Esekielu 34:1-31
34 NE hoko mai foki kia au e kupu a Iehova, kua pehe mai,
2 Ko e tama he tagata na e, kia perofeta age a koe ke he tau leveki mamoe a Isaraela, kia perofeta a mo e pehe age a koe kia lautolu ke he tau leveki mamoe ni, Kua pehe mai e vagahau he Iki ko Iehova, Oi te fakaalofa ke he tau leveki mamoe a Isaraela kua fagai e lautolu a lautolu ni! Ka e nakai kia lata ke fagai he tau leveki mamoe e tau mamoe?
3 Kua kai e mutolu e gako mo e tapulu ai a mutolu ke he tau fulu, kua kai e mutolu e tau mamoe gako ka e nakai fagai e mutolu e tau mamoe.
4 Nakai fakamalolo ai e mutolu a lautolu ne lolelole, ti nakai fakamaulu ai e mutolu a lautolu ne gagao, ti nakai pipi foki e mutolu a lautolu ne malipilipi, ko e tau mena ne vega kehe nakai liu aki mai ai e mutolu, ti nakai kumi e mutolu a lautolu ne galo, ka e pule fakamaō ai mo e favale atu a mutolu kia lautolu.
5 Ne fakamavehevehe foki a lautolu he nakai fai leveki mamoe; ne eke foki a lautolu mo tau mena kai he tau manu oti he vao, mo e fakamavehevehe ai a lautolu.
6 Ne hehe ai haku a fuifui mamoe ke he tau mouga oti, mo e tau mena tokoluga oti; ne fakamavehevehe foki haku a fuifui mamoe oti ke he fuga kelekele oti ti nakai fai tagata ke huhu ki ai, po ke kumi e taha a lautolu.
7 Ko e mena ia, ko e tau leveki mamoe na e, kia fanogonogo mai a mutolu ke he kupu a Iehova;
8 Kua pehe mai e Iki ko Iehova, Kua moui au, ne eke ni haku a tau mamoe mo tau mena kua hehe, ne eke foki haku a tau mamoe mo tau mena kai he tau manu favale oti he vao, he nakai fai leveki mamoe, nakai kumi foki he tau leveki mamoe haku e tau mamoe haku, ka e fagai he tau leveki mamoe a lautolu ni ka e nakai fagai e lautolu haku a tau mamoe;
9 Ko e mena ia, ko e tau leveki mamoe na e, kia fanogonogo mai a mutolu ke he kupu a Iehova;
10 Kua pehe mai e vagahau he Iki ko Iehova, Kitiala, kua fai fi au ke he tau leveki mamoe; to kumi atu foki e au haku tau mamoe kia lautolu, ti tiaki e au a lautolu ke nakai tuai fagai e lautolu e tau mamoe; to nakai fagai foki he tau leveki mamoe a lautolu ni; ha ko e mena to laveaki mai e au haku a tau mamoe he tau gutu ha lautolu, ke aua neke eke a lautolu mo tau mena kai ma lautolu.
11 Ha kua pehe mai e vagahau he Iki ko Iehova, Kitiala, ko au, ko au ni, to kumi e au haku a tau mamoe, to kumi fakamakutu ni e au a lautolu.
12 Tuga he kumi he leveki mamoe hana fuifui mamoe ke he aho ne ha i ai a ia mo e hana tau mamoe ne fakamavehevehe, to kumi pihia e au haku a tau mamoe; mo e laveaki e au a lautolu mai he tau mena oti ne fakamavehevehe atu ki ai a lautolu, ke he aho ne malumalu ai e lagi mo e pouli.
13 To ta mai foki e au a lautolu he tau motu, mo e fakapotopoto ai e au a lautolu mai he tau motu kehekehe; ti ta mai e au a lautolu ke he kelekele ha lautolu, mo e fagai ai e au a lautolu ke he tau mouga a Isaraela, ke he tapa he tau vailele, mo e tau mena oti ne kakai ai e tau tagata ke he motu.
14 To fagai ai e au a lautolu ke he tau mena ne tutupu mitaki ai e motie, to ha i ai ha lautolu a lotopā ke he tau mouga tokoluga a Isaraela; to tatakoto ai a lautolu ke he lotopa mitaki, ko e mena ne toka ai e vao mui to kai a lautolu ke he tau mouga a Isaraela.
15 To fagai e au haku a tau mamoe, ko au foki ke tatakoto ai a lautolu, kua pihia mai e Iki ko Iehova.
16 To kumi foki e au a ia ne galo, to liu aki mai e au a ia ne vega kehe, to pipi e au a ia ne mafatifati, to fakamalolo e au a ia ne lolelole; ka ko lautolu ne gako, mo lautolu ne malolo to fakaoti ai e au a lautolu, to fagai e au a lautolu ke he fakafiliaga.
17 Kua pehe mai e vagahau he Iki ko Iehova, Ko mutolu, ko e haku a fuifui mamoe na e, kitiala, to fakafili e au ke he tau manu mo e tau manu, ko e tau mamoe tane mo e tau koti tane.
18 Ko e mena tote kia kia mutolu he kai ai e mutolu ke he mena ne tupu mitaki ai e motie, ka kua taholi ai ke he tau hui ha mutolu e tau mena ne toe ke he fonua; ke inu ai foki he tau vai tavana, ka kua fakakalepu ai ke he tau hui ha mutolu e vai ne toe?
19 Ko e haku a tau mamoe foki kua kai a lautolu he tau mena ne taholi ai he tau hui ha mutolu; mo e inu a lautolu he vai ne kalepu ai he tau hui ha mutolu.
20 Ko e mena ia kua pehe mai e vagahau he Iki ko Iehova kia lautolu, Kitiala, ko au, ko au ni, to fakafili e au e tau manu gako, mo e tau manu feko.
21 Kua tulei atu a mutolu ke he tau kahokaho ha mutolu, mo e tau fulima ha mutolu, mo e hoka e mutolu a lautolu oti ne lolelole ke he tau hoe ha mutolu, ato fakamavehevehe e mutolu a lautolu ki tua he pa;
22 Ko e mena ia to fakamoui e au haku a fuifui mamoe, ti nakai tuai eke a lautolu mo tau mena ke hēhē; to fakafili foki e au e tau manu mo e tau manu.
23 To fakatu foki e au e leveki mamoe ne tokotaha ma lautolu, ti fagai e ia a lautolu, ko e haku a fekafekau ko Tavita; to fagai e ia a lautolu, to eke foki a ia mo leveki mamoe kia lautolu;
24 Ko au foki ko Iehova to eke au mo Atua ha lautolu, ko e haku a fekafekau foki ko Tavita to eke a ia mo iki ha lautolu; ko au ko Iehova kua vagahau atu.
25 To eke foki e au mo lautolu e maveheaga ke monuina ai, to fakaoti ai e au e tau manu favale he vao ke he motu; to nonofo fakatekiteki a lautolu ke he tutakale; mo e momohe ai ke he vao motua.
26 Ko lautolu mo e tau mena kua agaagai ai ke he haku a mouga to eke e au ia mo tau mena ke monuina ai; to fakato hifo e au e uha ke he hana ni a vahā; to ha i ai e tau uha ke monuina ai.
27 To fua mai e akau he fonua hana tau fua; to fua mai foki e kelekele hana tau fua; to nonofo fakatekiteki foki a lautolu ke he ha lautolu a motu; ti iloa ai e lautolu ko au ni ko Iehova ka fafati e au e lakau hahamo ha lautolu, mo e laveaki e au a lautolu mai he tau lima ha lautolu ne fakatupa ai a lautolu.
28 To nakai eke foki a lautolu mo tau mena kua hēhē ai ke he tau motu kehe, to nakai tuai kai he tau manu he vao a lautolu; ka to nonofo fakatekiteki a lautolu, to nakai ha i ai foki taha ke fakamatakutaku atu kia lautolu.
29 To fakatupu ai foki e au ma lautolu e kaina ke talahaua, ti nakai fakaoti foki a lautolu he hoge ke he motu, ti nakai tuai fakama foki a lautolu he tau motu kehe.
30 Ti iloa ai e lautolu ko au ni ko Iehova ha lautolu a Atua, kua ha i ai au mo lautolu; ko lautolu foki ko e magafaoa a Isaraela ko e haku a motu ni a lautolu, kua pihia mai e Iki ko Iehova.
31 Ko mutolu foki ko e fuifui mamoe haku, ko e fuifui mamoe ne fagai e au, ko e tau tagata ni a mutolu; ko au foki ko e Atua ha mutolu, kua pihia mai e Iki ko Iehova.