Esekielu 43:1-27
43 TI takitaki e ia au ke he gutuhala, ko e gutuhala ne hagao atu ke he fahi uta;
2 Ti kitiala, ko e lilifu he Atua a Isaraela ne haele mai mai he fahi uta; ko e hana leo foki tuga ne go he tau vai loga; ti maama ai e lalolagi he hana lilifu.
3 Ti tuga ne tino mai he fakakiteaga ne kitia e au, tuga e fakakiteaga ne kitia e au he hau au ke fakaoti e maga; ko e fakakiteaga foki tuga e fakakiteaga ne kitia e au ke he vailele ko Kepara; ti veli fakafohifo ai au.
4 Ti haele mai ai e lilifu a Iehova ke he fale ne hala mai ai he gutuhala ne hagao atu ke he fahi uta.
5 Ti nikiti ai au he Agaga, ne uta foki e ia au ke he lotopa i loto; ti kitiala, kua puke ai e fale he lilifu a Iehova.
6 Ti logona e au taha kua vagahau mai kia au mai loto he fale; ne tu mai foki e tagata ke he haku tapa.
7 Ti pehe mai a ia kia au, Ko e tama he tagata na e, ko e mena ha ha i ai haku a nofoaiki, mo e mena ne tu ai haku tau aloalohui, to nofo ai au fakalataha mo e fanau a Isaraela tukulagi, ti nakai tuai fakakelea foki he magafaoa a Isaraela haku a higoa tapu, ko lautolu mo e tau patuiki ha lautolu ke he ha lautolu a tau feuaki, to nakai kelea foki he tau tino mamate he tau patuiki ha lautolu ke he tau mena tokoluga ha lautolu.
8 Ke he ha lautolu a tuku e tau gutuhala ha lautolu ke he tapa he gutuhala haku, mo e tau pou gutuhala ha lautolu ke he tapa he haku a tau pou, ko e kaupa foki ne katofia aki a lautolu mo au; ne fakakelea foki e lautolu haku higoa tapu ke he tau mena vihiatia ha lautolu ne eke e lautolu; ko e mena ia ne fakaoti ai e au a lautolu ke he haku a ita.
9 Ka ko ainei, kia tiaki e lautolu e tau feuaki ha lautolu, mo e tau tino mamate he tau patuiki ha lautolu, ke mamao ia au, ti nofo ai au fakalataha mo lautolu tukulagi.
10 Ko koe na ko e tama he tagata, kia fakakite atu e koe e fale ke he magafaoa a Isaraela, kia ma a lautolu ha ko e tau mahani kelea ha lautolu; kia fafati foki e lautolu e fakatai na.
11 Kaeke foki kua mā a lautolu ha ko e tau mena oti ne eke e lautolu, ti fakailoa atu e koe kia lautolu e kakano he fale, mo e hana fakatai, mo e hana tau puhala ne huhū atu ai ki fafo, mo e hana tau puhala ne huhū mai ai ki fale, mo e hana tino mai katoa, mo e hana tau kotofaaga oti, mo e hana tino mai katoa, mo e hana tau fakatufono oti; kia tohi ai la ki mua ha lautolu, kia omaoma a lautolu ke he hana tau mena oti kua fakakite mai, mo e hana tau kotofaaga oti, mo e eke ai e lautolu.
12 Ko e fakatufono hanā he fale ki luga he tapunu mouga, ko e hana tau katofia oti kua takai aki to tapu ue atu ia. Kitiala, ko e fakatufono he fale haia.
13 Ko e tau fafati hanai he fatapoa ke he tau kupita; (ko e kupita ne ha i ai e kupita mo e taha matalima;) ko e hui ne taha e kupita ko e laulahi foki ko e taha e kupita, ko e hala foki ne takai aki hana tau fahi ko e kupita taha; ko e fakatuaga he fatapoa haia.
14 Ke kamata mai he hui ke he kelekele ke hoko ke he fahi ne takai aki i lalo, ne ua e kupita, ko e hana laulahi foki ne taha e kupita; ke kamata mai foki he fahi tote ne takai aki ke hoko ke he fahi lahi ne takai aki ne fa e kupita, ko e hana laulahi foki ne taha e kupita.
15 Ko e fatapoa foki i luga ne fa e kupita hana; ne fa foki e hoe ne tutu hake ai ke he fuga luga he fatapoa.
16 Ko e loa foki he fatapoa ko e hogofulu ma ua e kupita, ne hogofulu ma ua foki e kupita hana laulahi, ne fakafahifa tatai a ia.
17 Ko e fahi ne takai aki foki ne hogofulu ma fa e kupita hana loa, ti hogofulu ma fa e kupita e laulahi he hana tau fahi ne fa; ko e hana kala foki ne takai aki, ko e mena ne veveheua aki e kupita haia, mo e hana hui ne taha e kupita ne takai aki; ko e hana hala papahi foki ne hagao atu ke he fahi uta.
18 Ne pehe mai foki a ia kia au, Ko e tama he tagata na e, kua pehe mai e vagahau he Iki ko Iehova, Ko e tau fakatufono ke he fatapoa hanai ke he aho ke eke ai e lautolu ke taute ai e tau poa ki luga hana, ke pīpī ai foki e toto ki luga hana.
19 To ta age e koe e punua povi tane ke he tau ekepoa ko e tau tagata Levi, ko e fanau a Satoka ne fakatata mai kia au ke fekafekau kia au, ke eke mo poa ha ko e hala, kua pihia mai e Iki ko Iehova.
20 To uta foki mai he toto hana, mo e tuku ai ke he tau hoe ne fa he fatapoa, mo e tau hika ne fa, ko e fahi, mo e kala ne takai aki; to fakamea ai pihia, mo e eke ai e lukutoto.
21 To uta foki e koe e povi tane ko e poa ha ko e hala, to huhunu ai ke he mena ne kotofa ai ke he fale ki tua mena tapu.
22 Ko e aho ua kia uta ai e koe e koti tane kua katoatoa e mitaki, ke eke mo poa ha ko e hala; kia fakamea foki e lautolu e fatapoa tuga ne eke ai ke he povi tane.
23 Ka oti he fakamea ai, ti ta mai ai e koe e punua povi kua katoatoa e mitaki, mo e mamoe tane he fuifui ne katoatoa ai hana mitaki.
24 Ti ta mai e koe ki mua a Iehova, ti liligi he tau ekepoa e masima ki ai, mo e ta mai ai e lautolu ke eke mo poa huhunu kia Iehova.
25 Ko e fitu e aho ke taute ai e koe e koti takitaha he tau aho ke eke mo poa ha ko e hala; to taute ai foki e lautolu e punua povi tane, mo e mamoe tane he fuifui kua katoatoa he mitaki.
26 Fitu e aho ke eke ai e lautolu e lukutoto ha ko e fatapoa, mo e fakameā ai a ia; to fakatapu ai pihia e lautolu.
27 Ka mole atu e tau aho ia, ti eke ai he tau ekepoa e tau poa huhunu ha mutolu, mo e tau poa fakaaue ha mutolu ki luga he fatapoa ke kamata ai ke he aho valu mo e tau aho i mua; ti talia ai e au a mutolu, kua pihia mai e Iki ko Iehova.