Esekielu 4:1-17
4 KO koe foki ko e tama he tagata, kia ta mai e koe e maka kelekele, mo e tuku ai ki mua hau, mo e ta ai e koe e maga, ko Ierusalema;
2 Kia pa takai ai, mo e ati e kolo ke tau ki ai, mo e aku fakatumutumu ki ai e kelekele, kia heapi foki ki ai, mo e tuku takai ai e tau mena ke tuki aki.
3 Kia ta mai foki e koe e lapatoa lapalapa, mo e fakatu e koe ke eke mo kaupa lapatoa he vaha loto hau mo e maga; ti hagao atu a koe ki ai, to pa takai ai a ia, ti pa takai e koe a ia. To eke ia mo fakamailoga ke he magafaoa a Isaraela.
4 Ko koe foki kia takoto a koe ke he fahi hema hau, mo e tuku ai e koe ki luga hau e mahani kelea he magafaoa a Isaraela, ko e tau aho katoa ne takoto ai a koe to fua ai e koe e mahani kelea ha lautolu.
5 Ha kua kotofa e au kia koe e tau tau ne mahani kelea ai a lautolu, ko e hana tau aho ka totou ne tolu e teau ti hivagofulu e aho, ke fua ai e koe e mahani kelea he magafaoa a Isaraela.
6 Ka fakakatoa ai e koe e tau aho ia ti takoto ai a koe ke he hau a fahi matau, kia fua ai e koe e mahani kelea he magafaoa a Iuta ke he fagofulu e aho; fakalata e aho taha ke he tau taha, ko e aho taha ko e tau taha ia, kua kotofa ai e au kia koe.
7 Ti hagao atu a koe ki Ierusalema kua pa takai, ti toka kehe e koe e tapulu mai he lima hau, mo e talahau ai e koe hana malaia.
8 Ti kitiala, kua lili e au a koe ke he tau toua, ti nakai fuluhi e koe mai he taha fahi ke he taha fahi ato fakakatoa ai e koe e tau aho he pa takai ai e koe.
9 Kia uta e koe māu e tau fua saito, mo e tau fua karite, mo e tau fua pini, mo e tau fua atasema, mo e tau fua tokana mo e tau fua kaseme, ti tuku ai e koe ke he taha kumete, mo e taute aki e koe e tau mena kai māu; ke lata ai mo e tau aho ka totou he takoto fakatitafa ai a koe; ko e tolu e teau ti hivagofulu e aho ke kai ai a koe.
10 Ko e hāu a tau mena kai foki ke kai ai a koe, to fafati ia, ko e aho mo e uafulu sikeli; to kai ai ke he tau aho katoa.
11 To fafati foki e vai ke inu ai, ko e veveheaga ne ono aki e hinu ma e aho taha; ke inu ai ke he tau aho katoa.
12 To kai ai e koe e tau areto karite pukupuku, to tunu ai foki e koe ke he tau otaota mai he tau tagata ki mua ha lautolu.
13 Ti pehe mai a Iehova To kai pihia e fanau a Isaraela e tau mena kelea ke he tau motu kehe ke vega e au a lautolu ki ai.
14 Ti pehe atu au, Oi te ko e Iki na e Iehova! kitiala, nakai kelea au he tau mena kai, he tali he tote au kua hoko mai ke he aho nai nakai kai au ha mena ne mate noa, po ke mena ne hēhē, ti nakai puku ai he gutu haku ha tufaaga he tau manu kelea.
15 Ti pehe mai a ia kia au, Kitiala, kua ta atu e au e otaota he tau povi, he hukui aki e otaota he tau tagata, ti taute ai e koe hau e tau mena kai.
16 Kua pehe mai foki a ia kia au, Ko e tama he tagata na e, kitiala, to papaki e au e tokotoko he tau mena kai i Ierusalema, ti kai ai mo e fakaatukehe a lautolu e tau mena kai ha lautolu kua fafati, ti inu mo e fakahahaku a lautolu e magavai ha lautolu kua fafati.
17 Kia hoge a lautolu ke he tau mena kai mo e vai, ke takitaha foki a lautolu oti mo e fakahahaku, mo e fakaoti ai a lautolu ke he mahani kelea ha lautolu.