Esekielu 31:1-18
31 KO e tau hogofulu ma taha, ko e mahina tolu, ko e aho fakamua he mahina ne hoko mai ai e kupu a Iehova kia au, kua pehe mai,
2 Ko e tama he tagata na e, Kia pehe atu a koe kia Farao ko e patuiki a Aikupito, mo e hana motu o tagata; Kua tuga a hai a koe ke he hāu a lilifu?
3 Kitiala, ko Asuria ko e arasi i Lepanona a ia, ne fulufuluola hana tau la, ne malu foki hana fakamalu, ne lahi foki hana tokoluga; ha i loto foki he tau la vihi hana tapunu akau.
4 Ko e tau vai ne tupu lahi ai a ia, ko e tau vai hokulo foki ne tokoluga ai a ia, ko e hana tau vailele ne tafe takai ai ke he tau kaina hana ne to ai e tau mena, mo e hana tau hala vai ne tafe atu ke he tau akau oti he vao.
5 Ko e mena ia ne mua ai hana tokoluga he tau akau oti he vao, ti loga ai hana tau la, mo e leleva ai hana tau la ha ko e tau vai lalahi ke he hana tupu atu.
6 Ne fata ai e tau manu lele oti ke he hana tau la, ne fanau ai foki e tau manu totolo oti he vao ki lalo hifo hana tau la, ti nonofo ai e tau motu lalahi oti ki lalo he malu hana.
7 Ne fulufuluola foki a ia, ha ko e hana tupu lahi, mo e leleva he hana tau la; he ha i ai hana tau vaka ke he tau kauvai he tau vai lalahi.
8 Nakai galo ai a ia he tau arasi ke he kaina he Atua; nakai tatai e tau perosi mo e tau la hana; nakai lata foki e tau aremoni mo e tau la hana; nakai fai akau foki ke he kaina he Atua ne tatai mo ia ke he hana fulufuluola.
9 Ne fakafulufuluola ai e au a ia ke he hana tau la loga, ne mahekeheke kia ia e tau akau oti i Etena, ke he kaina he Atua.
10 Ko e mena ia kua pehe mai e vagahau he Iki ko Iehova, Ne mua a koe ke he hāu a tokoluga, mo e tuku e ia hana tapunu akau ki loto he tau la vihi, ne fakatokoluga ai foki hana loto ha ko e hana tokoluga.
11 Ko e mena ia to tuku atu e au a ia ke he lima hana ne mua e malolo he tau motu; to eke ni e ia kia ia e tau mena ne loto ki ai a ia; kua vega kehe e au a ia ha ko e hana tau mahani kelea.
12 Ko e tau tagata kehe ko lautolu ne matakutaku ki ai e tau tagata ke he tau motu, kua hehele kehe e lautolu a ia mo e tiaki e lautolu a ia; kua to hifo foki hana tau la ke he tau mouga mo e tau pahua oti, kua mapakipaki foki hana tau la ke he tapa he tau vailele oti he motu; kua o kehe foki e tau motu oti he lalolagi, mai lalo hifo hana malu, mo e tiaki ni e lautolu a ia.
13 To nonofo foki e tau manu lele oti ki luga hana ka kua takaveli a ia; to ha ha i ai foki ki luga hana tau la e tau manu oti he vao.
14 Ke aua neke fakatokoluga taha he tau akau oti ke he tapa he tau vai ha ko e tokoluga ha lautolu; po ke ta hake ki luga ha lautolu a tau tapunu akau ki loto he tau la vihi; po ke tutu ki luga a lautolu kia lautolu ha kua mua he tokoluga ha lautolu, ko lautolu oti kua inu e tau vai, ha kua tuku atu a lautolu oti ke mamate ke he tau mena tokolalo he lalolagi, ke fakalataha mo e fanau he tau tagata, ke fakalataha foki mo lautolu ne o hifo ke he luo.
15 Kua pehe mai e vagahau he Iki ko Iehova, Ko e aho ne hifo ai a ia ki Seoli ne fakatupu ai e au e tagi; ne ufiufi ai e au e tau vai hokulo ha ko ia, ne puipui ai foki e tau vai lalahi, ne fakatupu ai foki e au e tagi a Lepanona ha ko ia; ne taupogia ai e tau akau oti he vao ha ko ia.
16 Ne fakavivivivi ai foki e au e tau motu ke he tomumu he veli ai a ia, he liti hifo e au a ia ki seoli fakalataha mo lautolu ne o hifo ai ke he luo; ko e tau akau Etena oti i Lepanona ne fifili mo e mitaki, ko lautolu oti kua inu vai, kua fakamafanatia a lautolu ke he tau mena tokolalo he lalolagi.
17 Ne o hifo foki a lautolu fakalataha mo ia ki seoli kia lautolu ne kelipopo ai ke he pelu; ko lautolu ni ne eke mo lima hana, ne nonofo a lautolu i lalo he malu hana ke he tau motu.
18 Ko hai kia ke fakatai a koe ki ai ke he lilifu mo e lahi he tau akau Etena? Ka e ta hifo ni a koe ki lalo fakalataha mo e tau akau Etena ke he tau mena tokolalo he lalolagi; to takaveli a koe fakalataha mo lautolu nakai peritome mo lautolu ne kelipopo ke he pelu. Ko Farao haia mo e hana motu o tagata oti, kua pihia mai e Iki ko Iehova.