Esekielu 33:1-33
33 NE hoko mai foki kia au e kupu a Iehova, kua pehe mai,
2 Ko e tama he tagata na e, kia vagahau atu a koe ke he tagata he hāu a motu, kia pehe atu ā a koe kia lautolu, Ka fakahoko atu e au e pelu ke he motu, kaeke ke uta he tau tagata he motu ia taha tagata he motu ha lautolu, mo e kotofa e lautolu a ia ke eke mo toko ma lautolu;
3 Ka kitia e ia e pelu ha ne hau ke he motu, kaeke ke ulo e ia e pu, mo e fakailoa atu ai ke he motu;
4 Ko e tagata kua logona e leo he pu, ka e nakai omaoma ki ai; ka hoko age e pelu, mo e mate ai a ia, to ha i luga he ulu hana ni hana a toto.
5 Ne logona e ia e leo he pu, ka e nakai omaoma a ia ki ai; to ha ia ia ni hana toto; ka ko e mena ane mai ke omaoma a ia ki ai po kua fakahao e ia hana moui.
6 Ka ko e mena kaeke kua kitia he toko e pelu kua hau, ka e nakai ulo e ia e pu, mo e nakai fakailoa atu e ia ke he motu; ka hoko mai e pelu, mo e mate ai taha ia lautolu, kua mate a ia he hana mahani kelea; ka to taui atu e au hana toto ke he toko.
7 Ko koe foki ko e tama he tagata na e, kua kotofa e au a koe mo toko ke he magafaoa a Isaraela; ko e mena ia kia fanogonogo mai a koe ke he tau kupu he gutu haku mo e fakamafana atu e koe a lautolu ia au.
8 Ka pehe atu au ke he tagata mahani kelea, Ko e tagata mahani kelea na e, to mate ni a koe; kaeke ke nakai vagahau atu e koe, ke fakamafana atu kia ia ne mahani kelea ke liu kehe ai a ia he hana tau mahani; to mate e tagata mahani kelea na he hana mahani kelea; ka ko e hana toto to taui atu ai e au kia koe.
9 Ka ko koe kaeke kua fakamafana atu e koe e tagata mahani kelea, kia liu kehe a ia he hana mahani; kaeke kua nakai liu kehe a ia he hana mahani, to mate ai a ia he hana mahani kelea; ka kua laveaki e koe hāu a agaga.
10 Ko koe foki, ko e tama he tagata na e, kia pehe age ā ke he magafaoa a Isaraela, Kua vagahau mai a mutolu, kua pehe mai, Ha ha ia mautolu ha mautolu a tau holifono, mo e ha mautolu a tau hala, mo e fakaotioti ai a mautolu ha ko e tau mena ia, po ke momoui fefe a mautolu?
11 Kia pehe age a koe kia lautolu, Kua pehe mai e Iki ko Iehova, Kua moui au, nakai fiafia au ka mate e tagata mahani kelea, ka kia liu mai a ia ne mahani kelea he tau mahani hana mo e moui ai; liliu ā, kia liliu kehe ā a mutolu he tau mahani kelea ha mutolu; ka kua fia mamate he ha a mutolu ko e magafaoa a Isaraela na e?
12 Ko koe foki ko e tama he tagata, kia pehe age ā ke he tau tagata he hāu a motu, Nakai laveaki ai e tagata tututonu he hana mahani tututonu ke he aho kua holifono ai a ia; nakai veli foki e tagata mahani kelea he hana mahani kelea ke he aho kua liu kehe ai a ia he hana mahani kelea; to nakai moui foki e tagata tututonu he hana mahani tututonu ke he aho kua hala ai a ia.
13 Ka pehe atu au ke he tagata tututonu, ke moui ai a ia, kaeke ke tua a ia ke he hana mahani tututonu, mo e eke e ia e mahani kelea, ti nakai manatu ai hana mahani tututonu oti, ka e mate ai a ia he hana mahani kelea ne eke e ia.
14 Ka pehe atu foki au ke he tagata mahani kelea, To mate ni a koe; kaeke ke liu kehe a ia he tau hala hana, mo e eke e ia e mahani hakohako mo e mahani tututonu;
15 Kaeke ke liu aki age he tagata mahani kelea e mena ne fakamau aki e fakafua, mo e liu aki age e tau mena ne fofo e ia, mo e fano ai a ia ke he tau fakatufono ke moui ai, mo e nakai eke e ia e tau mahani kelea; to moui ni a ia, nakai mate.
16 Ko e hana tau hala oti ne eke e ia nakai talahaua ia kia ia; kua eke e ia e mahani hakohako mo e tututonu; to moui ni a ia.
17 Ka kua pehe mai e tau tagata he hāu a motu, Kua nakai tatai e tau puhala he Iki; ka ko lautolu, kua nakai tatai ha lautolu a tau puhala.
18 Ka liu kehe e tagata tututonu he hana mahani tututonu, mo e eke e ia e mahani kelea, ti mate ai ni a ia.
19 Ka liu kehe e tagata mahani kelea he hana tau mahani kelea, mo e eke e ia e mahani hakohako, mo e mahani tututonu, ti moui ai ni a ia.
20 Ka e pehe mai a mutolu nakai tatai e puhala he Iki. Ko e magafaoa a Isaraela na e, to fakafili e au a mutolu takitokotaha ke lata mo e hana ni a mahani.
21 Ko e tau hogofulu ma ua he ha mautolu a paeaaga, ko e mahina hogofulu, ko e aho lima he mahina, ne hau ai e taha kia au ne hao i Ierusalema, kua pehe mai, Kua keli tuai e maga.
22 Ne ha i ai foki kia au ke he afiafi e lima a Iehova, ka e nakaila hoko mai a ia ne hao; ne fakavagahau foki e ia au, ato hau ai a ia ke he magaaho pogipogi; ti vagahau ai ni e au, ti nakai tuai fakamate au.
23 Ti hoko mai ai kia au e kupu a Iehova, kua pehe mai,
24 Ko e tama he tagata na e, kua vagahau a lautolu kua nonofo ke he tau mena kua moumou he kelekele a Isaraela, kua pehe mai, Ne tokotaha a Aperahamo ne eke foki mana e motu; ka e tokologa a tautolu; kua foaki mai e motu kia tautolu ke eke ma tautolu.
25 Ko e mena ia kia pehe age a koe kia lautolu. Kua pehe mai e vagahau he Iki ko Iehova, Kua kai mena a mutolu mo e toto, mo e kitekite atu ke he tau tupua ha mutolu, mo e fakamaligi e mutolu e toto; ka to eke kia e mutolu e motu?
26 Kua tutu a mutolu mo e tau pelu ha mutolu, kua eke e mutolu e tau mena vihiatia, kua takitaha a mutolu mo e fakakelea e hoana he taha tagata; ka to eke kia e mutolu e motu ma mutolu?
27 Kia tala age e koe kia lautolu, pehe, Kua pehe mai e vagahau he Iki ko Iehova, Kua moui au, ko lautolu ha ha he tau mena kua moumou to mamate ni a lautolu ke he pelu, ko ia ha ha i ai ke he vao to tuku atu e au a ia ke he tau manu he vao ke kai a ia; ko lautolu foki ha ha he tau taue mo e tau ana to mamate ni a lautolu he tatalu.
28 To eke e au e motu mo tau mena kua moumou mo mena foki ke ofo ai, ti hiku ai foki hana malolo ne hula ai; ti eke foki e tau mouga a Isaraela mo tau mena kua moumou, nakai ni fina age ai taha.
29 Ti iloa ai e lautolu ko au ni ko Iehova, he eke e au e motu ha lautolu mo tau mena kua moumou, mo mena foki ke ofo ai, ha ko e ha lautolu a tau mena vihiatia oti ne eke e lautolu.
30 Ko koe foki ko e tama he tagata na e, kua vagahau ai foki kia koe e tau tagata he motu hāu ke he tapa he tau kaupā mo e tau gutuhala he tau fale, kua fevagavagahau aki a lautolu ko e taha ke he taha, kua pehe age, O mai a, kia fanogonogo a tautolu po ke heigoa e kupu kua hoko mai ia Iehova.
31 Kua o mai foki a lautolu kia koe tuga he o mai e motu haku, kua nonofo foki a lautolu ki mua hāu tuga he nonofo ai e motu haku, ti logona foki e lautolu e tau kupu hāu, ka e nakai omaoma a lautolu ki ai; ha kua fakaalofa noa a lautolu mo e tau gutu ha lautolu, ka kua hagao atu e tau loto ha lautolu ke he velevelemena ha lautolu.
32 Kitiala, kua eke a koe kia lautolu ke tuga e lologo fulufuluola he tagata ne leo mitaki, mo e ta fakamitaki e akau fakatagi; ka kua logona e lautolu hāu a tau kupu ka e nakai omaoma a lautolu ki ai.
33 Ka hohoko e tau mena ia, kitiala kua hohoko mai, ti iloa ai e lautolu ne ha i ai mo lautolu e perofeta.