Esekielu 29:1-21
29 KO e tau hogofulu, ko e mahina hogofulu ko e aho hogofulu ma ua he mahina, ne hoko mai ai kia au e kupu a Iehova, kua pehe mai,
2 Ko e tama he tagata na e, Kia hagao atu a koe kia Farao ko e patuiki a Aikupito, mo e perofeta atu a koe kia ia katoa mo Aikupito oti;
3 Kia vagahau atu a, ti pehe atu a koe, Kua pehe mai e vagahau he Iki ko Iehova, Kitiala, kua fai fi au kia koe, Farao na e, ko e patuiki a Aikupito, ko e tanimo lahi, kua takoto ke he vaha he hana tau vailele, ko ia kua pehe mai, Ko e haku a tau vailele, ko e haku ni haia, ne eke ai e au maku.
4 To tui e au e tau matau ke he hau a tau kauloa, mo e eke e au ke pipiki atu e tau ika he hāu a tau vailele ke he tau hinafi hāu, to ta hake foki e au a koe mai loto he tau vailele hāu; ko e tau ika oti foki he tau vailele hāu to pipiki ai ke he hāu a tau hinafi.
5 To tiaki foki e au a koe ke he vao, ko koe mo e tau ika oti he hāu a tau vailele; to veli a koe ke he fuga kelekele, nakai fakapotopoto ai a koe, to nakai tatanaki foki; kua tuku atu e au a koe ke eke mo tau mena kai he tau manu huifā he vao, mo e tau manu lele he pulagi.
6 To iloa ai foki e lautolu oti kua nonofo i Aikupito ko au ni ko Iehova, he eke a lautolu mo tokotoko kaho ke he magafaoa a Isaraela.
7 Ne totō e lautolu e tau lima hāu, ti mapaki ai a koe, ti mahē ai ha lautolu a tau fulima oti, ne falanaki a lautolu kia koe ti mapaki ai a koe ti vivivivi ai e tau tokupu oti ha lautolu.
8 Ko e mena ia kua pehe mai e vagahau he Iki ko Iehova, Kitiala, to fakahoko atu e au e pelu kia koe, mo e fakaoti ai e au e tau tagata katoa mo e tau manu ha ha ia koe.
9 To eke ai e motu ko Aikupito mo tau mena kua moumou, mo vao foki; ti iloa ai e lautolu, ko au ni ko Iehova; he pehe age a lautolu, Ko e haku a vailele, ne eke ai e au.
10 Kitiala, ko e mena ia kua fai fi ai au kia koe, katoa mo e hau a tau vailele; to eke ni e au e motu ko Aikupito mo vao, mo tau mena foki kua moumou, ke kamata mai i Mikatolo ke hoko atu ki Sivena, ke hoko ni ke he tau katofia a Aitiope.
11 To nakai o atu ai e tau hui he tau tagata, to nakai o atu foki e tau hui he tau manu, to nakai nofo ai foki taha ke he tau tau ne hogofulu.
12 To eke foki e au e motu ko Aikupito mo tau mena kua moumou fakalataha mo e tau motu kua eke mo tau mena kua moumou; ko e hana tau maga foki fakalataha mo e tau maga kua eke mo vao; to eke ai mo tau mena kua moumou ke he tau tau ne hogofulu; to fakamavehevehe atu e au e tau tagata Aikupito ke he tau motu kehe, mo e fakapaea fano e au a lautolu ke he tau motu.
13 Ha kua pehe mai e vagahau he Iki ko Iehova, Ka mole atu fagofulu e tau to fakapotopoto ai e au e tau tagata Aikupito mai he tau motu ne fakamavehevehe atu ai a lautolu.
14 Ti liu aki e au e paeaaga a Aikupito, mo e liu aki age e au a lautolu ke he motu ko Patarosi, ko e maga ne tutupu ai a lautolu, to eke foki a lautolu ke he mena ia mo kautu fakateaga.
15 To mua hana fakateaga ke he tau kautu, ti nakai tuai fakatokoluga a ia ke he tau motu; ha ko e mena to fakatokogahoa e au a lautolu, kia nakai liu pule a lautolu ke he tau motu.
16 To nakai tuai eke foki a lautolu mo mena ke tua ki ai e magafaoa a Isaraela, ke fakamanatu ai ha lautolu a mahani kelea ke he ha lautolu a hagao atu ki ai; ti iloa e lautolu ko au ko e Iki ko Iehova.
17 Ko e tau uafulu ma fitu ko e mahina fakamua ko e aho fakamua he mahina, ne hoko mai ai kia au e kupu a Iehova, kua pehe mai,
18 Ko e tama he tagata na e, ne pule e patuiki a Papelonia ko Nepukanesa ke he hana kau kia eke e lautolu e gahua lahi ki Turo ne kila ai e tau ulu ha lautolu oti ti matakataka ai e tau ua ha lautolu he hahamo kavega, ka e nakai fai palepale i Turo ko ia mo e hana kau ha ko e gahua ne eke ai e ia.
19 Ko e mena ia kua pehe mai e vagahau he Iki ko Iehova, Kitiala, to ta age e au e motu ko Aikupito ke he patuiki a Papelonia ko Nepukanesa; to uta ai e ia hana motu o tagata, mo e eke māna e tau mena ne moua he tau, mo e fofo hana tau koloa; to eke foki ia mo palepale ke he kau hana.
20 Kua age e au kia ia e motu ko Aikupito ko e hana taui ia he fekafekau mai a ia kia au; ha ko e mena eke gahua a lautolu māku, kua pihia mai e Iki ko Iehova.
21 Ko e aho ia ni to fakatupu ai e au e hoe he magafaoa a Isaraela; to foaki atu foki e au kia koe ke vagahau kia lautolu; ti iloa ai e lautolu ko au ni ko Iehova.