Esekielu 3:1-27
3 KUA pehe mai a ia kia au, Ko e tama he tagata na e, kia kai a e mena ke moua ai e koe; kia kai a e koe e tohi vakai na ti fano a koe, mo e vagahau atu ke he magafaoa a Isaraela.
2 Ti fakamaga e au haku gutu, ti fagai ai e ia au ke he tohi vakai na.
3 Ti pehe mai a ia kia au, Ko e tama he tagata na e, kia talia a e koe ke he manava hau, kia makona ai hau a manava he tohi vakai na kua ta atu e au kia koe; ti kai ai e au, kua tuga ne meli ke he haku gutu he humelie.
4 Ti pehe mai a ia kia au, Ko e tama he tagata na e, fano a koe, kia fano a ke he magafaoa a Isaraela, mo e vagahau atu e koe e tau kupu haku kia lautolu.
5 Ha ko e mena nakai fakafano atu a koe ke he motu vagahau kehe mo e tau kupu uka, ka ko e magafaoa a Isaraela;
6 Nakai ko e tau motu loga mo e tau vagahau kehe, mo e tau kupu uka nakai logona ai e koe e tau vagahau ha lautolu. Ane mai kua fakafano atu e au a koe kia lautolu po kua fanogonogo a lautolu kia koe.
7 Ka ko e magafaoa a Isaraela nakai mafai a lautolu ke fanogonogo kia koe; he nakai mafai a lautolu ke fanogonogo mai kia au; ha kua maō e tau matalē mo e maō e tau loto he magafaoa oti a Isaraela.
8 Kitiala, kua eke e au ke maō e mata hau, ke fehagai ai mo e tau mata ha lautolu, mo e hau a matalē ke maō, ke fehagai ai mo e tau matalē ha lautolu.
9 Kua eke e au hau a matalē ke tuga e samira kua mua hana maō ke he kaumaka uli; aua neke matakutaku a koe ia lautolu, ti ua matakutaku a koe he tau mata ha lautolu, pete ni ko e tau tagata fakafualato a lautolu.
10 Ti pehe mai a ia kia au, Ko e tama he tagata na e, kia talia e koe ke he hau a loto, mo e fanogonogo ai a koe ke he hau a tau teliga ke he tau kupu oti ke vagahau atu ai e au kia koe.
11 Fano ā kia fano a koe kia lautolu ne nonofo paea, ko e tau tagata he haku a motu, mo e vagahau atu a koe kia lautolu, ti pehe atu a koe kia lautolu, Kua pehe mai e vagahau he Iki ko Iehova, po ke fanogonogo mai a lautolu, po ke nakai.
12 Ti ta hake ki luga au he Agaga, ti logona ai e au ki tua haku e leo he tomumu lahi, kua pehe mai, Kia fakaheke a ke he lilifu a Iehova mai he haeleaga hana.
13 Ne logona foki e au e tuputupu he tau tapakau he tau mena momoui he fepikiaki ko e taha ke he taha mo e gu he tau veli ne tata age ki ai, mo e gu he tomumu lahi.
14 Ne ta hake au he Agaga, ti uta e ia au, ti fano au mo e mamahi mo e ita he haku loto; ka kua malolo mai e lima a Iehova ki luga ia au.
15 Ti hoko atu au kia lautolu ne nonofo paea i Teleapipa ko lautolu ne nonofo tata age ke he vailele ko Kepara, he nonofo ai a lautolu ke he mena ia; ti fitu e aho ne nofo ai au ia lautolu mo e fakahahaku.
16 Kua mole atu e tau aho fitu ti hoko mai ai kia au e kupu a Iehova, kua pehe mai,
17 Ko e tama he tagata na e, kua eke e au a koe mo tagata toko ke he magafaoa a Isaraela; ko e mena ia kia fanogonogo mai a koe ke he kupu mai he gutu haku, mo e fakamafana e koe a lautolu ia au.
18 Ka pehe atu kia ia ne mahani kelea, To mate ni a koe; ka e nakai fakamafana e koe a ia, mo e nakai vagahau atu a koe kia ia ke mafanatia a ia, ke liu mai a ia he hana puhala kelea, kia moui ai a ia; to mate e tagata mahani kelea na he hana mahani hepehepe, ka ko e toto hana to taui atu ai e au kia koe.
19 Ka ko e mena kaeke ke fakamafana e koe a ia ne mahani kelea; ka e nakai liu mai a ia he hana mahani kelea mo e hana puhala kelea, to mate a ia he hana mahani hepehepe; ka ko koe kua laveaki e koe a koe.
20 Ka liu kehe foki e tagata tututonu he hana mahani tututonu, ka e eke ai e mahani hepehepe, ti tuku e au ki mua hana e mena ke tupetupe ai, ti mate ai a ia; to mate ai a ia he hana tau hala, he nakai fakamafana e koe a ia, to nakai manatu ai e mahani tututonu ne eke e ia; ka ko e toto hana to taui atu ia kia koe.
21 Ka ko koe, kaeke ke fakamafana e koe a ia ne mahani tututonu kia nakai hala a ia ne mahani tututonu, ti nakai hala a ia, to moui ni a ia, ha kua fakamafanatia a ia; ko koe foki, kua laveaki e koe a koe.
22 Ha ha i luga foki ia au e lima a Iehova ke he mena ia; ti pehe mai a ia kia au; Kia matike a koe ti fano a koe ke he kelekele tatai to vagahau atu e au kia koe ke he mena ia.
23 Ti matike ai au mo e fano ke he kelekele tatai; ti kitiala, ko e lilifu a Iehova ne tu mai ai, tuga ne lilifu ne kitia e au tata age ke he vailele ko Kepara; ti fakaveli fakafohifo ai au.
24 Ti hu mai ai e Agaga ki loto ia au, ti fakatu ai e ia au ki luga he tau hui haku, ti vagahau mai e ia kia au kua pehe mai kia au, Kia fano a koe, ti puipui e koe a koe ke he fale hau.
25 Ko koe foki ko e tama he tagata, kitiala, to lili e lautolu a koe ke he tau toua, to lili ai e lautolu a koe, ti nakai fina atu a koe kia lautolu.
26 To eke foki e au ke pipiki hau a alelo ke he aloalogutu hau, kia fakamate ai a koe, ti nakai eke a koe mo tagata ke akonaki atu kia lautolu; ha ko e magafaoa fakafualoto a lautolu.
27 Ka vagahau atu e au kia koe, ti fakavagahau ai e au a koe, ti pehe atu a koe kia lautolu, Kua pehe mai e vagahau he Iki ko Iehova, Ko ia ke fanogonogo mai, kia fanogonogo mai a ia, ka ko ia ke nakai fanogonogo mai, kia nakai fanogonogo mai a ia; ha ko e magafaoa fakafualoto a lautolu.