mo e tau mamoe tane, mo e tau koti tane; ko e tau mena ia ne fakafua ai e lautolu ia koe.
22 Ko e tau tagata fakafuakoloa a Sihipa mo Ragama, ko e tau fakafuakoloa a lautolu ha ha ia koe; ko e tau mena manogi ne mua oti, mo e tau maka uho oti, mo e tau auro ne fakafua ai e lautolu hau a tau mena fakafua.
23 Ko Karana, mo Kane, mo Etena, ko e tau fakafuakoloa a Sihipa, mo Asura, mo Kilemata, ko e tau fakafuakoloa haia ha ha ia koe.
24 Ko lautolu ia ha ha ia koe ne fakafua ai e tau mena fulufuluola, ko e tau tapulu uli, mo e tau tapulu kilakila kehe, mo e tau koloa ko e tau tapulu mitaki ue atu ne haihai ke he tau toua, kua mau, ne ha i ai mo e hāu a tau mena fakafua.
25 Ne eke e tau foulua Tasisa māu mo tau mena ke uta aki hāu a tau koloa ne fakafua; ne fakakoloa ai foki a koe, mo e lilifu lahi ai ni a koe ke he tutavaha.
26 Ko e hāu a tau tagata alo vaka ne uta e lautolu a koe ke he moana laulahi; ne malipilipi ai a koe ke he matagi uta ki loto he tahi.
27 Ko e hāu a tau koloa, mo e hāu a tau taoga, ko e hau a tau mena fakafua, ko e hāu a tau kauvaka, mo e tau tagata fakatila vaka hau, ko e hāu a tau tufuga ponoponoti vaka, mo e tau tagata ne fakafua ai e tau koloa hāu, mo e hāu a tau tagata tau oti ha ha ia koe, katoa mo e tau tagata oti ha ha ia koe, to mahaikava a lautolu ke he tutavaha ke he aho ke malaia ai a koe.
28 Ko e leo he fakatutu he hāu a tau tagata fakatila vaka to lulululu ai e tau fonua ne takai ai a koe.
29 Ko lautolu oti foki kua alo fohe, ko e tau kauvaka, mo e tau tagata fakatila vaka oti he tahi to o hake a lautolu mai he tau foulua ha lautolu mo e tutu ai ke he kelekele.
30 To fakaleolahi a lautolu ha ko koe, mo e tagi auē fakalahi ni, to aku hake e lautolu e tau efuefu ke he tau ulu ha lautolu; to taveli a lautolu ke he tau efuefuafi.
31 To hifipuga foki e lautolu ha lautolu a tau ulu ha ko koe, mo e felevehi ai a lautolu he ie talatala; to tagi foki a lautolu mo e mamahi lahi ai e tau loto ha ko koe, mo e tagi tatuki lahi ai a lautolu.
32 To fati e lautolu e lologo moiofa ha ko koe, ne pehe age e lologo ha lautolu, Ko fe kia e motu ke tatai mo Turo, ke tatai mo ia kua mahaikava ke he tutavaha?
33 Ne fakapuke ai e koe e tau motu loga he fetuku hake ai hāu a tau koloa mai he tahi; ko e hāu a tau koloa mo e hāu a tau mena fakafua loga ne fakakoloa ai e tau patuiki he lalolagi.
34 Ka ko ainai kua malipilipi ai a koe ke he tahi ke he tau mena hokulo he moana; kua mole atu ai hāu a tau koloa, mo e tau tagata oti hāu, i loto ia koe.
35 Ko lautolu oti ne nonofo ke he tau motu ne takai he tahi kua ofomate a lautolu ha ko koe, ko e tau patuiki ha lautolu foki kua matakutaku lahi ni, kua vivivivi lahi ni a lautolu.
36 Ko e tau tagata fakafuakoloa he tau motu kua fakakatakatakē a lautolu kia koe; kua eke a koe mo mena ke hoko ai e matakutaku, to nakai tuai ha i ai a koe tukulagi.