Esekielu 35:1-15
35 NE hoko mai foki kia au e kupu a Iehova, kua pehe mai,
2 Ko e tama he tagata na e, kia haga atu a koe ke he mouga ko Seira mo e perofeta atu a koe ki ai.
3 Ti pehe atu a koe ki ai, Kua pehe mai e vagahau he Iki ko Iehova, Kitiala, ko e mouga na e ko Seira, kua fai fi au kia koe, to fakaolo atu foki e au haku lima ki luga hāu, mo e eke e au a koe mo tau mena kua moumou, mo mena foki ke ofo ai.
4 To eke e au hāu a tau māga mo tau mena kua moumou, to eke ni a koe mo mena toka noa, ti iloa ai e koe ko au ni ko Iehova.
5 He faitaua mau a koe, mo e tuku atu e koe e fanau a Isaraela ke he malolo he pelu ke he vaha ne malaia ai a lautolu, ke he vaha ne hiku ai e mahani kelea.
6 Ko e mena ia kua pehe mai e Iki ko Iehova, Kua moui au, to tuku atu e au a koe ke he toto, to tutuli foki he toto a koe; nakai fakavihia e koe e toto, ko e mena ia to tutuli ai a koe he toto.
7 To eke ai e au e mouga ko Seira mo mena ke ofo ai mo mena foki kua moumou, to fakaoti ai foki e au a ia ne fina atu ki ai, katoa foki mo ia ne liu mai ai.
8 To fakapuke foki e au hana tau mouga ke he hana tau tagata kua kelipopo; ko e hau a tau mouga, mo e hāu a tau pahua, mo e hāu a tau vailele oti, to veveli ai e lautolu kua kelipopo ke he pelu.
9 To eke e au a koe mo tau mena kua moumou tukulagi, to nakai nofo ai foki taha ke he tau maga hau; ti iloa ai e mutolu ko au ko Iehova.
10 Kua pehe a koe, Ko e tau motu ua na, mo e ha lautolu a tau kelekele ne ua to eke e au māku, ti nonofo ai a mautolu; ka e ha ha i ai a Iehova.
11 Ko e mena ia kua pehe mai ai e Iki ko Iehova, Kua moui au, to eke e au kia koe ke lata mo e hāu a ita, ke lata foki mo e hāu a mahekeheke ne eke ai e koe he hāu a fakavihia kia lautolu; to fakailoa ai e au a au kia lautolu, ka fakahala ai e au a koe.
12 Ti iloa ai e koe ko au ni ko Iehova, kua logona ai e au hāu a tau kupu amuamu oti ne vagahau ai e koe ke he tau mouga a Isaraela, kua pehe age, Kua eke mo tau mena kua moumou, kua tuku mai kia mautolu ke fakaoti ai.
13 Ne vagahau fakatokoluga a mutolu kia au, ne fakaloga foki e mutolu ha mutolu a tau kupu kia au; ne logona ai ni e au.
14 Kua pehe mai e vagahau he Iki ko Iehova, ka olioli e lalolagi oti, to eke e au a koe mo tau mena kua moumou.
15 Tuga he olioli a koe ke eke ai mo tau mena kua moumou e tufaaga he magafaoa a Isaraela, to eke pihia e au kia koe; to eke a koe mo tau mena kua moumou ko e mouga na e ko Seira, katoa mo Etoma oti, ko e motu oti ni; ti iloa ai e lautolu ko au ni ko Iehova.